(NLTimes) – Hulanda mester haci mas pa reforsa su seguridad cibernetico mientras e pais ta den bispo di perde su autonomia digital, segun conseho nacional di seguridad cibernetico CSR a adverti. Segun e cuerpo di conseho, sistema di seguridad cibernetico Hulandes tabata birando demasiado dependiente riba companianan tecnologico stranhero, particularmente esnan di Merca y China.
Hulanda actualmente ta depende en gran parti riba companianan Mericano manera Microsoft, Amazon, Google y Oracle pa su servicionan digital. Es decir, gobierno Hulandes no por enforsa su legislacion di privacidad riba e frente aki mas, ya cu e proveedornan di servicio aki hopi biaha no ta cay bao hurisdiccion di leynan comun di vigilancia Europeo, CSR a bisa den nan conseho mas recien.
“Nos autonomia digital ta bao presion y esey ta toca curason di sociedad Hulandes; menasanan cibernetico ta aumentando y nos ta birando cada bes mas dependiente riba e infrastructura digital cu ta den man di un cantidad di actornan grandi stranhero den e mercado”, e organisacion a declara.
Pa contraresta e desaroyo aki, autonomia den esfera digital urgentemente mester bira un di e politicanan central di gobierno. Por haci esaki solamente door di duna sosten na companianan tecnologico strategicamente valioso, e cuerpo di conseho a splica. Mas public-private partnership (PPP) y un rol mas activo di Hulanda den desaroyo di standardnan internacional tambe ta necesario, segun Michiel Steltman di Digital Infrastructure Netherlands Foundation.
“Casi tur standard di seguridad cibernetico actualmente ta Mericano. Actornan grandi internacional tabatin un bentaha y sin nos intervencion, e lo bira pio”, Steltman a bisa.
Experto cibernetico Ronald Prins, di compania di seguridad cibernetico Hunt & Hackett, a splica cu no ta realista pa spera cu henter e infrastructura IT vital di e pais lo ser fabrica na Hulanda. Segun su persona, e situacion lo mehora door di pone companianan Hulandes monitor e sistemanan existente. “Bo por haci esaki obligatorio pa e sector vital”, el a sugeri.
