Seguridad alimentario…Hopi opinion, poco resultado…

Un di e aspectonan di desaroyo sostenible cu ta hayando atencion cu cambio di gobierno ta ‘food security’ (seguridad alimentario). Un di e 17 metanan di Nacionnan Uni pa logra desaroyo sostenible pa aña 2030, cu den caso di Aruba ta mustra hopi importante, aunke e no ta un tema simple, ya cu nos pais ta den un posicion bastante singular compara cu mayoria di otro teritorio, den nos region tambe. Na promer lugar nos tin e situacion cu nos recursonan pa agricultura ta hopi limita, tanto pa factornan di clima, pero tambe pa disponilidad di tereno apto pa agricultura. E ultimo aki den dos sentido: nos no tin hopi tereno disponible mas, y tereno fertil mucho menos. Esaki no ta implica cu no por haci nada, pasobra por supera e falta di espacio cu metodo di cultivo riba tereno limita, entre otro a traves di cultivo ‘vertical’ cu cierto tipo di cultivo.

Di otro banda, mester ta asina realista si pa reconoce cu simplemente no tin suficiente area disponible pa produccion di grano basico, cu na e nivel di poblacion cu nos tin ya ta requeri un superficie hopi mas grandi cu loke nos tin en total como isla. Esey ta haci cu produccion di grano manera maishi ta keda reduci na un nivel di mero folklore y nunca lo yega na mas. Mesun argumento ta conta tambe pa produccion di por ehemplo pinda. Na esnan cu talvez no ta di acuerdo cu e ponencia aki, nos kier duna lo siguiente den consideracion: mas o menos un siglo pasa, cu un poblacion di apenas diez mil habitante, Aruba no tabata por a produci suficiente cuminda pa mantene su poblacion. Awendia gran parti di e terenonan fertil, cu e tempo aya tabata percura pa gran parti di produccion, ta cubri cu cas y caretera… Na e momento aki, cu un poblacion di mas di 100.000, y un produccion insignificante, e posibilidad pa agricultura yega na quizas un porciento di e consumo anual di grano basico ta practicamente imposible. Si esaki ta e realidad, kico ta loke mester sucede anto? No haci nada mes? Nos no ta pretende esey, tur loke ta viable riba e tereno aki mester haci, pero cu e realismo cu nos no ta yega nunca na un grado significante di sustitucion di importacion di cuminda. Loke si ta posible, riba un superficie reduci, yega na produccion di un bon seleccion di fruta y berdura, cu ta make sense den sentido economico y alimenticio. Esaki no lo sucede a base di e simple deseo di logra, pero ta requeri hopi planificacion y coordinacion, pa yega na bon continuidad den produccion. Si e produccion local no ta organiza di tal manera cu tin continuidad, anto di mes e mercado local, sigur esun relaciona cu turismo, lo keda fuera di alcance, pasobra e sector ey ta exigi continuidad di suministro, y cu nan razon no ta bay perde nan lineanan di abastecimento di exterior pa un suministro local insigur.

Lamentablemente nos no a mira tanto ainda di un maneho gubernamental pa soluciona e obstaculonan cu e sector aki ta encontra. Soluciona problema no ta significa parti tereno na hende den forma di huur, sin cu realmente tin un estudio su tras pakico e ta y si e cultivo planea tin prioridad y di berdad mester un tereno di varios hectare, mientras cu gran parti di e tereno, den cierto casonan, nunca lo ser usa pa agricultura. Tambe lo mester considera emision di tereno den otro forma, manera contrato di huur pa mas cu 5 aña, pa facilita obtencion di prestamo comercial pa cultivo. Nos por observa cu e departamentonan gubernamental cu mester carga e tipo di proceso aki no ta sikiera remotamente equipa pa cumpli cu e tarea aki, di planifica, coordina y duna conseho tecnico pa introduccion di cultivo cu di berdad ta un aporte na un programa nacional di mehoracion di disponibilidad di fruta y berdura clave.

Nos no a menciona ainda e sector di cria di animal, cu riba su mes ta un interogante grandi. Na promer lugar pa mayoria di e posibilidadnan ta necesario pa importa tur cos, hasta e cuminda, loke ta haci produccion di carni practicamente no competitivo. Otro caso ta produccion di webo di galiña, cu lo por competi si tin un plan di aumenta impuesto riba importacion di webo pa duna proteccion na e sector aki. Nos a yega di cana e caminda aki caba den pasado… Pa henter e sector ta conta cu molester di vecindario cu mal holor ta limita e lugarnan unda por establece e tipo di empresa aki. Algun tempo pasa nos tabatin e caso di e chicken farm cerca di vivienda den distrito di Sabaneta, un bon ehemplo con no mester haci e cosnan aki.

Bolbiendo na e tema general di seguridad alimentario, si e conclusion ta cu nos posibilidadnan pa produccion local, en comparacion cu nos poblacion, ta keda hopi aleha di loke nos mester, anto e enfasis di seguridad alimentario ta cambia. Pa un gran parti esaki lo (keda) encera cu mester pone mas enfasis riba continuidad den disponibilidad di alimento, y riba almacenamento sigur di producto, a traves di garantiza di e lineanan di suministro di exterior, inclusive un plan di deposito sigur pa calamidad. E realismo necesario no lo gana popularidad pa ningun mandatario.