Durante temporada di vakantie tin diferente summer camps organisa pa muchanan, y un di e summer camps aki ta Sisters Summer Camp organisa pa Daniela Pop. Pop ta conta di con el a yega na e idea pa organisa e summer camp aki y e tema di enfoke pa e edicion aki di e camp.

Pop a splica cu el a bin cu e idea na 2020 durante pandemia di COVID-19 pa bin cu e camp Sisters Summer Camp Aruba cu ta pa mucha muhe di 4 pa 10 aña di edad y ta enfoca ariba yuda nan cu nan confiansa y pa nan demostra nan talento.

Esaki ta e segundo edicion di Sisters Camp Aruba. Pop ta biba den exterior pa motibo di su estudio, pero el bin vakantie Aruba pasobra e ta un meta di dje pa por yuda e muchanan a traves di e camp aki.

El a conta cu e aña aki el a bin cu e idea pa enfoca ariba e tema di bullying. Den pasado el a traha cu Telefon pa Hubentud y el a tuma contact cu Shurman Milliard di Telefon pa Hubentud pa uni na e camp y duna charla na e muchanan.

Un total di 15 mucha a participa den e camp e aña aki. Prome aña, Pop a indica, abatin 40 mucha cu a participa, pero esey ta debi na cu el a cuminsa cu promocion di e camp mas tremapn y e aña aki el a cuminsa laat.

Shurman Milliard di Fundacion Telefon pa Hubentud a remarca cu como fundacion nan ta haya hopi importante pa participa den e diferente summer camps. “Ta hopi importante pa tin e curason y afinidad pa traha cu e hobennan cu tin dilanti di bo y den e grupo aki nos a wak esey hopi bon bin back,” el a indica.

El a splica cu nan momento cu e fundacion a wordo acerca pa duna un tiki mas informacion tcoante di termento nan a haya esey hopi un aspecto hopi importante. “Naturalmente e ta leuk pa laga e muchanan bin hunto, pero tambe bo mester laga e muchanan haya e oportunidad pa siña algo y termento ta un topico hopi importante,” el a enfatisa.

El a conta cu e biaha aki, hunto cu Daniela Pop y Sisters, Telefon pa Hubentud a haya un oportunidad pa duna informacion y e muchanan mes a wak un pelicula cortico tocante di termento. Despues cu nan a wak e pelicula, el a sigui splica, nan a duna mas informacion cu ta relaciona na loke nan a wak den e pelicula.

“Asina e trabao hunto a bira asina tremendo cu no solamente e grupo aki, pero otro summer camps cu tambe Telefon pa Hubentud ta apoya y ta stimula pa asina e hobennan haya mas beneficio den e temporada di vakantie aki tambe,” el a finalisa.