Manera ta conoci na diferente ocasion Sr. Thomas Ruiz di Vereniging Rijscholen Aruba (VRA) ta trece pa dilanti e diferente problemanan relacion cu trafico na Aruba. Den e caso aki, el a trece pa dilanti un problematica nobo cu un persona a trece na su atencion pa loke ta Bureau Examen Rijbewijs (BER).

 

Ruiz a remarca cu no ta un secreto cu tin hopi problema cu BER ariba diferente topico y pa motibo di esaki varios biaha caba VRA a expresa cu nan a kita e sosten cu nan tin pa e examen actual cu for di nan punto di bista no ta integro y no ta confiabel mas.

El a splica cu nan a ricibi informacion e siman aki cu tin un problema cu e formulario di dokter cu e candidatonan di e examen di trafico mester yena prome cu nan bay pasa e parti di e examen di practica pa bay core auto.

Manera ta conoci prome cu examen practico aki mester bay dokter di cas pa haci un chekeo medico y dependiendo di e dokter e ta costa un suma di entre 60 cu 75 florin. Ruiz a indica cu segun informacion cu nan a ricibi for di un persona cu ta candidato pa pasa e examen, ta cu el a bay su dokter di cas, den e caso aki tabata Dr. Bermudez, cu ta un dokter cu tin hopi aña trahando na Aruba y cu a bay cu pensioen pero ta practicando ainda su funcion.

El a sigui splica cu a resulta cu ora e persona aki a bay pa haci su examen y a hiba e papel cu e firma di dokter Bermudez, un personal di Bureau Examen Rijbewijs a bisa cu e no ta aceptable pasobra e no ta un dokter cu ta traha cu AZV.

“Mi ta cuestiona ariba ki base e persona aki ta basa su mes, a base di cual beleid y manera semper nan ta bisa algo, pero nan no ta bisa a base di kico e ta, manera cos cu ta dictadura tin,” el a indica.

Ruiz a splica cu el a tuma contacto cu un amiga di dje cu ta dokter, dermatologo, pa puntra con e procedura aki ta y si un dokter mester ta afilia na AZV pa por practica e profesion di dokter na Aruba.

E dokter a splica Ruiz cu esaki no ta caso pasobra AZV ta un seguro. El a indica cu e rekisito importante ta, cu aunke un dokter ta cu pensioen, e mester ta registra den AruBIG y e firma di dokter mester ta registra nacional y internacional y asina e dokter por practica su profesion te ora cu e salud no ta permitie mas.

“Mi no ta compronde dicon BER ta traha asina y nan ta traha a lo loco, nan ta perhudica hende pasobra aworaki e persona aki tin cu bay otro dokter, bolbe paga e suma y bin back y spera cu esaki si BER ta tuma, no ta husto,” el a subraya.

Ruiz a agrega cu tambe nan a haya hopi critica e siman aki tocante e preguntanan cu nan ta haci den examen cu ta mal formula. El a resalta cu nan expertonan di trafico ta di acuerdo cu e preguntanan ta mal formula y ademas di esaki, el a señala, cu nan ta haya potret di e examen, locual en realidad no mag pero e ta pasa toch y door di esey nan ta bisa tambe cu e examen ta keda sin integridad.

El a indica cu hopi ta expresa cu e examen ta un fraude, pero ora puntra e hendenan pa haci aangifte, nan no kier pasobra nan tin miedo di represalia. El a menciona tambe cu nan tin un email na unda e directora di Directie Onderwijs ta bisa cu nan nunca a duna nan apoyo, locual ta nifica cu BER no tin e experto den e cuater idiomanan pa traduci y formula e preguntanan manera debe ser.

Adicionalmente el a señala cu nan ta na altura cu e bureau no tin specialista di trafico cu ta duna nan apoyo manera debe ser.

“E cos ki ta birando un dictadura y locual cu ta pio ta cu nos di VRA ta purba di trece esaki dilanti cerca instancianan concerni, pero nan no kier sinta papia na mesa cu nos pa yega na un solucion. Nos ta haya ta jammer pasobra e ta perhudicando tur hende,” Ruiz a enfatisa.

El a menciona cu na Hulanda un scandal grandi a sali na cla cu un curso pa saca rijbewijs na unda tur hende tabata slaag pasobra nan tabatin examen den nan man y p’esey tambe nan a investiga.

El a subraya e cos nan ki ta pasa no na Hulanda so, pero e por ta pasando aki na Aruba tambe. “Si no tuma e situacion na serio y haci investigacion pa salvaguardia integridad y calidad di examen, nos ta keda produci hende cu rijbewijs y bo ta keda wak e resultado den e accidentenan anual,” el a señala.

Ruiz a indica cu VRA ta purba di tur manera di informa e usuarionan tocante e leynan nobo cu a sali, e procedura etc., pero esey no ta suficiente. El a resalta cu e departamento concerni, mester “cuminsa lanta for di soño y haci algo cu e cos ki pasobra e cos ki no por mas.”

Por ultimo el a trece pa dilanti cu e departamento aki mester sali di KPA y bira un departamento independiente. Na mesun momento el a resalta cu si ta bay cambia e departamento y pone independiente, pero e ta bay cu e mesun personal of e mesun sistema, e ora no ta bale la pena independis’e.

“Nos ta wardando riba contesta ainda. Nos no tin un bon noticia tocante e examen rijbewijs. Nos ta spera cu algo lo cambia y cu algo lo drecha y cu nos lo haya oido pa trece e cambionan necesario,” el a finalisa.