Segun vocero consular Dominicano, Edward McCollum: Simbolonan patriotico mester wordo administra cu respet pa tur Dominicano

Pa medio di un comunicado di prensa, Consulado di Republica Dominicana a referi na e fecha di Dia di Constitucion Dominicano.

Tambe nan a referi riba e topico controversial di un eventual eliminacion di e escudo Dominicano for di e bandera nacional di nan pais. E discusion aki a surgi na Republica Dominicana meymey di un ambiente politico den cuadro di eleccion presidencial di e pais Caribeño aki.

Ceremonia y ley.
Diaranson ultimo durante e acto di ponemento di ofrenda floral riba Plaza Juan Pablo Duarte, Sr. Edward McCollum, kende ta vocero di e consulado Dominicano na Aruba a expresa su mes riba e nificacion di e celebracion di e 175 aniversario di Constitucion Dominicana. Tambe tocante su origen y nacemento na 1844, y cambionan cu a wordo haci na nan Carta Magna. El a laga sa cu e Constitucion ta e piedra fundamental door di cual e leynan di e sociedad Dominicano ta wordo crea.

Pero tambe McCollum a referi na e tema controversial relaciona cu e simbolonan patriotico Dominicano. El a bisa cu gobierno Dominicano mediante e comunicado oficial PR-IN-2019-25131, cu fecha 16 di october ultimo, ta referi riba uzo di e simbolonan patriotico. Nan a establece cu e bandera, escudo y himno nacional ta nifica e mas halto y ‘permanente’ representacion di e patria Dominicana.

Pa tal motibo e simbolonan patriotico aki mester wordo administra cu respet pa tur Dominicano. Pa medio di constitucion ta establece e emision di normanan cu a reglamenta e uzo di e simbolonan patriotico. E norma aki a wordo publica cu fecha 15 di juli 2019 den nan corant of Gaceta Oficial No.10947. E ta e ley No. 210-19 cu ta regula e uzo di e simbolonan patriotico di Republica Dominicana.

E vocero di e Consulado Dominicano na Aruba, Edward McCollum a laga sa cu e ley aki (No. 210-19) ta establece cu e ta drenta na vigor e mesun dia di su firma y publicacion. Sinembargo ta otorga un plaso di 6 luna pa e ‘regulacion di escudo, incluyendo su uzo den conhunto cu e bandera nacional.’ Esaki kiermen cu e bandera lo mester ta cu e escudo den tur institucion di Estado.

Den e ceremonia di ponemento di ofrenda floral dilanti di e busto di e heroe Dominicano, Juan Pablo Duarte, den cuadro di 175 aniversario di Constitucion Dominicano tabata presente e miembronan di e Cuerpo di Bombero Boluntario di Caribe, como tambe algun ciudadanonan Dominicano residente na Aruba.

Representando e consulado Dominicano tabata presente Sr. Víctor Marcelino Compres kende ta Consul General Dominicano na Aruba; Bartolomé Gamundi, kende ta vice-consul, Sr. Edward McCollum kende ta vocero y responsabel comercial di e consulado, y Sra. Hilda de los Santos, kende ta secretaria di e consulado Dominicano na Aruba.