Reduccion aparato publico y flexibilisacion mercado laboral mester bin despues di Pasco

Aruba a pasa e ley di acreditacion di personal di RST y tambe e concepto di cambio di Landsverordening Toelating Uitzetting Vreemdelingen ta cla, cu ta pone cu Aruba ta cumpliendo cu e palabracionnan haci cu Hulanda pa e ayudo di liquidez.

Asina David Abrahams di VNO Aruba a bisa Bon Dia Aruba. VNO Aruba ta asisti e organisacion di trabao temporal apunta pa ministerio di Asunto Interior y di Reino, (BZK) den implementa e pasonan pa yega na e agenda di ehecucion, segun e landspakket cu Aruba a acepta.

Reduccion di aparato gubernamental y reforma y flexibilisacion di mercado laboral di Aruba ta riba agenda pa cuminza discuti despues di periodo di Pasco.

David Abrahams a bisa cu te awor Aruba ta cumpliendo grandemente cu e condicionnan cu Hulanda a pone pa e di tres tranche di sosten cu a bin despues di a bay de acuerdo cu e rijkswetnan Financieel Toezicht y pa e Organo di Reforma y Desaroyo, COHO.

Condicionnan nobo

Manera ta conoci miembronan di e grupo di trabao tabata na Aruba algun dia despues cu a firma e acuerdo, Saskia de Reuver y Anton van der Kruk, ambos di BZK. Nan ta esnan cu ta traha e caminda pa yega na e Organo di Reforma y Desaroyo, COHO. Nan liaison na Aruba ta drs. Indra Zaandam.

“COHO por cuminza unicamente si unavez cu e consensus rijkswet bin na vigor, pa asina dun’e su base huridico. Pero no kier pa tarda y warda riba e rijkswet aki, y pesey a lanta e organisacion di trabao temporal.” E grupo di trabao aki ta traha hunto cu pais Aruba riba un agenda di ehecucion, cu ta inclui tur locual ta den e landspakket “pero reparti den pida y hinca den un programa di implementacion”. Asina por mira kico por logra mas lihe cu otro, cual ta proyecto cu por warda y cual tin prioridad.

Despues mester bin un plan di ehecucion y un team encarga. Tur eseynan mester bin den un agenda di ehecucion y ta trahando riba esaki,” segun Abrahams.

Locual tambe ta bay sucede. ta cu pa cada tranche di sosten di liquidez, ta bin condicionnan nobo, mescos cu tabata e caso cu e di tres tranche. Eseynan ta cada biaha e asina yama ‘deadlines’ cu mester cumpli como parti di e proyectonan. “Por ehemplo pa e di tres tranche, un di e condicionnan tabata acreditacion di e personal di RST, adaptacion di e LTU (Landsverordening Toelating Uitzetting Vreemdelingen). Na e di cuatro tranche lo tin mas di e tipo di condicionnan asina aki y nan mester bira conoci pronto.” Abrahams mes no sa kico nan ta na e momentonan aki.

15 December
E personal di RST mester a haya su acreditacion pa 15 di december cu tabata diamars pasa. Aruba en todo caso a pasa e ley pa acredita e personal di RST. “Mi no sa si nan ta huramenta ainda. En todo caso e leynan a pasa.

Pa loke ta e LTU, e concepto di cambio di e ley, pa permiti famia di rijksambtenaarnan drenta sin cu nan mester pasa un proceso na DIMAS ta cla y e ta na Gobernador.” Abrahams a bisa cu e no ta informa si e ley a bay Parlamento caba. “Berdad e no tabata cla pa 15 di December manera tabata e condicion, pero a bin suficiente adelanto den e exigencia aki. Parlamento mester vota riba dje ainda, logico, pero e hecho cu e concepto ta cla tabata suficiente pa ministerio pa Asuntonan Interior y di Reino, “ David Abrahams a bisa Bon Dia Aruba.

Control riba concretisacion di palabracion

E organisacion di trabao temporario ta encarga pa controla si Aruba ta cumpli cu tur locual ta palabra. Drs. Indra Zaandam ta e liaison di Aruba afilia na e grupo aki y e ta percura pa e contactonan dentro di e aparato publico. Hunto nan ta analisa unda Aruba ta para cu e procesonan, si nan ta canando bon, kico mester haci cu locual no ta canando debidamente, of si mester escala pa e nivel politico, David Abrahams a informa. Segun e representante pa Aruba di VNO e relacion cu e diferente departamentonan di Gobierno ta bayendo bon. “E cooperacion t’ey pa duna informacion na e organisacion temporal.

Un di e retonan di Aruba ta pa produci e leynan necesario pa cumpli cu e condicionnan y agenda di ehecucion di COHO. David Abrahams a bisa cu a tene cuenta cu e realidad cu na Aruba no tin suficiente hurista specialisa pa traha ley. “Riba su mes esey no ta un problema . Netamente esey ta un di e ideanan tras di e COHO, cu por organisa ayudo pa e procesonan di reforma, den forma di capadad huridico, of si mester di un tercer partido pa haci un revision, cu por sucede por medio di COHO.”

Enseñanza

Un di e tareanan di e organisacion di trabao temporal ta pa trece conexion entre partidonan na Hulanda y Aruba, por ehemplo riba tereno di enseñanza. “Segun mi a logra pone e contactonan entre Departamento di Enseñanza y ministerio di Enseñanza y Ciencia na Hulanda, pero con leu e trabaonan mes ta no ta conoci ainda,” Abrahams a bisa.

VNO na Aruba lo keda e vocero pa BZK, y mirando cu e grupo di trabao tambe ta di BZK, “nos ta traha hunto cu nan, nos ta prepara algun trabao pa nan.”

Aruba ta duna di su banda, segun Abrahams. “Te awor sigur. Futuro lo mustra con e lo sigui. Pero te awor, Aruba a cumpli cu palabracionnan, suficiente pa mustra cu tin adelanto. Pa BZK en todo caso, ta considera esey asina.”

Un di e prioridadnan di COHO ta reduccion di e aparato gubernamental, pero ainda no a hiba e discusion riba e tema aki, Abrahams a bisa Bon Dia Aruba. E ta halto riba agenda, y ta discusionnan cu lo cuminza mesora despues di periodo di Pasco. E dos proyectonan grandi ta e reduccion di e aparato publico y reforma y flexibilisacion di mercado laboral.

Lo haya sa mas despues di e ultimo reunion di Conseho di Minister di Reino cu ta tuma lugar diabierna awor.