Segun Vice presidente di FTA Hose Figaroa: Protocol di gerencia di Triple A tin un menasa

Vice presidente di FTA, Hose Figaroa a bisa cu e trahadonan di aeropuerto a bin cu un accion di protesta di 1 ora diabierna mainta, pasobra nan no ta di acuerdo cu loke ta sosodiendo.

Tampoco nan no ta contento cu e forma cu gerencia di Triple A andando cu e negociacionnan di e reorganisacion. Igualmente e trahadonan no ta di acuerdo cu e hecho di firma un protocol cu sindicato STA, si a firma, segun Figaroa.

Protocol

Abogado Figaroa a bisa cu e protocol aki entre otro tin un menasa pa esnan cu no kier tuma e pakete di retiro cu actualmente tin riba mesa.

El a contradeci loke presidente di STA, Diego de Cuba a yega di expresa, caminda e lider sindical aki cu tambe tin presencia den aeropuerto, ta enfatisa cu e pakete cu tin riba mesa mester ta uno boluntario. Kiermen un pakete cu e trahadonan por tuma sin un tipo di presion.

Sinembargo abogado Figaroa kende ta vice presidente di FTA ta puntra su mes kico e mester compronde riba articulo 4 di e protocol cu STA a firma cu gerencia di Triple A. Y el a mustra un copia di locual a wordo firma entre STA cu Triple A. Pasobra den articulo 4 ta wordo menciona cu “esunnan cu no tuma e pakete boluntariamente lo perde 50% di locual tin riba mesa.” Figaroa a bisa.

Den e pakete aki e trahado ta haya un luna di salario promedio pa cada aña di servicio. Pero si e trahado no ta firma, bo ta bay haya mita luna di salario pa cada aña di servicio. Abogado Figaroa ta haya cu no solamente eynan e trahado ta wordo castiga; pero na luga di salario promedio, e trahado ta bay haya su salario basico. “Kiermen bo ta perdiendo entre 75% di e pakete cu riba su mes caba, no ta un pakete adecua,” el a bisa. Pues e ta conclui cu si esaki no ta menasa, e no sa kico otro por ta menasa.

E ta haya un berguensa pa STA cu ta considera cu e pakete aki ta uno boluntario. Mientras cu e ta puntra su mes pa kico un pakete boluntario tin explicito un menasa den dje. Pakico bo tin cu castiga esunnan cu ta bisa no, specialmente esun cu ta busca su derecho cerca hues, cu den caso tal lo haya mita di e pakete, segun abogado Figaroa.

E ta haya cu hopi culpa ta wordo tira for di STA den direccion di FTA, cu nan a firma protocol, pero e no sa si presidente di STA mes ta compronde loke ta para den e protocol. Abogado Figaroa a nenga cu niun momento FTA a firma un protocol den cual ta entrega niun derecho di niun trahado. Alcontrario ya cu den e mesun protocol ta para cu si tin algun medida adicional lo negosha esaki cu sindicato FTA prome cu esey sosode.

P’esey e ta argumenta cu FTA ta na mesa di negociacion cu Triple A. Tampoco FTA no a firma niun protocol di terminacion ainda cu gerencia di aeropuerto, el a bisa. Pasobra den opinion di FTA e pakete cu aworaki tin riba mesa di negociacion di FTA, cu por cierto Abogado Figaroa ta considera un miho pakete di loke STA a firma, pero ainda nan no ta haya cu e pakete aki ta husto pa e trahadonan.