Despues di algun discrepancia cu Sr. Ramon Valdes kende ta activista y miembro di Movemento Dominicano Unidos na Aruba, Vice Consul Dominicano, Sr. Edward McCollum a ricibi, firma y stempel un copia di e manifiesto entrega cu un serie di keho.
McCollum a bisa cu e sede consular aki ta di “tur Dominicano.” Tambe el a expresa cu tur Dominicano ta bonbini pa trece nan sugerencia, keho of cualkier situacion, ya cu esaki ta e meta di e consulado aki.
McCollum a splica cu pa causa di e pandemia mundial, Consul Comprés Rosario ta pega ainda na Republica Dominicana. El a laga sa cu e diplomatico a haci tur gestion pa bin bek Aruba, pero no tabata posibel. E ta spera cu pronto lo keda concretisa un vuelo humanitario pa asina e consul lo por bolbe pa ehecuta su trabao.
Igualmente McCollum a declara cu e consulado lo manda inmediatamente e documento aki pa nan Canciyeria na Republica Dominicana. Unabes cu nan ta haya un contesta di nan gobierno, nan lo transmiti esaki na Movemento Dominicano Unidos na Aruba. Den nomber di Consul Comprés Rosario, el a gradici e miembronan di e movemento aki pa nan inkietud.
