Awe ta Dia Internacional di Cacho di Caya, cu a keda institui 12 aña pasa pa alerta riba e problematica aki, cu tambe ta afecta Aruba. E por mustra straño, pero alrededor di 80% di e cachonan cu nos ta wak riba caya, tin doño. Esaki segun estadistica cu comision di Ley di Cacho tabata maneha. E hecho aki sigur ta laga hopi di bisa riba nan responsabilidad cu nan mascotanan.

Veterinario Ricardo Contreras ta haya cu a pesar di algun iniciativa y logronan, e problematica di cacho cayehero ta sigui na Aruba. El a bisa cu 29 aña pasa, ora cu el a cuminsa traha na Aruba, e situacion di cacho riba caya tabata pio. Por lo menos awor tin un ley di cacho, y tambe un shelter. Otro diferencia ta cu awor gobierno ta papia di e problema aki. Sinembargo e ta haya cu ainda falta hopi mas pa atende e asunto aki.

Un aspecto cu ainda falta ta mas conscientisacion. Tambe disposicion den gobierno pa sigui haci mas riba tereno di conscientisacion. Pues e ta demanda mas boluntad politico. Igualmente e ta haya cu gobierno mester convence su mes cu mester hinca mas placa pa atende cu e problematica di cacho di caya, sino dificilmente nan ta bay haya resultado.

E ta reconoce cu sin duda e situacion actual ta miho compara cu varios aña pasa. Contreras ta aplaudi cu tin hopi iniciativa cu antes. Un cacho di caya no tin dak, awa y cuminda. Pero principalmente nan ta falta di cariño. Sinembargo danki na e iniciativa di mas organisacion of fundacion, nan ta trahando riba rescate di cacho di caya.

Tambe tin e campaña di sterilisacion cu ta andando cu ta brinda e servicio aki na un prijs pa reduci. Pues e ta haya cu no tin excuus pa no sterilisa un cacho. E situacion ta mehorando, pero ainda ta falta hopi.

Tin varios factor cu lo por contribui riba problematica di e cacho di caya: Mal comportacion di e animal, gasto di alimentacion y atencion veterinario. Kiermen tin doño iresponsabel cu ora nan ta mira cu nan mascota ta bira malo, nan ta dicidi di laga nan bandona.

Apesar cu nos ta pasando den un crisis socioeconomico pa causa di e pandemia, ainda e doñonan di e mascotanan ta percura pa nan cuido y atencion veterinario.

Veterinario Contreras a expresa cu durante e temporada aki e por a wak un berdadero preocupacion cerca e doñonan di mascota. “Nos ta hayando hopi mas trabao…,” el a bisa.

E ta kere cu e hecho cu e hendenan tin mas tempo pa ta na cas y nan no ta gastando hopi riba caya, nan tin mas recurso pa dedica na nan cacho. Mientras e situacion di e cacho di caya ta keda mescos. Pues e no ta kere cu e crisis di Covid a afecta e cuido di mascota, y e hendenan mas bien ta mas consciente di esey.