Fondo di Nacionnan Uni pa Infancia a denuncia cu, den ultimo cinco aña, casi 50 mucha a muri purbando di crusa e selva cu ta separa Colombia y Panama. Ta trata di un di e luganan mas biodiverso y peligroso di mundo. E migrantenan ta purba di yega Merca y ta enfrenta tur sorto di peliger.
Unicef a informa cu na 2019 e frontera aki a ser crusa pa mas di 4.000 mucha menor di edad. Un dato cu ta supera shete biaha e cifra di 2018, aña den cual a reporta 522 mucha menor. Segun datonan di e organisacion, 24.000 persona di mas di 50 nacionalidad, entre nan ta inclui India, Somalia, Camerun, Congo y Bangladesh, a crusa e selva na 2019, di ken 16% tabata mucha y mita no tabatin ni 6 aña.
“E aumento dramatico den e cantidad di mucha homber y mucha muhe migrante cu a pasa a traves di e selva di Darien ta destaca e necesidad urgente di accion pa proteha y garantisa nan acceso pa servicionan esencial como awa, salud, higiena”, e representante di Unicef na Panama, Kyungsun Kim a bisa den un comunicado.
E tapon del Darien ta un luga di selva, di 580.000 hectar di extension cu ta interumpi pa e caretera Panamericano. E teritorio aki ta supone 13% di superficie di Panama y ta un di e luganan mas biodiverso na mundo. Sinembargo, tambe ta un frontera di circulacion hopi dificil, motibo pa cual migrantenan y narcotraficante ta probecha su aislamento pa crus’e.
Desde Unicef ta pidi pa studia e causanan cu ta pone e muchanan bandona nan cas y pa sigura medida como acceso pa educacion y salud di tur menor migrante, como tambe acaba cu nan detencion y establece alternativa pa su cuido.
Otro di e demanda ta pa proteha e muchanan di explotacion, violencia, xenofobia, discriminacion y separacion di nan famia.
Den e sentido aki, e organisacion a declara cu lo mantene su presencia den e tereno ‘pa provee servicio den area di awa, saneamento, salud, nutricion y proteccion pa e muchanan durante 2020’.
