Ex-presidente Luiz Inácio Lula da Silva por gana e prome buelta di eleccion presidencial di Brasil na 2018, apesar di su situacion hudicial, pa e caso di Petrobras, asina encuesta cu a ser publica diadomingo a informa.

Lula (2003-2010) lo bira e candidato mas vota, cu  un 30% di e electorado aproximadamente (contra 25-26% na december). E cantidad ta dobel den comparacion cu cantidad cu Marina Silva, ex – ministro de su gobierno por haya, cu a mantene su mes na un 15%, y Jair Bolsonaro, un “outsider” cu tin entre 14 y 15% di voto (desde 8 y 9% anteriormente). Bolsonaro por keda na un  lugar privilegia manera  di dos posicion, si un di e scenarionan cu a ser analisa den e estudio haci pa e organisacion Datafolha, por bira realidad.

Silva ta e unico politico cu por vence Lula den di dos buelta: 41 contra 38%, un diferencia cu Datafolha ta considera como un “empate tecnico”. Den tur encuesta Lula Da Silva por gana cu basta punto mas den comparacion cu  demas candidatonan.

“Lula ta den liderazgo, apesar di e problema cu e tin tocante e caso Lava Jato”, encuesta a bisa.

E ex-lider sindical y fundador di partido di  trahador tin cinco proceso di investigacion pa corupcion, trafico di influencia y obstruccion di husticia riba su lomba. Si algun di nan haya condena, y despues logra ratifica e decision den  instancia superiori, anto e lo no por lansa su mes como un candidato pa proceso electoral.

Figura nobo
E escenario politico di Brasil a drenta den turbulencia desde aña cu a pasa, ora cu Dilma Rousseff (2011-2016), sucesor di Lula, a ser destitui pa adultera cuentanan publico.

E mala fama a habri porta pa otro figura manera e candidato radical Bolsonaro, cu ta defende e ultimo dictadura (1964-1985),  Joao Doria, actual alcalde di ciudad di Sao Paulo y otro persona cu no tin apego na ningun partido pero cu tin prestigio social, manera e hues Sergio Moro.

Datafolha a midi e candidatura hipotetico di e magistrado di prome instancia, Sergio Moro cu ta conoci como un icono anti-corupcion, pa su participacion den e caso di Petrobras. Moro a nenga su boluntad di participa den politica, y el a splica cu e lo interoga Lula Da Silva na su husgado di Curitiba dia 10 di mei venidero. E encuentro aki a desperta hopi interes na Brasil.

Un posibel candidatura di Doria, por suma 9% di votonan.