Parlamentario mr. Juan E. Thijsen mescos cu tur hende na Aruba tambe ta sigui desaroyo politico y hudicial referente e ola di corupcion na Aruba. Ministerio Publico ta man yen di trabao y a cuminsa detene hende den e caso na unda Ministro di Labor, Asuntonan Social y Hubentud ta ser acusa di varios delito serio. Paralelo cu e caso di Paul Croes Aruba ta enfrentando acusacion otro manera riba e benta y corupcion cu tereno di pueblo.
Tambe tin acusacion contra ex Ministro di Turismo y lider di e partido nobo POR Otmar Oduber di cu Oduber lo a hinca placa di fondonan publico den su saco. Ainda ta pendiente e acusacion serio di parti di Dowers cu Otmar ta meti den traficacion di droga etc. Pues segun Parlamentario mr. Juan E. Thijsen e problema cu corupcion cu permisonan di trabao a amplia masha hopi mes y Parlamentario mr. Juan E. Thijsen ta kere cu Ministerio Publico tin cu amplia nan investigacion tambe. Ya no por papia mas di e sospechoso Paul Croes sino di e sospechoso Gabinete Mike Eman ya cu e mayoria di Ministronan ta envolvi. Paul Croes mes, de Mesa (permisonan CITGO), Benny Sevinger permiso y terenonan, ex Ministro Otmar Oduber (tambe tabata encarga cu permiso), hortamento di fondonan publico y meti den traficacion di droga y finalmente Mike Eman mes sigur den e terenonan pero tambe e tapa tur e fechorianan y ta responsabel pa nan. Parlamentario mr. Juan E. Thijsen ta duna Ministerio Publico e beneficio di duda y ta kere cu te awor Ministerio Publico a mustra boluntad pa actua. Di otro banda tambe tin e aspecto di capacidad di Ministerio Publico di por hiba e scandal gubernamental y hudicial mas grandi di nos historia na un desenlace na unda husticia ta prevalece. No ta e prome caso ya cu den pasado a conoce e caso di ex Minister Berlinksi, ex Prome Minister Henny Eman y ex Ministro Tico Croes. E experiencia cu e resultado final no tabata mucho bon y ta spera cu e biaha aki e bay miho.
Parlamentario mr. Juan E.Thijsen ta kere cu e biaha aki Ministerio Publico tin bon asistencia di instancianan local y di Reino. Aparte di e parti hudicial cu ta coriendo su caminda tambe tin e parti politico na unda ya ta bisto cu den e siguiente eleccion pueblo mester bisa un no fuerte contra e coalicion AVP/POR ya cu ambos partido ta envolvi den casonan di corupcion. Segun Parlamentario mr. Juan E. Thijsen e problemanan na Aruba ta demasiado grave y urgente pa laga otro 4 aña mas den man di un gobierno corumpi. Parlamentario mr. Juan E. Thijsen y partido MEP ta cla pa resolve problemanan serio di nos pais y percura pa un miho calidad di bida na Aruba. Hunto sin miedo pa e cambio.
