“Mi no a kere e polis lo a bay dal e señora pero ora mi a wak esey mi a core bay filma cu mi telefon.”

Antayera a tuma luga un detencion na Eagle Beach unda mas o menos 5 polis a presenta pa detene un dama cu lo a ta tocando muziek riba beach. Aunke portal Masnoticia y tambe Bon Dia Aruba mes a publica cu e persona aki lo a ta ‘haciendo poco show pero posiblemente no ta bon di cabes’, un persona cu tabata presente a comparti un video (click aki) unda por mira cu e señora ta acusa polis di a molesti’e intencionalmente.

E dama di fam De Graaf a splica na e persona teniendo e camara cu el a lanta na Aruba pero a bay biba afo, recien despues di bin bek pa un tempo un di e polisnan cu lo ta un colega di su familiar ta molesti’e intencionalmente, segun e. Esaki e ta haciendo pa basta tempo conhuntamente cu e familiar, manera e ta splica den e video.

Despues di a splica cu e polisnan no a splica su persona dicon nan a boei e, un di e polisnan masculino ta bisa cu el a lanta cu violencia, riba cual e dama a reacciona cu palabra fuerte cu e no a asalta niun hende. Na e momento ey e polis a bis’e pa relaha, pero e dama a keda insisti cu e no a touch niun hende, si no al contrario, ta polis a touch e.

”Mi tabata djis tende muziek trankil riba beach. Esey no ta un crimen.” Djey e polis femenino cual lo ta conoci pa e dama a splica cu ambulance lo bin prome. Nos a purba haya mas informacion di Cuerpo Policial dicon exactamente a detene e dama y dicon a yama ambulance pero nos no a logra haya contesta di voceronan policial.

‘E señora ta masha bon di cabes’

Despues cu polis a hiba e dama pa warda pa ambulance e polis femenino cual e dama a menciona anteriormente a puntra e persona cu a filma si e ta filmando pa prensa, na cual el a contesta cu no, e ta filma pa su mes. E polis femenino djey a bisa e persona ‘pa bo mes ok. Di awo mi ta bisa bo pa wak cu e cos ki no publica’. Na cual e persona a conesta ‘dicon no?’.

Segun e polis femenino e lo no mag di publica esaki pa percura pa e privacidad di e persona mes. Pero aki e persona a bisa cu el a wak kico a pasa den distancia. Aki e polis femenino a bisa cu e dama no ta bon di cabes. Sinembargo segun e persona e persona ta ‘masha bon di cabes’.

Na fin di e video e polis femenino ta avisa e ciudadano pa percura pa e no post e video. Djey e ta puntra pa identificacion di e persona, kende ta Jahruby Morris.

Nos a acerca sr. Morris tambe pa comentario, cual a splica nos cu prome cu el a cuminsa filma e tabata cu su coleganan na un di e tentnan di watersport y el a wak e dama cu polis a detene yega. “Nos a wak e di ora el a yega den un bon ambiente. E tabata canta baila su so sin molestia niun hende te cu ami a kere tin un klas di zumba of algo lo tin. Pero despues na dado momento polisnan a cuminsa papia cu e señora despues e señora a bay na su pertenencianan cerca di lama.”

E ta conta cu polis a sigui e dama y ora e dama a cay sinta nan tabata discutiendo algo. ‘Mi ta kere nan no tabata di acuerdo un cu otro y djey tiramento di palabra a cuminsa’.

Na dado momento segun sr. Morris polis a ‘gewoon dal e señora dos wanta duro na su cara’. E señora lo a reacciona na e wantanan pero nan no a duna niun chens, pues nan a bula riba dje y boei e, segun e. “Mi no a kere e polis lo a bay dal e señora pero ora mi a wak esey mi a core bay filma cu mi telefon.”

Te na momentonan aki nos no a haya reaccion di Cuerpo Policial.