Dialuna merdia dilanti warda di polis na Playa, Krishna Harilail, tata di e victima di e caso di violacion vincula cu Ibero High School, a bay entrega keho. Pero esaki no a wordo tuma, pasobra e mama ‘so por haci tur cos’.

Segun Harilail, el a bay afo pa dos siman, ora cu el a haya sa e noticia. E ta splica cu e tabata tin un bon amistad cu e director, pero nunca e director a cont’e di e situacion di su yiu muhe di 15 aña.

E ta purbando di busca husticia pa su yiu. Sinembargo, e caso aki tin dos luna andando, unda Harilail ta bisa cu mama a sconde hunto cu director y su casa. Segun e ta continua splica cu awo e mama kier pone keho, pasobra el a wak cu Harilail a papia prome. Como tata di e mucha, Harilail ta expresa cu e scol nunca a yam’e pa asina informa locual a pasa 2 luna atras. “Mi ta amigo di director y ta traha na scol tambe.”

El a bay warda di polis pa duna denuncia, y aki a resulta cu e no por pone denuncia, pa motibo cu e mama tin voogd. “Polis ta bisa mi cu e mama ta haci afspraak, anto ami no por haci e. Mama so tin derecho? Tata no tin?”

Tur polis ta wak, pero ningun ta actua. Ora ta algo chikito si, pero den caso grandi nada. “Mi kier wak accion. Mi no ta worry cu nada, djis derecho di mucha. Gobierno mester wak un manera pa cambia ley y stop abuso.”

Harilail ta bisa cu si asina tur cos bay ora cu mucha wordo abusa, si mayornan separa anto e tata no por haci nada, ‘pa e motibo aki tin tanto caso di abuso’. Polis a informa Harilail cu pa dos luna ningun hende a duna keho.

Despues cu el a bay riba media pa expresa loke a pasa, e mama di e mucha a cuminsa move pa pone denuncia, ‘awo e ta cuminsa cu accion’. Pero Harilail ta bisa awo ta laat, pasobra e homber cu a comete abuso no ta na Aruba mas. “E homber a sali, pero e lo bolbe bek ora tur cos keda trankil. E director sa esaki tambe.”

E ta disgusta cu e sistema di scol y con nan a trata cu esaki. E ta remarca cu si e scol no actua bon, mester ta cauteloso pa e otro muchanan cu ta bayendo e scol, ‘mucha hoben y chikito’, ya cu director y su casa no ta haci nada. “Placa so tin eyden, nada di derecho di mucha”, aregando cu e director y su casa a djis bandona e caso.

Su otro yiu grandi, huntu cu mama, no kier pa e tata papia cu e mucha. Sinembargo, e ta bisa ta 50% e ta yuda cu gasto di su yiu. E ta bisa cu e kier e derecho di su yiu pa e por ta den un lugar sigur y pa stop cu e silencio.

Actualmente Harilail no sa ki direccion e tin cu bay. E ta bisa cu mester bin cu ley pa stop cu abuso. “Mi no ta bay stop di pusha te ora mi haya contesta, tur instancia concerni mi ta bay pa nan drenta den accion. Mi kier husticia actua y proteha derecho di mi yiu.”

Mientrastanto, for di Cuerpo Policial a sali un comunicado cu ta bisa cu na niun momento no a nenga di tuma e keho di e tata, sino cu a palabra cu e mama di e mucha victima cu awe lo tuma nan declaracionnan/keho.