Segun Sue Ann Laclé-Ras: Nulmeting lo determina direccion di Plan di Crèche

Plan di Créche (kinderopvang) kier busca mas calidad, pero tambe control riba nos sistema di cuido y guia pa mucha. E ta uno hopi importante caminda comunidad, pero mayornan cu tin yiu chikito ta pendiente di dje. Pero con ta bayendo cune y con leu nan ta?

Actualmente tin alrededor di 121 crèche. Sinembargo algun di nan, alrededor di 6 crèche a cay afo. Nan no a logra sobrevivi debi na e situacion di e crisis di Covid-19 cu nos ta pasando aden. Mientras cu tin e fenomeno di crèche pirata tambe cu mester atende debidamente cu nan.

Nulmeting

Ex parlamentario Sue Ann Laclé-Ras ta coordinador nacional di implementacion di Ley di Kinderopvang y tambe di Codigo di Proteccion (Meldcode). Ambos ta proyectonan cu a cay den e plan macro di Social Crisis Plan. Actualmente nan ta bezig cu e asina yama nulmeting, caminda nan ta haciendo un inventarisacion di e situacion pa bin cu mehora despues.

El a bisa cu esaki ta bay yuda nan pa asina nan por tin un miho bista. E proceso pa bin cu e plan di crèche por bay mas lihe cune. Aunke no full, pero si e ley su implementacion por bay den faceta. Nan intencion ta pa e drenta eventualmente na vigor entrante otro aña entre januari y februari. Mirando cu e plan di crèche ta hinca den e Social Crisis Plan tin placa disponibel pa ehecut’e.

E ley aki cu ta data di basta aña atras. Ainda e no a wordo ehecuta debidamente, y nan tin problema cune. Ta asina cu nan ta evaluando e ley mes, ya cu e tin hopi cos cu nan no por ehecuta. Ademas e ley tin hopi cos cu nan no tin regla den e maneho ken ta bay hacie. Nan ta haciendo un evaluacion cu hurista, mirando cu si tin tanto cambio y ahustacion cu mester haci den e ley aki. Tanto asina cu Laclé-Ras a cuminsa sinti e sensacion di propone na e comite riba e posibilidad di bin cu un ley nobo cu si nan por ehecuta.

Pero pa logra esaki e nulmeting ta bira importante y esencial pa determina cual parti di e ley nan por pone pa bin na vigor di biaha, y kico ta e minimo cu nan por exigi. Y cual di nan mester warda un rato mara na cierto periodo pa duna espacio na esnan cu ta brinda e servicio aki. Laclé-Ras a bisa cu nan intencion no ta niun momento pa cera niun crèche. Mas bien nan ta bay yuda nan pa hisa e calidad di nan servicio, y naturalmente pa bin cu control.

E nulmeting tabata bayendo bon, pero nan mester par’e pa un temporada debi na e crisis di Covid. Di alrededor di e 115 crèche cu tin actualmente, 78 di nan a duna nan participacion den e nulmeting. Kiermen cu ainda falta alrededor di 38 crèche pa reuni cu nan. Nan ta ripara cu despues di e prome fase di e Covid, ora cu e centro di cuido aki a habri bek, mayoria di nan ta funcionando rond di un 50% di nan capacidad normal.

Regulacion

Encuanto e tipo di existencia basico pa tur centro di cuido pa mucha, Laclé-Ras a referi cu tin un manual di regulacion cu a wordo traha prome cu el a asumi e responsabilidad aki. Tin exigencia minimo y basico pa tur crèche, por ehempel, e luga mester ta uno adecuado. Ademas nan mester tin suficiente trahado pedagogico cu por atende e muchanan. Tambe facilidad, entre nan un baño optimal cu ta funciona, y un cushina cu no por bira un peliger pa e mucha.

Nan ta e necesidad basico cu tur mayor lo desea pa nan ofrece na nan yiu. Un aspecto tin di haci cu inversion. Mayoria di crèche ta keda cobra un prijs comodo, atractivo y competitivo pa e servicio cu nan ta brinda, caminda e muchanan ta keda 8 pa 9 ora pa dia. E tipo di prijs aki tambe ta stroba nan pa por haci inversion. E ta un factor cu Laclé-Ras a yega di encontra cune desde cu el a asumi e tarea aki. E ta haya cu tin hopi idea pa atende cu e situacion aki, entre nan bati e porta di compania grandi pa busca e parti di responsabilidad cooperativo como di comunidad tambe.

Segun Laclé-Ras, mayoria di e crèche cu nan a reuni cu nan ta dispuesto pa atende cu e regulacion. Ademas e intencion ta pa nan participa y haci nan aporte creando un sorto di plataforma. “Mi ta fiel creyente di locual ta veld,” el a bisa. E parti aki e ta hay’e como fundamental pa asina e comite por tin un bista di locual ta wordo biba den e veld aki pa bin cune den nan maneho.

Despues di e nulmeting, nan intencion ta pa crea un plataforma pa traha hunto cu nan. E intencion tras di esaki ta cu un dia nan lo por yega na nan propio departamento di Centro di Cuido pa Mucha di Aruba. E ta algo cu nan ta bay cuminsa traha hunto cu Departamento di Recurso Humano (DRH) pa pone e departamento aki riba pia, ya cu nan ta consider’é necesario. E no ta kita -segun Laclé-Ras- protagonismo na Departamento di Asunto Social (DAS), ya cu practicamente DAS mes ta consider’é mucho trabao pa nan actualmente.

Actualmente 115 crèche. E ta un grupo grandi, pero esaki ta esun registra oficialmente. Tin un cantidad di centro di cuido di mucha cu ta traha pirata y clandestinamente. Nan por ta alrededor di mas cu 30 crèche cu ta operando ilegalmente. E ta haya cu ora cu ta bin e parti di permiso, tin espacio pa structura miho pa nan por bin aden y asina tin mas control riba nan.

Un problema cu nan a yega di detecta, y cu tin su efecto riba e centro di cuido di mucha, tin di haci cu e pago. Tin mayor cu no ta cumpli cabalmente cu e pago. Encuanto caso di maltrato of abuso, e por presenta, pero no asina hopi, el a laga sa. Nan ta mantene bon contacto cu e mayor di e mucha, y unabes cu nan ta ripara algo, nan ta tuma contacto cu nan.