Ayera pueblo Hulandes a celebra un referendum riba e acuerdo di asociacion di Ukraine na Union Europeo(UE). Pa e acuerdo di Ukraine su incorporacion na UE lo por drenta na vigor, si e ta haya sosten di e 28 paisnan miembro di e bloke aki, y esun cu tabata falta ainda ta Hulanda.
Segun analistanan e consulta popular aki lo por ripiti loke a yega di sosode na 2005, caminda Hulanda cu ta un miembro fundado di UE, a vota contra e proyecto di un Constitucion Europeo. Ayera e temor cu tabata existi tin di haber cu e referendum aki cu nace fei di un peticion popular lo por ocasiona otro crisis na Bruselas. E referendum di ayera a wordo celebra danki na un ley cu a drenta na vigor aña pasa y cu a permiti colecta 472 mil firma cu a obliga e gobierno pa convoca e referendum of consulta popular.
E analistanan ta mira cu tanto pa e politiconan Hulandes y dirigentenan di Comision Europeo, y tambe pa e presidente Ukraniano, Petro Poroshenko, e referendum aki ta bay mas aya di gewoon incorporacion di Ukraine na UE, y mas bien riba e union di paisnan Europeo su futuro. Nan di cu un resultado “negativo” lo por trece cun’e un gran crisis continental, ya cu Rusia lo reclama un victoria facil riba su control na Ukraine.
E ultimo sondeo publica pa e corant Volkskrant ta afirma cu un mayoria lo vota “No”. Pa e referendum aki lo ta valido mester vota a lo menos un 30% di e poblacion. E votacion den e referendum aki no ta obligatorio.
E referendum aki tin un importancia simbolico tambe. E ta e prome referendum di e tipo aki cu ta wordo celebra na Hulanda. E referendum aki ta habri caminda pa eventualmente somete bou votacion of consulta popular e aprobacion di e TTIP. E ta e Acuerdo Transatlantico di Comercio y Inversion cu Union Europeo ta negosha cu Merca.
Hoben Arubiano
Un hoben Arubiano, Zaira Lin kende ta studia na Hulanda a bay vota den e referendum aki. El a relata na Bon Dia Aruba cu su experiencia den e consulta popular aki ta hopi diferente cu otro studiantenan Arubiano cu a haci uzo di su derecho di voto tambe. Actualmente e ta studiando International and European Law y como cu e no solamente ta studiando ley Europeo pero tambe bibando den Europa, e ta haya su mes mas ‘presente’ of mas activo den e topico aki.
Un luna pasa, e mes cu un grupo di studiante a organisa un evento unda cu nan a invita e Embahador di Ukraine na Hulanda, esta Sr. Olexander Horin, pa un lectura riba e pregunta “dicon si?”.
Naturalmente hopi a wordo splica con e tratado aki lo beneficia Ukraine. Den esaki el a haci un pregunta na e diplomatico: “Meneer a papia hopi di con e tratado aki lo yuda Ukraine, manera restructura Ukraine, instrumento pa yuda bringa corupcion (un di e hopi preocupacion Hulandes tin) y stabilidad, pero kico ta e beneficio di e tratado pa Hulanda y e European Union?”. El a bisa cu e contesta cu el a haya tabata: “Flor! Hulanda ta exporta y distribui biyones di flor rond di full mundo, si e tratado ta exito, Hulanda lo por uza nos tera pa sigui planta mas y finalmente ta e distribuidor di mas grandi na mundo!”
“Mi no tawata ‘bendi’ cu e contesta y ainda mi tawata tin duda pasobra si, Hulanda ta distribui biyones di flor pero sin of cu Ukraine su tera, ainda e produccion di esey lo sigui. Y e beneficio pa Ukraine ta hopi mas cu locual e lo beneficia Hulanda”, segun Zaira su opinion.
El a laga sa cu e motibo cu nan a organisa e evento aki ta pasobra nan a ripara cu hopi hende no sa kico berdad e “Associatieovereenkomst” of acuerdo di asociacion ta encera. Zaira su impresion ta cu realmente tin hopi hende cu no lo vota, porta simplemente pasobra nan no sa di kico e ta bay over. Otro posibilidad por ta no tin interes pa e resultado of por ta pasobra nan sa cu apesar di vota, e no lo cambia e resultado.
E personalmente no ta haya Hulanda a haci suficiente pa informa su hendenan di e tratado aki. E impresion ta cu tabatin basta informacion duna door di diferente corant y website, pero no di un fuente imparcial. “Mi ta haya cu sinembargo tawata tin hopi informacion pushando pa un “no” mas cu un “si”, el a laga sa.
Zaira haciendo uzo di su derecho como ciudadano Hulandes a bay vota den Stacion Central di Rotterdam. E a bisa cu no tawata tin mucho hende y el a tarda practicamente 1 minuut pa drenta y sali bek. “Di e momento ey, mi no a bay cu mucho pero mi sa cu en general mi ta carga un experiencia unico. Ta un momento excepcional pa por participa den un Referendum, y mi a purba curasha mas hopi Arubiano akinan posibel pa tuma e oportunidad aki”, el a relata na Bon Dia Aruba.
E kier a bisa tambe cu e referendum aki no ta obligatorio, pues e Gobierno di Hulanda no tin e obligacion di tuma e decision a base di locual su hendenan a kies. Pero locual ta preocupa su persona ta cu e decision di e referendum aki por influencia e referendum di United Kingdom den juni, y esey si ta obligatorio. “E UK por dicidi di sali for di e EU… Esey si mi no ta kier pasa”, el a bisa.
