Recientemente minister di Finanzas y Cultura, Xiomara Maduro, anuncia mediante un comunicado di prensa cu e compania di rating Standard and Poor’s (S&P) Global Ratings a ‘upgrade’ Aruba su rating di ‘stabiel’ pa ‘positivo’ despues cu nan a haci nan evaluacion financiero di Aruba na luna di februari ultimo.

Ariba e website di S&P Global Ratings por mira e rapport completo den cual ta detaya nan evaluacion financiero y kico a hiba nan na upgrade Aruba su rating.

E compania a indica cu e pronostico positivo ta refleha un posibilidad mas grandi, un den tres, cu nan por aumenta e rating di Aruba durante e periodo di 12 pa 24 luna. E compania ta remarca cu nan ta spera cu economia di Aruba lo keda mas riba di su nivel di prome cu pandemia durante e periodo cu nan ta pronostica, y cu e gobiernonan lo logra super fluhonan fiscal, sosteniendo un mehoracion den su carga di debe neto y un relahacion cooperativo cu Hulanda.

S&P ta remarca cu den un escenario negativo nan por baha e rating den e proximo dos aña si entradanan per capita baha drasticamente, of si gobierno ta deshaci e progresonan cu a logra riba e efectonan fiscal, cu ta conduci na deficitnan grandi di gobierno cu ta persisti un carga di debe mas halto, y aumento di costo di debe. Nan agrega cu si e relacion bilateral entre Aruba y Hulanda ta debilita, señalando un erosion di forsa institucional, nan por baha e rating cu un of mas grado.

Den un escenario positivo, e compania ta indica, nan por subi e rating den e proximo dos aña si Gobierno di Aruba por demostra progreso riba nan plan di reduccion di debe y reforma economico, cu lo conduci na un structura di balansa fortifica y un economia cu ta mas resistente.

Esaki, nan ta señala, hunto cu un relacion cooperativo cu Hulanda cu ta sostene sostenibilidad di debe y confiansa di inversionista, por hiba na cu e compania ta subi e rating di Aruba.

S&P Global Ratings ta remarca cu Aruba su economia ta ancra pa entradanan solido, cu a recupera den e ultimo tres aña mientras turismo a recupera. Economia di Aruba ta depende casi den u 100% riba turismo, y si agrega e tamaño di e isla, e compania ta señala, ta haci e pais vulnerable pa shocknan externo. E vulnerabilidad aki a keda subraya pa e pandemia, cu a causa cu necesidadnan di prestamo di gobierno, y debe, a subi significantemente.

Sinembargo, nan ta agrega, e riesgonan asocia cu e debe mas halto a keda mitiga door di financiamento cu Hulanda a proporciona. “Nos ta mira e compromiso aki como evidencia di e beneficio cu Aruba ta ricibi for di su status como miembro di Reino Hulandes, cu a duna e stabilidad politico y institucional, previsibilidad di politica, y certidumbre hudicial,” e rapport ta indica.

Na mes momento, nan a sigui indica, Aruba ainda tin activonan di pensioen di sector publico grandi cu ta contraresta e carga di debe mas halto. “Nos ta sigui kere cu flexibilidad monetario ta limita e rating, debi na e relacion prolonga cu e dollar Mericano cu Aruba tin,” e compania a señala.

S&P Global Ratings ta resalta den nan rapport cu basa riba varios aña di crecemento economico fuerte di economia di Aruba, nan ta spera cu esaki lo sigui expande durante e proximo añanan na un ritmo mas modera.

E compania ta pronostica cu exportacion di turismo lo sigui aumenta durante e proximo añanan, incluyendo e recuperacion completo di turismo crucero. Pa loke ta yegada di bishitantenan cu ta keda na Aruba a yega 111% di e nivelnan di 2019 na 2023, mientras cu e porcentahe di bishitantenan di crucero a yega na 98%.

Na mes momento, e compania a agrega, cu nan ta pronostica cu inversion lo baha na 2024 siguiendo e finalisacion di dos proyecto grandi di hotel. “Nos ta kere tambe cu e dependencia casi completo di Aruba riba industria di turismo ta sigui haci e pais vulnerable pa shocknan externo,” nan a enfatisa.

S&P Global Ratings ta resalta den su rapport cu teniendo na cuenta di e mehoracion fiscal di Aruba, nan no ta spera cu Hulanda lo duna sosten financiero significante mas durante e proximo dos aña, mas leu di fondonan pa inversion di capital dirigi bao di su programa di reforma.

Aruba su status como pais autonomo dentro di Reino Hulanda a duna e pais e posibilidad pa beneficia di ayudo y asistencia mutuo di Hulanda den pasado, manera prescribi den Articulo 36 di Statuut van het Koninkrijk der Nederlanden, cu a keda invoca durante e pandemia.

Hulanda a proporciona mas cu 900 miyon florin pa Aruba den forma di prestamonan. E dos gobiernonan a yega na un acuerdo pa refinancia e prestamonan na un tasa di interes di 6.9% na final di 2023, cual ta mas halto cu loke Gobierno di Aruba a anticipa inicialmente. Hulanda ta cobra e tasa di interes aki siguiendo e decision di Gobierno di Aruba pa mantene e regulacion di supervision financiero na Aruba door di un ley local (LAft), en bes di un ley di reino (RAft).

Na mesun momento, e compania a agrega cu nan ta keda positivo cu e relacion entre Hulanda y Aruba lo keda stabiel durante e proximo añanan relaciona cu e implementacion di e pakete di reforma. Na 2023, e paisnan a yega na un acuerdo tocante e implementacion di e landspakket y a firma un acuerdo bilateral mutuo cu a reemplasa un Anteproyecto di Ley di Reino cu tabata duna menos autonomia na e miembronan constituyente di reino. Pa un suministro presupuestario, inversion y sosten di maneho for di Hulanda, Aruba a compromete su mes pa implementa reformanan durante un periodo di cuater aña. E programa di reforma lo opera conhuntamente cu College Aruba Financieel Toezicht (CAft).

S&P Global Ratings a enfatisa cu nan ta positivo cu Gobierno di Aruba lo logra progreso riba reformanan economico cu a wordo stipula den e acuerdo di landspakket. E reformanan aki ta inclui pasonan pa mehora e mercado laboral, clima di negoshi, y competitividad. Di otro banda nan ta señala cu nan no ta spera diversificacion material di economia den nan pronostico y ta kere cu crecemento structural per capita a largo plaso di Aruba lo ta mas abao cu esnan di economianan cu nivelnan di entrada similar.