Errol de Freitas, presidente di San Nicolas Business Asociation (SNBA) diabierna ultimo a duna un declaracion na unda a trece dilanti e desaroyonan cu ta bin tumando luga den lunanan aki na San Nicolas, entre otro, e proyecto di revitalisacion di main street di San Nicolas.

E fase 1 di e proyecto unda a kita asfalt y a pone klinkers for di Van de Veen Zeppenfeldstraat te cu Charlie’s Bar a keda cla, awor e y di dos fase ta bay ta te caya di Paulus Potterstraat.

Tambe ta bay pone parkeo na banda cu iluminacion segun DOW mes a anuncia e cual ta bay tin un duracion di 50 dia di trabou pa lo cual de Freitas a duna su gradicimento y tambe a señala cu e ta spera cu esaki por keda cla prome cu luna di december. “Pasobra e trabou aki tin hopi aña den pipeline.”

Den e vision cu SNBA ta bin entregando Gobierno di Aruba e cual nan a traha cu nan durante e ultimo 6 aña, segun de Freitas, aworaki ta den proceso pa asina mira kico a ser haci y no laga algun puntonan afo pa nan por ser ehecuta manera el a sigura den su discurso durante e apertura di e Job Center di Hotel Secret’s Baby Beach.

“Mi tin cu bisa cu mi ta hopi orguyoso di estadistica di e cantidad di hendenan cu a bay aplica na Secret’s” unda el a afirma cu ta casi 500 persona a aplica y cu e idea tras di esaki ta pa hendenan local aplica y esey ta sucediendo.

“E hecho cu nan ta bisa cu Arubiano ta floho, cu Arubiano no kier traha, mi ta imagina cu tur caminda tin e situacion ey, pero tambe nos tin cu motiva nan, nos tin cu paga nan drechi y nos tin cu zorg pa prepara pa lo cual ta bin,” el a bisa.

Den e vision aki pa San Nicolas, manera el a indica, ta bay haya full un cambio di e caya bayendo straight na Carnaval Village y nan a identifica lo cual nan ta yama ‘Revenue Centers’ e cual ta e luganan cu ta bay trek negoshi pa pariba di brug.

Loke nan ta sperando di e negoshinan y di nan miembronan ta cu ta ripara e oportunidad cu tin den esaki, e tipo di negoshi cu mester ta prepara pe, “e ta algo mas gastronomico, nos ta weita cu Secret’s no a explota lo cual ta full e beverages. Nan a tene nan palabra cu shopping lo sucede aki bou, p’esey e avenida bayendo pa Colony por haci e distancia mas corto y importante,” De Freitas a sigura.

Ademas, el a trece dilanti e situacion cu Hickinson Hotel na unda el a manda un mensahe na e doñonan di e hotel aki pa tuma un decision, si ta bay desaroy’e, bend’e of entreg’e.

Red Zone di San Nicolas tambe ta hayando critica segun De Freitas ta señala, “nos a sinta cu minister di Husticia y nan a cuminsa haci un clean up pa lo cual ta e chollernan, bo tin mas seguridad den caya awor.”

Pa loke ta trata e muhenan cu ta traha den diferente barnan, el a bisa cu e hecho cu nan t’ey “ta fine, pero nan tin cu para afo di e bar, decente of sinta den nan bar y warda, historicamente esaki tabata asina pero nos tambe ta pushando pa e bay den lo cual nos ta yama Hanchi, unda desaroyadonan ta invertiendo ayanan.”

Di e parti di Colony, pa varios biaha caba el a trece dilanti e topico di Santana di Cacho unda De Freitas a informa cu el a reuni cu Departamento di Salud Publico y Directie Natuur en Milieu (DNM) den caso aki “pero ta parce cu ta cierto cosnan so nan ta sali afo pa critica of pa haci desordo, nos tin cu actua cu nan, no solamente pa e turistanan, pero nos mes, si bo wak e condicion unda nos tin potretnan y video, ta mustra cu ta birando pio.”

El a haci un apelacion na esnan cu recientemente kier dera nan bestia eynan pa “please busca un crematorio di bestia y asina yuda den situacion aki.”

Lo cual ta e beach di Baby Beach, De Freitas a menciona cu un di e critica mas grandi cu e ta haya ta cu e beach ta bay ser tapa, nan a bin papiando di e tema aki hunto cu Gobierno di Aruba, caminda el a sigura cu nan ta tumando e caso aki na serio “pero mi ta kere cu despues di hopi deliberacion nan a compronde kico nos kiermen, awor nos tin cu zorg pa ehecuta e pida ey.”

Tocante un reunion cu nan a tene cu minister di Asuntonan Economico, Geoffrey Wever, el a bisa cu minister Wever a haya sa di e vision di SNBA pa motibo cu na final di dia mester tin un vision cu full Gobierno di Aruba tin cu carga “y si bo tin idea di cambio, el a bisa cu e ta tremendo, mi sa cu e ta trahando di su banda y mi ta spera nos relacion continua manera cu e ta aworaki pasobra na final, Aruba ta gana.”

Pa finalisa, el a bisa cu e tienda yama Esquire cu tabatin casi 100 aña y cu a cera recientemente despues di a duna Aruba tur cos, specificamente famia De Cuba, nan mester a para dos of tres luna den stof pa warda y riba esey, “cua ta ultimo biaha a mi of a abo a cumpra algo eynan? si bo ta puntra tur e negoshinan cu tin akinan cu ta critica e damitanan ey di Red Zone, ta nan ta nan cliente di mas grandi y nos tin cu pone e cosnan den balans, no tin ni un otro caminda pa desaroya. Ban haci di pariba huicioso y organico pa nos por enjoy nos isla.”