Federacion di Trahadonan di Aruba (F.T.A.) kier a reacciona riba un comunicado di prensa emiti door di Sindicato di Trahadonan di Aruba (S.T.A.) pa medio di su Presidente, Diego de Cuba, den cual e ta referi na un carta informativo cu a wordo adresa na empleadonan di Aruba Airport Authority N.V. (A.A.A.)

Den e comunicado aki F.T.A., uzando argumentonan debidamente substancia, a refuta e ponencia di S.T.A. cu si acaso e resultado di e proximo referendum na A.A.A. ta cu F.T.A. no haya mayoria di voto, S.T.A. lo keda automaticamente como e sindicato representando e empleadonan.

E ponencia aki, manera indica den e carta, ta legalmente y obhetivamente incorecto. Si acaso F.T.A. no haya mayoria di voto, A.A.A. lo por nenga di reconoce S.T.A., como cu e no a participa na e referendum y por lo tanto no por substancia su ponencia cu empleadonan di A.A.A. a punta e pa representa nan den negociacion di un C.A.O. nobo.

Manera cu e situacion ta, de facto si F.T.A. no logra mayoria di voto den e referendum dia 27 di augustus, A.A.A. lo keda sin sindicato. F.T.A. ta lamenta cu den su reaccion, De Cuba un biaha mas ta ‘conseha’ empleadonan pa keda sin bay vota, locual ta un acto sumamente iresponsabel cu por tin consecuencianan hopi serio.

De Cuba, banda di cualifica un decision di Corte di Apelacion como ‘co’i loco di Corsou’, un bes mas no ta argumenta su ponencia cu door di no participa na e referendum, di un of otro forma S.T.A. lo mantene su mes como e sindicato legalmente punta pa negocia un proximo C.A.O.

Ademas, ‘nos no por keda sin condena e hecho cu De Cuba, den su comunicado, ta scoge pa ‘bully’ su propio coleganan di A.A.A.’ “Nos ta spera diferente den un sindicalismo moderno, responsabel y di nivel. No por perde di bista cu como sindicato bo ta carga un responsabilidad enorme, cual ta salvaguardia e interesnan laboral di bo miembronan”, segun FTA.

Na momento di busca apoyo cerca e clase trahado, mester haci esaki di un forma responsabel y cu argumento valido y bon substancia. No por medio di frasenan populista y insinuacionnan sin base. Nos mundo laboral di awendia ta consisti di muhe y hombernan inteligente y critico, kendenan merece di wordo trata y informa di un forma adecua, pa asina por tuma decisionnan corecto.

Den su comunicado, sindicato F.T.A. a menciona un serie di punto riba cual nan por yuda e trahado di Triple A tuma un decision consciente na momento haci un escogencia durante e referendum di awe pa 11:30 di mainta na oficina di Mediador di Gobierno.