Minister di Husticia, Rocco Tjon den un conferencia di prensa ayera mainta a trece dilanti cu criminalidad na Aruba no a aumenta. El a respalda su contesta cu cifranan y resumen anual cu a wordo presenta na Parlamento di Aruba for di aña 2015, pa asina purba di saca e parti di politica for di esaki, manera el a sigura.
Pa cu esaki, redactor di Bon Dia Aruba a puntra minister Tjon si lo ta bon pa gobierno tuma den consideracion pa duna back na Cuerpo di Polis di Aruba e recorte di salario di 12.6%, pa asina agentenan di polis haya mas motivacion. Esaki mirando algun incidente cu a bin tumando luga na Aruba pa loke ta trata inseguridad, unda cu cada dia agentenan di polis ta pone nan bida den riesgo.
Minister Tjon a contesta cu e no ta comparti e ponencia pa loke ta trata aumento di criminalidad na Aruba y a señala cu recorte di salario di 12.6% ‘ta un topico cu no tin relacion cu e parti di combati criminalidad’. “Un polis no ta scoge e trabao aki pa placa, e ta scoge e trabao aki pasobra e ta un yamada. Y pa e motibo ey mi ta sigur cu si bo duna e 12.6% back of bo no a dun’e back na un modo di bisa, esey no lo motiva un polis mas hopi pa haci su trabao, pasobra un polis ta haci su trabao pasobra el a huramenta pa garantisa seguridad pa tur esnan cu ta biba akinan. Mi no ta wake cu e ta den relacion pa cu otro. Y pa loke ta 12.6%, mi ta kere cu minister presidente den varios ocasion caba a elabora extensamente pa cu esaki, di e intencion di parti di gobierno, pero tambe di e exigencianan di parti di Hulanda.”
Par di minuut despues di e declaracionnan aki, Bon Dia Aruba a tuma contacto cu presidente di sindicato di Cuerpo di Polis di Aruba, Rodney Solognier, pa asina e por duna e otro banda di medaya. Solognier a convoca un conferencia di prensa unda a papia tocante diferente topico. Entre nan, salud mental, unda tin varios proyecto na caminda cu ta hopi necesario, unda cu ‘polis tur dia ta confronta cu hendenan cu problemanan mental cu no tin un solucion pa nan actualmente na Aruba’, segun Solognier a menciona. “Pero mi ta spera cu e proyecto ey no caba na aros con coco, pasobra nos tin hopi problema tocante esey.”
Asina el a bisa cu polis no ta transporta hende cu problemanan mental y ora cu un situacion a bay malo ora cu un polis mester atende cu un persona asina, e ta bira un problema, pa motibo cu nan ta traha cu Husticia, no cu Cuido Medico.
Ademas, tocante e declaracion di minister Tjon, Solognier a comenta cu e parti di recorte di salario di 12.6% – cu ta un topico cu no tin relacion cu e parti di combati criminalidad – den esey minister Tjon tin un punto manera el a bisa. Pero e parti cu ta trata di e agentenan di polis, “e tin tur te maken, pasobra tur hende ta disgusta. Unabes bo tin un hende demotiva, niun hende ta traha cu e amor manera antes. Nos por bisa hopi, pero ora bo ta sinta hopi halto den un stoel nunca bo por wak ful abao kico ta pasando”. Solognier, kende ta presidente di sindicato, a expresa cu e ta traha riba tres warda tur dia y e ta wak kico ta pasando.
Di loke ta trata e contesta di minister Tjon unda el a sigura cu criminalidad na Aruba no ta halto, mientras cu comunidad por a mira diferente drive-by shooting, personanan deteni cu droga y te hasta un intento di asesinato contra un polis mes, a puntra Solognier si nan ta di acuerdo cu criminalidad ta abao. El a declara cu “mi kier sa meneer Tjon tin un estadistica bieu. Si nan mata un hende na Latino America, na un pais cu tin 40 of 50 miyon [habitante], un hende, nada no a pasa. Nan mata un hende akinan na Aruba y estadistica ta bay shelo, di asina halto cu e ta bay. Riba dje, cu e drive-by shooting, danki Dios e no a mata un hende sino cu el a raak un hende su man, pero e no a raak e hende cu mester raak. Corda bon na 2005 un hende a pone Aruba plat, pa añanan, awor nos kier esey atrobe?”
Ademas el a bisa cu nan ta den problema financiero, unda cu e pais ta depende di Hulanda y cu ciudadanonan no tin placa pa paga loke nan mester paga, y cu e no kier pa loke a sucede na 2005 bolbe ripiti na Aruba.
“Berdad nos tin cu traha duro y mi ta kere nos mester pone mas hende riba pia pa por cuida y por catch e guynan aki cu ta haciendo e mal hechonan aki actual. Pero nos mester hacie cu cautela pasobra nos tur cu ta bisti e uniform aki, nos ta bay nos cas, nos tur tin famia y nos famia ta warda nos den cas”, el a sigura.
Pa finalisa, sindicato di Polis a informa cu nan a convoca un reunion general cu caracter di urgencia pa tur su miembronan na Club Pova awe 10or di mainta na unda cu agentenan di polis ta bin expresando nan mal contento pa e declaracionnan di minister di Husticia Rocco Tjon di ayera mainta.
