Sharline Koolman di departamento di Salubridad Publico (DVG) tabata hopi cauteloso riba e fase di flexibilisacion di e medidanan pa combati e contagio di coronavirus. Sinembargo lo yega un dia cu nos lo yega na loke ta wordo yama ‘normal nobo.’
Como funcionario di DVG, e ta haya cu salud publico ta hopi importante. Pero di otro banda, e parti financiero/economico tambe ta importante. Koolman ta haya cu na final nos tin cu yega cu gradualmente nos lo tin mayoria di luga habri y nos lo tin e virus controla. Sinembargo el a bisa categoricamente cu esaki no lo sosode di awe pa mañan. E ta kere cu prome cu fin di aña aki probablemente tampoco. Pues e ta premira cu pa e fecha ey, ainda e normal nobo cu nos tin cu deal cune, ta keda aplicabel
Pa pone e parti di salubridad publico y aspecto financiero/economico den balans, e crisis team a dicidi di bin cu un reapertura cu diferente nivel. Manera a wordo anuncia diamars anochi, e prome nivel tin di haci cu reanudacion di cierto actividad economico, caminda nan ta permiti maximo 15 persona den un establecimento.
E motibo di esaki ta cu nan lo por monitor durante dos siman e resultado di e flexibilidad aki, si tin mas caso cu ta bin dilanti. Encuanto cual lo bira e cantidad di caso of situacion interno di Covid-19 pa evalua cu por habri bek tur actividad economico, Koolman a bisa cu nan a bin cu strategia di nivelnan pa asina gradualmente nos por yega na e normal nobo. Na Merca y Hulanda ta wordo uza e mesun tipo di strategia aki.
“Bo ta habri step by step pa bo por wak cada bes si bo ta haya casonan ta sali for di dje,” el a bisa. Pa e motibo ey no a wordo habri tur cos pareu. Tur cos ta depende di e cantidad di caso cu lo resulta, despues di e flexibilidad gradual pa determina e momento pa evalua cu por habri bek tur actividad economico na Aruba. E no ta bay pa e casonan so, pero tambe riba nos capacidad hospitalario y di cuido intensivo (ICU).
