Sharline Koolman di departamento di Salubridad Publico (DVG) a bisa cu nan ta consciente cu e proceso di flexibilisacion di e shelter in place lo trece mas caso positivo di Coronavirus/Covid-19.
“Nos mester ta realistico. Nos ta bay haya caso. Bo no por mantene na e 101 eynan,” el a bisa. Koolman a laga sa cu nos ta bay haya caso y no ta Aruba so, sino cu e ta algo mundial.
El a haci un yamado pa nos tur ta prepara pa deal cu e momento cu nos ta cuminsa haya e casonan aki. Na e aspecto aki –segun Koolman– nan tabata referi na inicio di e crisis aki ora cu nan a papia di ‘flatten the curve.’ Esaki kiermen pa nos pais ta bon prepara y tin tur cos na nan luga, prome cu nos por sigui cu e proceso di reactivacion gradual di nos actividadnan den e normalidad nobo.
Aruba no lo ta un excepcion y nos lo sigui haya caso, manera tur parti di mundo, segun Koolman. El a referi cu hopi luga cu a cera y cu a habri bek, a yega di haya casonan nobo.
Koolman a bisa bon cla cu naturalmente e flexibilisacion di tur medidanan, y na momento cu nos ta habri e fronteranan bek, nos ta bay haya caso nobo di e virus. “Simplemente nos mester sa con pa deal cu nan,” el a conclui.
