Despues di e reunion cu gobierno a sostene cu e sindicatonan cu prome minister, Evelyn Wever-Croes a cualifica como un ‘bon reunion’, e sindicalista Magaly Brito como secretario general di SEPPA a informa riba loke nan a delibera durante nan reunion.

Gobierno a informa e sindicatonan cu di parti di e ministernan nan ta ahusta nan proposicion inicial, y nan ta entrega 12% di nan salario y 8% di vakantieuitkering. Kiermen gobierno a informa di a haci su ahustacionnan y nan ta bay entrega 20% total di nan entrada. E ahustacion aki a keda confirma pa premier Wever-Croes durante su conferencia di prensa di dialuna anochi.

SEPPA a referi cu den e reunion di dialuna tardi, gobierno y sindicatonan a continua pa trata e proposicion cu gobierno a duna sindicatonan diabierna ultimo pa corta den salario di empleadonan publico, trahadonan di fundacionnan y e trahadonan di NVnan estatal.

Tambe gobierno a bolbe ripiti nan proposicion pa e pensionadonan (no esnan cu ta cobra pensioen di biehes), esta 50% di e gelijkbedrag di luna di december. Gobierno a bisa diabierna ultimo tambe cu nan a duna instruccion na e ministernan concerni cu ta representa shareholder (esta pueblo) pa cuminsa e mesun caminda, esta pa bay over na corta den entrada di esnan cu ta labora na nos companianan estatal.

Riba e punto aki, e reaccion di sindicatonan cu ta representa trahadonan na e companianan aki a indica cu nan kier bay negosha esaki cu e diferente empresanan. Pues, claramente e posicion di e sindicatonan tabata cu si ta papiando cu esaki ta un medida di gobierno riba tur e trahadonan cu di un of otro forma ta den un relacion di trabao cu un instancia di pueblo manera gobierno, parlamento, companianan estatal, fundacionnan, cu nan mester haya e decisionnan aki tambe. Esaki ta conta mescos pa parlamento, ya cu gobierno no por dicidi pa nan, sino mester di un tercer cuarta parti di parlamento pa bay di acuerdo pa corta den nan entrada.

Gobierno tambe a duna di conoce cu nan ta bay laga haci mas control na supermercadonan, como tambe amplia e canasta basico, ya cu di un forma mester ataca e costo di bida cu tambe ta birando cada dia mas dificil.

Gastonan innecesario

SEPPA a entrega nan puntonan cu ta contene un cantidad di asunto cu nan ta desea pa igualmente sosode, sigur pasobra nan ta gastonan innecesario. Esaki ta e punto tambe, Aruba no por sigui mas manera prome, pues e ta conta tambe pa gobierno y mester corta den gastonan cu ta innecesario.

Entre e gastonan innecesario, e sindicatonan a menciona cu mester termina tur contractnan di huur/lease innecesario, tur comisariado mester bira honorario, “Last in First Out (Lifo).” Den nan tin hende cu tin un of mas entrada, nos ta den tempo dificil no por paga mas, segun SEPPA. Introduci balkenende-norm, eliminacion di overbruggingstoelage, tur arbeidscontractanten cu tin salario riba e bezoldigingsregeling mester wordo baha na loke ta conta pa empleadonan publico. SEPPA no ta bay di acuerdo pa ningun medida. Brito a laga sa cu a keda palabra cu gobierno lo analisa e documentonan ricibi y lo yama sindicatonan pa un siguiente reunion.