E decision di gobierno di habri scol bek a crea un serie di reaccion den comunidad, considerando e crisis di coronavirus/Covid-19 cu Aruba y mundo henter ta pasando aden.

SEPPA ta haya cu den e discusion aki mester a inclui sindicatonan, representando tur trahado di nos scolnan, manera docentenan, esnan di limpieza, esnan cu ta traha como assistentnan, etc.

Habrimento di nos scolnan ta depende grandemente den sigura cu famia y esnan cu ta cuida tin full confianza cu permitiendo nan yiunan na scolnan ta sigur. Nos no ta kere cu e confianza t’ey na e momentonan aki. Mester traha riba esakinan.

Lo tabata mas na su luga pa hopi tempran traha hunto riba e condicionnan pa un regreso sigur na scolnan basa riba e principionan cu mester ta ‘in place’, esta siguridad y bienestar di nos studiantenan y docentenan of staf como e base principal. E sentimento di esnan den enseñansa ta cu un caminda a sinta papia, a tuma decision, pero ningun momento a envolvi esnan cu por papia con e ta sosode den practica.

Ademas, cu den un asunto asina delicado tipo di decisionnan asina no por sosode di un dia pa otro y un dunado di trabao mester cumpli cu rekisitonan minimo di siguridad, bienestar y higiena na pia di trabao. Loke no ta sector educacion no ta sinti cu tin na e momentonan aki.

Practicanan di tur dia y di operacion, proceduranan na scolnan mester cumpli cu e standard nan minimo y confiabel. Particularmente esnan cu ta regarda ‘distanciamento social’, higiena y practicanan di limpieza, suplemento sigur di materialnan disponibel ora ta necesario. Pero tambe guianan den caso di contacto fisico cu no por wordo evita cu muchanan y hunto cu esaki analisis regular di posibel risiconan.

No ta pornada cu docentenan mes ta puntra, unda e recursonan adicional ta pa e scolnan pa limpieza profundo y constante di scolnan como medida esencial contra risico.

Ta p’esey mes, loke cu niun hende a spera ta cu awor nos ta den e fase, unda studiantenan, docentenan y otronan ta enfrente di shownan “cientifico” cu tur cos ta cla y safe pa por bek scol.

Falta di confiansa

Sindicato SEPPA a laga sa cu habrimento di scolnan ta un di factornan cu ta apunta na start nos economia, y esaki nos tur ta mir’e. Compania of luganan di trabao ta habri porta bek, trahadonan ta bolbe bek na trabao y asina scolnan tambe lo habri. Tur hende ta desea apertura di nos scolnan, pero esaki mester sosode solamente ora e ta sigur pa haci esaki.

Pero ta importante cu e consideracion principal den e asunto aki di habrimento di scolnan, ta e siguridad y bienestar di nos muchanan, docentenan y e staf completo, nan famia y publico en general. Scolnan tin un rol importante den e sosten pa continua educacion di nos yiunan, yiunan di trahado, muchanan vulnerabel y e mantencion di servicionan publico esencial. Esaki mester sigui tambe como prioridad bao di e re apertura completo di nos economia.

Sinembargo, SEPPA ta laga sa cu na e momentonan aki e ta bisto cu tin un falta di confianza. Y e regreso insigur no solamente lo kibra e laso di confianza entre scolnan y cas, pero lo stroba e recuperacion exitoso a largo plaso di nos economia.