Un grupo di Senadornan a exigi eBay, Alibaba y Craiglist pa splica con nan lo combati benta ilegal di productonan di vaping riba nan plataforma den un carta manda pa e companianan ayera.
Na juni, The Verge a reporta cu plataformanan di comercio cibernetico manera eBay tabata plama cu oferta di sigaria electronico. Algun di e ofertanan tabata mustra autentico, mientras otro tabata contrabando. E productonan aki ta viola politicanan di eBay, y mientras e compania ta uza un variedad di herment pa combati e ofertanan, ta keda relativamente facil pa cumpra productonan di tabaco y sigaria electronico riba e plataforma. Ademas di viola reglanan, no tin metodo pa verifica cu e cliente tin edad legal pa huma tampoco.
E grupo di senador, lidera pa Richard Blumenthal (D-CT), ta inclui senadornan Elizabeth Warren (D-MA), Jeff Merkley (D-OR), Jeanne Shaheen (D-NH), Ed Markey (D-MA), Bob Menendez (D-NJ) y Sherrod Brown (D-OH).
“Door di permiti e productonan aki prolifera den bo mercado, no solamente bo ta sostene e companianan aki den nan empresa pa aumenta demanda y acceso cerca hubentud, sino tambe asistiendo contrabando kende ta causa mas daño na e adolescentenan”, e senadornan a skirbi. “Tur e productonan aki – real of contrabando – ta peligroso y no mester ta disponibel riba bo plataforma.”
E carta ta yega menos di un siman despues cu presidente Donald Trump a anuncia cu su administracion lo busca pa prohibi tur producto di sigaria electronico cu sabor for di mercado Mericano. Durante e ultimo simannan, centenares di persona rond di e pais a bira malo y algun otro a fayece pa motibo di malesa mortal di pulmon vincula na uzo di sigaria electronico. Ainda no ta cla precies kico ta causa e malesa, pero nan a hiba legisladonan pa considera prohibicion general te ora tin mas informacion. Cualkier prohibicion afectando productonan di vape den tiendanan fisico lo pusha mas usuario di e producto pa busca ofertanan riba mercado preto.
Esaki no ta prome biaha cu eBay ta ricibi critica pa e ofertanan aki. Na april 2018, Food and Drug Administration (FDA) a notifica e compania cu tabata bende productonan Juul riba su plataforma. Pero despues cu FDA a tuma contacto, ainda tabatin cantidad di producto di vape riba eBay.
Den nan carta pa eBay, Alibaba y Craigslist, e senadornan ta presiona e companianan tocante nan politica di tabaco y con nan tin plan pa mehora cumplimento, pa asina tene productonan di vape y sigaria electronico fuera di nan plataforma. E companianan tin te cu dia 1 di october pa responde.
