Mientras cu diahuebs ultimo tabatin un reunion den Parlamento di Aruba, unda prome minister demisionario Evelyn Wever-Croes a papia tocante e negociacionnan andando cu Hulanda pa un Ley di Reino pa Supervision Financiero, Secretario di Estado pa Relacionnan di Reino, Zsolt Szabo a indica cu gobierno Hulandes no tin intencion pa aplasa e fecha pa entrega di e Rijkswet, cu actualmente ta dia 1 di mei proximo.
Esaki segun Secretario di Estado Szabo a indica na noticiero local NoticiaCla durante weekend.
Diahuebs, Wever-Croes a indica cu e siman aki e lo ta na Hulanda pa reuni cu e Secretario di estado tocante e fecha di 1 di mei y e negociacion tocante e Rijkswet El a indica cu juni 2024 a yega na un acuerdo nobo cu Hulanda caminda a elimina RAft y lo sigui negocia riba otro tipo di Rijkswet. Den e acuerdo aki, a palabra cu pa dia 1 di mei proximo mester entrega e propuesta di Rijkswet nobo na Tweede Kamer na Hulanda y na Parlamento di Aruba.
Wever-Croes a remarca cu e negociacionnan ta bayendo bon y nan ta hopi satisfecho con tur cos ta bayendo. El a indica cu nan ta negociando keto bay riba nivel ambtelijk, y riba nivel bestuurlijk no a cuminsa delibera ainda. E negociacion ainda ta den cuadro di emocion cu parlamento anterior a duna y tardansa den esaki ta mas tanto debi na IMF.
Diabierna, durante un encuentro cu prensa despues di Conseho di Minister di Reino, a puntra Szabo riba e fecha. El a bisa cu e no tin intencion pa prolonga e fecha aki. “Mi ta spera tambe cu pronto lo tin un gobierno nobo [na Aruba]. Y mientras cu e no t’ey, mi lo sigui negocia cu e gobierno actual,” e Secretario di Estado a bisa segun NoticiaCla. El a bisa cu nan ta keda traha y enfoca pa logra cumpli cu e acuerdo pa dia 1 di mei.
Manera menciona, prome minister Wever-Croes ainda ta mira espacio pa discusion pa e fecha di 1 di mei, y a indica na Noticia Cla cu e lo haci un intento pa aplasa e fecha. Sinembargo, Secretario di Estado Szabo no a mustra mucho apertura pa e idea.
