Recientemente, Secretario di Estado pa Relacionnan di Reino, Alexandra van Huffelen a papia cu portal noticiero NoticiaCla, indicando cu “en berdad mi a ricibi solamente un propuesta” y cu a ricibi esaki for di Aruba riba e ultimo dia prome cu 1 di september.
Esaki despues cu a puntra Van Huffelen cuanto propuesta el a ricibi for di Aruba pa cu e disputa cu tin pa introduccion di ley di Reino pa supervision financiero, RAft.
Van Huffelen a combersa ayera cu prensa di Reino prome cu biaha pa New York cu delegacion di Reino pa atende e Asamblea General di Nacionnan Uni. E delegacion tambe ta conta cu prome minister di Aruba, Evelyn Wever-Croes, di Sint Maarten, Silveria Jacobs y e ta encabesa pa premier Hulandes, Mark Rutte.
Van Huffelen a reitera cu a ricibi apenas un propuesta pa resolve e impasse cu tin relaciona cu e refinanciamento di debe di Corona, pa cual Hulanda ta exigi pa Aruba introduci un ley di Reino pa supervision financiero, y cu ademas, a ricibi e unico propuesta aki apenas un dia prome cu e deadline.
Referiendo na comentarionan di Wever-Croes, kende a bisa cu a manda por lo menos 10 propuesta, Tito Lacle di NoticiaCla a pidi Van Huffelen si esaki tabata e caso. “Segun mi, mi no a haya dies propuesta. Mi a ricibi uno. Por ta na nivel di ambtenaar tabatin cierto intercambio, pero ami no a ricibi ningun otro proposicion cu esun prome cu 1 di september,” Van Huffelen a contesta.
E Secretario di Estado a indica cu e ta spera cu e combersacion lo continua cu Wever-Croes na New York mientras nan ta participando na e reunionnan en conexion cu e Asamblea General di ONU.
