Siman pasa, durante un conferencia di prensa di Gobierno, Prome Minister Evelyn Wever-Croes a elabora riba e interes di 6.9% cu Hulanda a duna Aruba riba e fiansa haci durante pandemia. Prome Minister a indica cu el a informa Hulanda cu e interes aki no ta uno cu Aruba a yega di paga den pasado, y cu e ta demasiado halto pa wordo considera un ayudo.
“E palabracion tabata cu Hulanda lo fia Aruba e placa na un interes di mercado internacional, cu ta rond di 6%, pero lamentablemente, Hulanda no ta dispuesto pa cambia esaki. Esaki sigur ta un decepcion grandi pa Aruba, mirando cu como pais den Reino, lo spera pa haya un ayudo, y no un interes cu ta igual cu riba mercado internacional”, Prome Minister a expresa.
Den un carta di Secretario di Estado pa Relacionnan di Reino, Alexandra van Huffelen dirigi na Tweede Kamer cu e titulo “resultado di refinanciamento di prestamo di debe pa Aruba, Corsou y Sint Maarten,” Van Huffelen a duna su punto di bista riba e situacion.
“Manera ta conoci, e prestamonan pendiente di Covid na Aruba, Corsou y Sint Maarten a caduca riba dia 10 di october 2022,” e carta di Van Huffelen ta cuminsa. “Anteriormente e aña aki, Gabinete Hulandes a dicidi di ta dispuesto pa refinancia e prestamonan aki bao un cantidad limita di condicion. Pues mi esfuersonan durante ultimo lunanan tabatin meta pa yega na acuerdo cu cada pais relaciona cu e refinanciamento aki.”
El a agrega cu awo cu e fecha di 10 di october a pasa, e ta informa di e resultadonan a traves di e carta.
Tocante Aruba, el a bisa cu den e siman prome a tene discusion cu Aruba tanto na nivel administrativo como di gobierno pa loke ta trata e acuerdo di prestamo cu Van Huffelen a presenta dia 22 di september. E discusionnan aki a conduci na varios cambio den e acuerdo di prestamo “cu mi a pa solicitud di Aruba,” segun Van Huffelen. “Como resultado, nos ta exitoso di yega na un acuerdo cu Aruba pa refinanciamento a largo plaso. Minister di Finanzas di Aruba y mi persona ambos a firma e acuerdo di prestamo dia 10 di october.”
E Secretario di Estado ta splica cu e acuerdo en cuestion ta involucra un prestamo di 915.5 miyon florin cu un termino di 20 aña na un tasa di interes di 6.9 porciento. El a bisa cu riba solicitud di Aruba, e schedule di repago ta linear na lugar di anualidad. “E diferencia entre e dos ta cu, cu un acuerdo linear, mester paga un suma igual di repago, loke ta nifica cu e tasa di interes ta mas halto na comienso di e termino cu na e fin. Den e prestamo di anualidad, e cuota ta keda mescos a traves di henter e termino, cu diferenciacion entre e interes pagable y e repago.”
Igualmente, Van Huffelen ta splica cu Aruba a rechasa e opcion ofreci pa Hulanda pa automaticamente reduci e interes na momento cu yega na un acuerdo riba un Ley di Reino regulando supervision financiero y un amienda na e Ordenansa Nacional di Aruba riba Supervision Financiero a drenta na vigor. “Claro, Hulanda ta dispuesto pa discuti reduccion di e tasa di interes den e situacion aki, di acuerdo cu e oferta haci pa Hulanda.”
Van Huffelen ta dedica atencion tambe na e situacion di Corsou y Sint Maarten, prome cu conclui cu “ta bon noticia cu tur tres pais a firma un acuerdo di prestamo nobo prome cu e prestamonan di Covid anterior caduca.”
“Na mes momento, mi tambe a tuma nota di e varios expresion di Corsou y Aruba pa cu nan Parlamento y medionan di comunicacion. Mi ta enfatisa, pues, cu Hulanda consistentemente a laga cla den tur caso cu ta dispuesto pa ofrece refinanciamento. E condicionnan poni pa refinanciamento mas faborable ta directamente relaciona na reduccion di riesgo pa e sostenibilidad di e finanzas publico di e paisnan, y pues, reduccion di e riesgo cu Hulanda ta confronta cu e prestamonan substancial aki. Den mi bista, e posicion di Hulanda ta den linea cu e igualdad y reciprocidad cu cual mi ta desea di colabora den Reino. Mi ta bay sigui traha pa un cooperacion positivo cu ta alinea cu e relacionnan dentro di nos Reino.”
