Segun Richard Arends, e lo hiba un oposicion cu argumento den parlamento

Pa 11 luna, Richard Arends a fungi como minister di e gabinete Mike Eman II. Cu e salida di ex minister y actualmente lider di POR, Otmar Oduber, a presenta e cambio den e gabinete, y sr. Arends a asumi e responsabilidad di minister di Asunto Economico.

Entrante diabierna awor e ta bay pa un reto nobo como parlamentario di pais Aruba. E ta kere cu den su rol nobo e lo adopta e mesun posicion cu na aña 2007, tempo cu e tabata presidente di FESCA y nan a hiba un oposicion no convencional di argumento. “Ami ta kere cu mi contribucion den e proximo parlamento lo ta mesun cos”, el a declara na Bon Dia Aruba.

Asuntonan pendiente
Den e tempo relativamente corto aki como minister e ta sinti su mes satisfecho di por a logra diferente asunto y crea un base solido pa economia sigui draai. Entre otro nan a bin cu e proceso di rehabilita e refineria su operacion. Nan ta varios logro cu ta wordo laga atras y cu e ta spera cu nan por haci bon uzo di dje. “Mi ta kere cu e miedo di mas grandi ta cu hopi cos lo wordo revoca, hopi cos lo wordo cambia, creando un incertidumbre innecesario den economia. Economia ta hopi suceptibel pa incertidumbre…”, el a bisa.

E hoben mandatario a resumi den tres punto e asuntonan pendiente cu e tempo tabata mucho cortico pa e bon bin cla cu nan. Un punto cu e ta lamenta cu e no por a concretisa ta esun di henter e proceso di tramitologia cu mester cuminsa den e departamento di Asunto Economico. E ta haya cu e departamento aki ta e delaster cu e inversionistanan ta yega na dje, y su intencion tabata pa bolter esey, caminda e prome entrada pa loke ta trata tur e regulacionnan y permiso mester ta e departamento di Asunto Economico.

Otro asunto pendiente tabata e modernisacion di nos sistema di pago caminda ya Banco Central a cuminsa traha un road map pa haci esaki posibel. Otro punto pendiente tabata esun di garantisa un competencia husto pa bin cu cambionan riba e regulacionnan y leynan economico di establecimento economico cu ta hopi restrictivo. Pa haci nan hopi mas flexibel facilitado e accesibel pa haci negoshi aki na Aruba no solamente pa e empresario local sino internacional.

Encuanto e desaroyo di nos economia, e mandatario ta reconoce cu aña pasa e no a mustra un crecemento, pero e no tabata negativo tampoco. E aña aki por ta e no ta duna mucho cifra di crecemento tampoco. E ta considera cu economia ta hopi volatil specialmente si nos tin un economia habri. Tin factornan cu bo no tin ningun control riba nan y cu tin un influencia riba bo. P’esey e ta boga pa diversificacion di nos economia riba cuater pilar nobo: tecnologia limpi, logistica, exportacion di conocemento y industria creativo. E ta haya cu e tipo di diversificacion aki ta yuda pa nos economia ta menos vulnerabel di e factornan externo.