Recientemente Bon Dia Aruba a tene un entrevista cu lider partido RED, Ricardo Croes. Partido RED a logra saca un asiento den Parlamento di Aruba durante eleccion di 2017 y a forma parti tambe di e coalicion den gobernacion hunto cu MEP y POR. Durante entrevista, Bon Dia Aruba a dirigi pregunta na Croes tocante e falta di legalisacion di cannabis pa uso medicinal.

Un di e puntonan di enfoke di e partido tabata legaliscion di cannabis pa uso medicinal, pero esaki tabata limita. Bon Dia Aruba a puntra Croes kico, for di su punto di bista, tabata e motibo pakico no a concretisa legalisacion di cannabis den Gabinete Wever-Croes I.

El a splica cu na prome instante el a echt kere den e firmamento di acuerdo di gobernacion y a confia cu e lidernan di e otro partidonan tabata personanan di palabra. El a sigui splica cu e afspraak tabata cu minister di Salubridad, hunto cu minister di Husticia y minister di Asuntonan General lo a keda encarga cu e preparacion di e ley pa present’e den Parlamento di Aruba pa e ser trata, y no den man di su persona ni tampoco den man di minister (di Enseñansa e tempo ey, Rudy) Lampe.

Esey a pone cu RED tabata den un posicion den cual mester a warda minetras ta mira y monitor e procedura cu ta canando pa cu legalisacion. El a destaca cu lamentablemente esey a pone nan realisa cu den e prome dos aña, pa e hecho cu nan tabata e di 12 asiento di e coalicion cu 11 ya caba ta poder den parlamento, su so no por a logra pasa e ley.

Croes a sigui splica cu den parlamento su persona a presenta diferente mocion cu tabata den relacion cu e acuerdo di gobernacion den relacion cu legalisacion cu legalisacion medicinal di cannabis cual a keda acorda den e acuerdo di gobernacion pa diferente motibo, entre otro salud y aspectonan financiero y economico y como otro pilar economico pa e pais.

El a indica cu loke su persona tabata ser informa door di entre otro Oduber y Wever-Croes ta nan tabata bezig, cu e ley ta den proceso y cu tabatin un comision reuniendo, locual tabata corecto berdad y nan tabata haciendo investigacion y tratando cu ley.

“Mi no tabatin motibo pa no kere, mi no tabatin niun motibo pa desconfia,” el a enfatisa.

Croes a sigui splica cu despues, na 2019, momento cu Sra. Daphne Lejuez a retira for di constelacion di MEP, lagando coalicion cu 11 asiento, Croes a indica e tabatin e yabi pa bisa si gobierno ta keda of si gobierno ta bay cas.

El a resalta cu a pesar di e gana cu e tabatin di manda e gobierno cas e momento ey, su prome pensamento tabata pa cumpli cu locual tabatin acorda pa diferente motibo.

El a destaca cu a priminti e pueblo hunto, (pasobra segun el a resalta no ta su so a campaña cu legalisacion di cannabis pa salud of economia, partido POR y MEP tambe,) cu lo legalisa cannabis pa uso medicinal.

Su segundo pensamento tabata cu e credibilidad di su persona politicamente tambe ta ser atacha pasobra aunke tur otro partido, cu excepcion di partido CURPA, a core campaña, el a subraya cu e ta conoci, e ta e cara di legalisacion di cannabis na Aruba y no por kita esey di dje.

Na november Sra. Lejuez a retira y a cuminsa di biaha. Nan tabata bezig caba, pero a cuminsa mesora cu un tiki mas presion pa bisa cu nan kier mira algo tuma luga. Pero despues a yega luna di maart 2020 y riba dia 14 di maart declara pandemia, kiermen e pais a drenta den crisis.

El a remarca cu e ora prome minister no tabata funcionando den capacidad di prome minister so, pero e tabata e opperbevelhebber, un otro posicion di mas poder, pasobra e pais tabata den crisis.

Croes a indica cu esey a pone tambe cu a bin un otro cantidad di prioridad riba mesa y a haci cu e ora ta gobierno ta dicidiendo cu kico ta bay den “fast track”. E tempo ey a pone diferente proyecto di sector primario den “fast track” y hopi a compronde cu na e momento ey legalisacion di cannabis tambe lo ta riba “fast track”.

El a enfatisa cu na maart di e siguiente aña, esta 2021 su persona hunto cu su colega di partido, minister di Enseñansa e tempo ey, Sr. Lampe, a tuma decision cu no lo por wanta e gobierno mas. Ambos a haci bishita na su Excelencia Gobernador di Aruba pa papia y avisele cu nan no por continua sostene gobierno mas.

Algun dia despues, pa Croes su sorpresa segun el a menciona, prome minister Evelyn Wever-Croes ta tira gobierno abao cu e motibo cu (ex-parlamentario di POR, Alan) Howell a bira sospechoso y tabata bao investigacion.

Croes a agrega cu dos siman prome cu esey un concepto di landverordening a yega Parlamento di Aruba riba e tema di legalisacion di cannabis medicinal pa ser trata y te awe, despues cu e gobierno nobo a forma, MEP cu RAIZ no a haci nada tocante e ley aki.

Contestando e pregunta directamente cu Bon Dia Aruba haci pakico for di su punto di bista e ta kere cu Gabinete Wever-Croes I no a logra concretisa e legalisacion di cannabis medicinal, el a subraya cu e Gabinete, cu excepcion di partido RED Democratico “nunca tabatin e intencion di legalisa cannabis.”

El a agrega cu nan intencion tabata desacredita partido RED Democratico, caba cu minister Lampe, desacredita su persona y el a remarca cu casi nan a logra esaki.

Croes a destaca cu despues, ora cu prome minister Wever-Croes duna splicacion di e motibo pakico no a logra concretisa e legalisacion di cannabis, e tabata tira e culpa riba banconan pasobra banconan no lo sostene esaki, den e caso pa e bira un otro pilar economico pa e pais.

Den e siguiente parti di e entrevista, Sr. Croes ta elabora mas riba e punto aki, como tambe otro puntonan di importancia pa su partido.