E decision di gobierno y crisis team di coronavirus/Covid-19, di inclui e sector di construccion den e prome nivel di flexibilidad a cay den bon tera cerca e organisacion Werkgevers Arubaanse Bouwnijberheid (WAB).

E organisacion aki ta representa varios compania di construccion grandi, entre nan ALBO, Bohama, AWM, Croon, Thiel Resources, Thiel Corp. y Bopel Technical Services. “Nos ta contento cu nos por cuminsa,” asina representante di WAB, Wim Hoenink, a declara na Bon Dia Aruba.

E ta haya cu e tempo cu nos ta pasando aden ta duro pa e companianan y tambe pa e trahadonan. P’esey pa WAB mas pronto nan por cuminsa, miho ta resulta pa e trahadonan, companianan y pa pais Aruba. “Nos kier cuminsa mas pronto cu ta posibel,” Hoenink a bisa.

E sector di construccion -segun representante di WAB- por tin miles di trahadonan cu por traha. Pero di otro banda WAB ta compronde cu salud publico ta mas importante cu e sector di construccion.

WAB a tuma nota di e decision di flexibilisacion gradual, caminda for di awe 4 di mei, tur compania di construccion cu kier reanuda nan trabao, mester registra cumpliendo cu un serie di rekisito. Hoenink a laga sa cu nan ta compronde cu tin hopi falta di cumplimento of ilegalidad den mundo di construccion, y gobierno kier wak bon ken ta bay cuminsa traha pa DOW ta sigur cu tur hende of compania cu ta inicia otro siman ta paga nan compromisonan, y WAB ta di acuerdo cu esey.

Den e prome nivel di flexibilisacion cu ta core di dia 4 pa 17 di mei, gobierno ta permiti 15 persona so pa traha incluyendo e personal. Di otro banda WAB ta kere cu tin posibilidad pa manda mas hende traha, pasobra actualmente tin proyectonan grandi cu tin tanto espacio cu no mester tin congestionamento di hendenan. Practicamente e cantidad di 15 persona ta bay pa e hendenan cu ta sinta den oficina, y no lo tin hende pa bay traha den e proyectonan mes.

Representante di WAB, Wim Hoenink ta spera cu den proximo siman nan lo por sinta papia den todo caso cu DOW, y asina purba di yega na un acuerdo riba con nan lo por manda mas hende pa traha den un manera cu ta safe pa henter comunidad.

Sindicato

Recientemente WAB a manda un carta pa e sindicatonan cu ta representa e trahadonan di e sector di construccion, mirando cu un par di luna pasa nan a yega di firma un contract colectivo (CAO).

Den nan carta, WAB ta pidi comprension di parti di sindicato debi na e consecuencianan cu e empresanan asocia na e organisacion aki ta pasando aden pa causa di Covid-19. Nan a bin cu algun medida inicial manera compensa salario cu dianan di vakantie. Tambe dependiendo con e situacion actual lo sigui, nan ta bin cu otro medidanan, manera congelacion of cancelacion di bonus, cortamento riba salario aplicado e regla di ‘no work no pay’, y cortamento riba orario di trabao. E decision aki ta uno individual y ta depende di cada empresa su condicion financiero y laboral.

Encuanto e punto aki, representante di WAB, Wim Hoenink a bisa cu nan tin cu wak con lihe nan lo por sigui cu nan trabaonan, y cu tur hende por sigui labora na pia di trabao. “E ora ey nos por wak kico nos por haci,” el a bisa.

Den e caso aki, el a declara cu WAB a haya ‘hopi bon cooperacion’ di tur trahadonan, y naturalmente nan lo evalua kico nan por haci pa nan tambe. WAB ta spera cu lo mas pronto posibel nan por bay bek na e situacion normal. Pero nan ta consciente cu esey ta bay tuma tempo, manera nan por compronde for di autoridadnan competente. Kiermen no ta posibel ainda pa tur hende por cuminsa traha bek otro siman, sino cu e lo sucede despues di varios siman.