Segun informacion y un documento revela pa medio di comunicacion local, Solo di Pueblo, Franklin Abath, consehero di ex-minister, parlamentario y candidato #29 di AVP, Benny Sevinger, a ricibi un transferencia di $50mil relacion cu proyecto Wanglo Suites.
Ayera durante dia e medio di comunicacion local Solo di Pueblo a revela un prueba, cu segun nan ta incrimina Sevinger y su trahador, Franklin Abath. Ta trata aki di un documento cu ta mustra con e comerciante Venezolano, Sr. Elvio Livi, riba dia 4 di mei 2015 a transferi un suma di $50mil pa cuenta di Franklin Abath, mientras Abath tabata fungi como consehero di Sevinger y traha den su oficina.
Segun e documento, cu ta disponibel riba website di Solo di Pueblo, e nota di transferencia ta indica cu e pago ta pa proyecto di Wanglo Suits. Solo di Pueblo ta cuestiona e motibonan pakico Franklin Abath por a cobra e suma. Igualmente ta destaca cu e mesun suma aki, Mike Eman a ricibi for di otro comerciante Venezolano, Roberto Rincon.
Segun e reporte di Solo di Pueblo, e transferencia tabatin origen na un banco na Spaña, Caixa Ceral, for di cuenta di comerciante Elvio Livi.
Manera e corant local ta indica, Livi no ta desconoci na Aruba ya cu e tin cantidad di interes, edificio, ademas di un proyecto na Eagle Beach, yama Anglo Arena, maske no a keda cla si esaki ta relaciona cu Wanglo Suites.
E medio a destaca cu como coordinador di Sevinger, Abath no por a ricibi placa, y ta cuestiona cu Abath, trahando pa Sevinger, a tuma $50mil di un comerciante Venezolano cu ta involucra den proyectonan di desaroyo comercial.
