No tin otro opcion cu extende e reduccion di 12.6 porciento den salario y beneficio di trahadonan di WEB. Asina Corte a dicidi den e caso cu SIWA a entama contra Gerencia di WEB. Corte Comun mes a formula un relato di prensa riba e caso aki cu tabatin atencion di varios otro sindicato, incluso STA cu ta representa trahadonan di Elmar.

Dos sindicato, SIWA ademas di VWI (sindicato cu ta representa ingeniero y otro miembro di staff) cu hunto ta representa un cantidad grandi di trahadonan di WEB, a lanta ambos un caso separa contra WEB, despues cu e compania a continua cu e reduccion di 12.6 porciento, sin cu tabatin un acuerdo entre trahadonan y sindicatonan cu WEB pa tal. WEB a traspasa e fondonan recauda pa FASE.

Protocol 2020

Sindicatonan, trahadonan y WEB a cera un protocol na Mei 2020 cu tabatin un duracion te 31 di December 2020, unda a palabra e reduccion di 12.6 porciento cu ta bay pa e fondo di FASE, destina pa esnan cu a perde nan trabao debi na e consecuencianan financiero y economico di e pandemia COVID-19.

E pregunta cu e sindicatonan a haci den e caso ta si WEB no por a haci otro cu sigui cu e reduccion di salario aki, despues cu Hulanda a pone como condicion pa e di tres y di cuater tranche di sosten di likides, cu companianan di Gobierno tambe mester impone reduccion cu ta conta trahadonan publico tambe.

WEB ta di Gobierno y mara na condicion di Hulanda

Corte ta haya cu no por evalua e pregunta, si Pais Aruba cu hunto cu Utilities a uni na banda di WEB den e procedura, mester acepta e condicionnan mara na e di tres y di cuater tranche di sosten di likides, di e landspakket acorda cu Hulanda. Corte ta sali afo di e validez di e condicionnan aki.

Corte como tal a dicidi cu WEB, como compania di utilidad privatisa, mester keda reconoci como un entidad alia na Gobierno, y como tal, ta cay bao di e condicionnan menciona pa Aruba por a ricibi e di tres y di cuater tranche di sosten di likides. Esey ta nifica cu WEB pa medio di Utilities NV ta den man di Gobierno y ta carga un tarea publico importante pa percura cu Aruba tin acceso na awa y coriente. Otro cu cualkier compania regular y empresarionan, WEB, como monopolista, tin menos consecuencia economico y financiero cu e crisis di COVID-19 a trece cune.

WEB no por haci nada otro

Y awor cu Corte a determina cu e condicionnan impone pa Hulanda ta conta pa WEB, anto e compania no por haci nada otro pa aplica e reduccion di 12.6 porciento pa 2021 tambe. Segun Corte, e medidanan special di ley laboral di Aruba cu ta conta pa circunstancianan imprevisto, manera e pandemia di COVID-19, ta haci cu ta rasonabel pa bolbe adapta e condicionnan di laboral palabra cu trahadonan riba e punto aki den forma temporario. Den caso di e prome protocol, di 2020, a haci palabracionnan conta ehecuta e reduccion di 12.6 porciento. Te cu awor, no tin e palabracionnan aki ainda pa 2021. Partidonan por dicidi pa haci palabracionnan riba e punto aki, segun Corte.

Sentencia

Mester bisa cu Hues mr. Keltjens tabata hopi amplio den su sentencia ayera. A reconoce e derecho di trahadonan pero tambe di e circunstancianan special di e pandemia cu ainda ta vigente pa 2021. Hues a bisa cu no tin nada pa indica cu e situacion a bira miho pa Gobierno y Aruba na 2021. Turismo ta na 30 porciento, Fundacion pa nos Comunidad ta yudando 4500 famia ainda cu cuminda, Cruz Cora a yuda como 8000 famia, 25 mil trahado ainda ta ricibi subsidio di salario y mas di 11 mil persona a perde nan trabao y ta depende di 950 florin pa luna for di e fondo di FASE. Expectativa ta cu e cantidad di desempleo unicamente lo sigui subi e proximo lunanan.

Como tal, mirando e circunstancianan aki, Hues no ta considera cu e CAO cu tin awor aki ta pisa mas cu e situacion grave di Aruba. Lo no tin un otro decision tampoco si mester dicidi pa bay bringa e caso den Corte di Prome Instancia, mr. Keltjens a bisa. E sentencia a indica tambe cu cada partido, pues WEB, Gobierno, Utilities, VWI y SIWA lo carga nan propio gasto pa e caso aki.