KRALENDIJK – Dokter di cas, dentista, un botica y un laboratorio na Boneiro no tin un contract cu e compania local cu ta procesa sushi Selibon. Cu consecuencia cu un trato special di nan sushi (bio)medico no ta garantisa.
Cu esaki e munisipio extraordinario Hulandes no ta cumpli cu e directivanan internacional cu ta na vigor pa trato y procesamento di sushi biomedico y infeccioso.
Bou di sushi (bio)medico y infeccioso ta cay sanger (cu no a seca), material contamina, verband sushi, djente, sushi kimico manera amalgama, parti di curpa. Tur ta sushi cu ta cay den categoria dos y tres di material peligroso.
Ki riesgo di siguridad, di salubridad y di medio ambiente esaki ta trece cu ne specificamente y con por ta cu e practicanan ainda no tin contract, no ta cla. Un peticion pa un reaccion riba esaki di Selibon y gobierno local a keda sin contesta te ainda.
Hangua uza
Na Centro Medico Boneiro, un di e shete oficinanan di dokter di cas na e isla, un trahado ta conta cu ta hangua uza so nan ta tira afo den un baki di tira sushi special color cora. Sobra di nan sushi medico ta tira den bari di sushi hunto cu otro sushi.
Mucho caro
Un otro instancia, cu ke keda anonimo. ta declara cu e ta habri pa cera un contract, pero e ta haya cu ‘un contract asina ta Costa hopi cen’. Segun un plan di enfoke di Selibon di 2013 e instancianan di salubridad cu actualmente no tin contract tabata produci 6.436 kilo di sushi biomedico y infeccioso pa aña. Fundacion Mariadal e tempo ey tabata produci anualmente mas o menos 6.100 kilo di sushi peligroso.
Politica: ‘mester haci lihe
Den un entrevista di Ret Karibense riba 19 di februari cu diputado James Kroon, cu tin Selibon tambe den su cartera, Kroon ta conta cu mester haci lihe pa e practicanan aki tambe cera un contract. Te awe no tin claridad tocante esaki.
Salubridad publico
Na juli di 2017 na Boneiro a cuminsa kima sushi biomedico y infeccioso. Antes tabata dera esaki na landfill hunto cu sobra sushi, despues den baki di sushi special blauw y saco cora .
Segun Cherel Kwidama, coordinado Calidad, Arbo, Medio Ambiente y Siguridad di Trabou na Fundacion Mariadal e instancia internamente ta parti e sushi peligroso aki segun regla special for di Hulanda con ta trata cu sushi di hospital.
Obheto skerpi manera hangua, material contamina, parti di curpa y organo, placenta, sushi likido, remedi, ta colecta separa, cera hermeticamente den material special pa warda cos y aparato cu tin un marca di keur di siguridad di Nacionnan Uni. “Esaki ke men cu ta dificil pa haci daño of lek”, Kwidama ta splica.
Fundacion Mariadal so tin contract
Selibon tin un contract si cu e instancia di salubridad Fundacion Mariadal. E instancia aki ta consisti entre otro di un hospital, un policlinica, un laboratorio, un centro di dialisa, cas di cuido, y boticario. Fundacion Mariadal ta produci sushi cu ta cay den e categoria di mas halto di material peligroso: categoria 1. Motibo pakico Randy Leonora, operation manager di Selibon como prome a cera un contract.
