Dialuna 22 di mei a tuma luga e presentacion di e resultado di e estudio riba e impacto economico di ‘Airbnb’ na Aruba. Na encargo di Minister di Economia, Comunicacion y Desaroyo Sostenibel, Geoffrey Wever, Economisch Bureau Amsterdam a realisa e estudio aki, ken a presenta e resultadonan na stakeholders y publico.

Vacation Home Rentals (VHR) ta existi desde 1995. E industria aki a crece rapidamente desde e tempo ey. Na 2008 dos studiante di San Francisco a funda Airbnb cu originalmente tabata destina pa huur espacionan liber den cas di hende y esaki tabata sirbi como ehemplo di economia colaborativo. Aworaki e ta plataforma mas grandi di su tipo cu miyones di cas disponibel full rond mundo.

E rapport aki ta indica cu pa loke ta trata e topico aki na Aruba, Gobierno di Aruba mester un imagen cla di e bentaha- y desbentahanan di VHR pa implementa adecuadamente un politica pa sigui. E sector di VHR a crece full rond mundo y na Aruba no ta un excepcion. E crecemento aki a presenta e pregunta di e pro y contra na Aruba di e sector aki.

E rapport ta analisa e literatura academico, e contexto di Aruba y practica di politica internacional. E rapport ta usa e literatura academico internacional pa pinta e liña di e efectonan socioeconomico di VHR. Den e rapport ta traduci tambe e efectonan socioeconomico procedente di e literatura internacional na e contexto di Aruba.

Den edicion di Bon Dia Aruba di diaranson, a elabora ariba e puntonan di mayor oferta di alohamento, diferente tipo di alohamento, oferta flexibel, desaroyo di areanan residencial y casnan retira for di mercado, puntonan cu ta wordo afecta pa VHR.

Menos cumplimento

Un otro punto cu e rapport ta elabora riba dje ta e punto di menor cumplimento. Algun destino tin rekisito minimo of ningun rekisito pa VHR pa loke ta trata impuesto, medidanan di salud y seguridad y seguronan. Incluso, si e rekisitonan aki ta existi, e aplicacion di esaki ta un desafio. Esaki tin consecuencia pa e seguridad di e turistanan y ariba e ingreso fiscal di e isla.

Ademas, e competencia entre hotelnan tradicional y VHR no ta husto si e regulacionnan pa VHR ta menos estricto of si nan no ta wordo aplica.

Atractivo pa turista

Vakantie den VHR, e rapport ta remarca, ta diferente na esnan den hotelnan tradicional. Prome cu tur cos, VHR ta atractivo pa turista ya cu nan ta mas economico, specialmente si e tarifa di hotelnan tradicional ta relativamente halto. Prijsnan abao por hiba na estadia mas largo.

Turista ta keda mas tempo den alohamento cu no ta hotel en general y hopi di esnan cu a contesta un encuesta realisa na 2014 a coincidi cu VHR ta permiti nan biaha cu mas frecuencia y keda mas tempo na un destino.

E rapport ta enfatisa cu aunke e ta tentado pa conclui cu prijsnan mas abao ta atrae turistanan cu ta gasta poco y tin ingreso mas bao, e economia colaborativo en general den realidad ta atrae personanan cu ingreso relativamente halto.

Na di dos luga, e turistanan tin e oportunidad di tin interaccion cu e doño di e propiedad, un persona local, y tin un experiencia mas autentico, specialmente ora cu e luga unda e turista ta keda ta un camber den e cas mes di e doño.

E interaccion social y e autenticidad ta aumenta e participacion den e actividad. E 53% di e encuesta di 2014 a afirma cu VHR a permiti nan realisa mas actividad.

Segun e rapport ta señala, algun costo y beneficio di VHR ta wordo asumi of disfruta pa e destino, otro nan ta mas aplicabel na turistanan stranhero of inversionista. Por ehemplo, e argumentonan tocante e turismo excesivo, e desaroyo di areanan residencial, e mercado di vivienda y e cumplimento ta aplica principalmente na e destino. E argumento tocante vakantie menos costoso y mas autentico ta ser disfruta principalmente pa e turistanan.

Algun otro consideracion, manera e aumento di e actividad economico, e competencia di e hotelnan, e ingreso di e propietarionan di vivienda y e oferta flexibel ta wordo aplica na e destino tambe, pero e medida den cual e publico en general ta beneficia of sufri ta depende di e propiedad di VHR y di e resto di e industria turistico.

Caracteristica relevante di un destino

E impacto positivo y negativo di VHR ta depende di e caracteristicanan di un destino. E rapport ta aborda seis consideracion: tipo di propiedad, cantidad di propiedad di e doñonan, popularidad di e destino, escasez di vivienda, actitud di e poblacion local y ripiticion di turismo.

Tipo di propiedad

E oferta di VHR ta consisti tanto den propiedadnan completo como tambe cambernan priva of comparti. E rapport ta subraya cu e composicion di e oferta di VHR ta afecta diferente argumento. Na prome luga, e argumento cu e publico en general por obtene algun ingreso adicional ta aplica principalmente na cambernan priva of comparti den e cas di e doño.

Na di dos luga, e efectonan di e mercado di vivienda ta specialmente grave ora cu ofrece casnan completo na turistanan. Y na di tres luga, por tin mas molester di parti di turista ora cu e propietario no t’ey.

Casnan completo ta constitui e parti mas grandi di e oferta di VHR. Alrededor di 70% di turista cu a haci uso di Airbnb den un muestra di 43 ciudad Europeo a reserva casnan completo.

Cantidad di propiedad di e doño

Segun e rapport ta indica, VHR ta yuda e publico en general cubri e gastonan di vivienda. Den e caso ey, por spera cu e mayoria di doñonan tin un solo propiedad. Den un muestra di 43 destino Europeo, 55% di e propiedadnan di Airbnb tabata administra pa doñonan cu diferente propiedad.

Doñonan cu mas cu un propiedad, segun algun encuesta, tin mas ingreso compara cu doñonan cu tin un solo propiedad.

Popularidad di e destino

E destinonan turistico desaroya y madura ta experimenta diferente costo y ta benefecia di VHR. E rapport ta señala cu na prome luga ta mas probabel cu VHR ta genera turismo excesivo ora cu e destino ya a yega, of ta cerca di yega, su capacidad turistico. Di dos, ora cu e turismo ainda ta desaroyando y creciendo, e competencia entre hotelnan y VHR probablemente ta mas severo. Y di tres, e bentaha pa turistanan cu VHR ta mas barata ta aplica principalmente na destinonan cu hotelnan mas caro.

Escasez di vivienda

Si disponibilidad y accesibilidad no ta suficiente na un luga, e mercado di vivienda ta mas probabel cu no por soporta e VHR.

Actitud di poblacion local

Tin indicacion cu e regulacionnan di VHR cu ta aplica na e destinonan ta relaciona cu e precepto di e poblacion ariba si VHR ta genera aumento di prijs di huur of no.

Ripiticion di turismo.

E patronchinan di ripiticion di e industria turistico di un destino ta importante pa e argumento cu si e suministro flexibel di VHR por acomoda turistanan adicional durante e temporada halto (high season).