Terbeschikkingstellin miho conoci como ‘TBS’ ta un medida cu un hues ta duna pa protege comunidad contra personanan cu ta comete crimennan mientras nan ta padece di un trastorno mental grave of di falta di desaroyo cognitivo pa distingui kico ta bon y kico ta malo.

Ta existi dos tipo di TBS, un cu ta mara na condicionnan y otro cu ta tratamento obligatorio

E condicionnan cu hues ta tuma na cuenta pa un persona haya TBS ta cu e autor a comete un delito cu un castigo di prison di por lo menos 4 aña of mas, e autor tabata padece un trastorno di personalidad, psicosis of discapacidad intelectual ora el a comete e delito y e ultimo condicion ta cu e siguridad di e otronan ta den riesgo debi cu e autor lo por comete e mesun tipo di crimen un biaha mas.

Na Aruba e prome biaha den historia cu un hues a duna como castigo TBS tabata na aña 2017 ora Gabriel M. cu tabata padrastro di dos mucha chikito (Rishandroh Anastacia y Rishandrick E. Frans) a wordo haya culpabel pa maltrata nan cu e consecuencia cu nan a fayece, el a wordo sentencia pa 15 aña di prison y TBS obligatorio, na e momentonan aki te ainda ni Aruba ni paisnan di Caribe Hulandes ta conta cu un centro psikiatrico forensico

Segun rapport psicologico di Gabriel M. cu a wordo presenta na corte ta indica cu “e ta sufri di un of mas trastorno di personalidad, e tin sintomanan di psicopata grave y no tin empatia ni remordimento, tampoco tin control riba su mesun comportacion, su problemanan di comportacion ta bin for di infancia, e ta mustra un persona impulsivo y iresponsabel cu no ta asumi ningun responsabilidad pa su accionnan”, nan a confirma cu e tin e probabilidad di comete e mesun actonan castigabel aki si e no ta haya tratamento adecua pa su problema di salud mental.

A base di e sentencia di hues di Corte di Prome Instancia cumpliendo cu e dos tercera parti di su castigo y pa bon comportacion, e por bin na remarca pa su libertad condicional (voorwaardelijke invrijheidstelling (v.i) ) pero, obligatoriamente Gabriel M. tin cu drenta den un centro psikiatrico forensico .

E caso di Gabriel M. ta un di e dos caso cu a shock comunidad di Aruba pa loke ta trata crimennan cruel. Otro caso cu tambe a hala atencion a tuma lugar na april di aña 2008 unda cu intencionalmente y di manera premedita Eugene L. a tuma e decision di mata su mama, su tata y su ruman. Segun Eugene L. mes a indica, e tabata convenci cu su mama, tata y ruman kier a haci’e daño.

Mientras su tata tabata preparando e BBQ den e cura di cas Eugene L. a coy un pida palo, el a sinta den e sofa paden den e sala principal y un rato despues el a sali pafo y a maltrata su tata cu e pida palo asina fuerte cu consecuencia fatal. Despues di un rato el a lora e curpa di su tata cu un clechi y el a hink’e den auto.

Minuutnan despues cu el a caba di asesina su tata, su ruman cu a caba di lanta for di soño a bay sinta den sala principal pa wak TV, na unda cu Eugene L. a drenta y cu e mesun pida palo el a maltrata su ruman te cu a causa su morto.

Despues el a bay pafo, coy e curpa di su tata morto for di e auto, na unda cu el a pone e curpa di su ruman y su tata sin bida den e sala principal di e cas, el a sinta banda di e dos curpa wardando riba su mama regresa for di trabao pa nan come, na e momento cu su mama a yega el a atak’e y a lag’e sin signo vital. Deliberadamente y premedita el a pone fin na e bida di casi henter su famia.

Na e momento ey, segun rapport psikiatrico Eugene L. tabata sufri di schizofrenia di tipo paranoico, esaki ta un condicion cronico cu ta supone cu tabata existi na e momento cu el a comete e actonan aki, e mesun condicion a wordo manifesta ora cu un par di tempo prome cu e asesinatonan Eugene L. tabata hopi indigna, segun su percepcion, cu su mayornan a haci un peticion pa por ponel’e bao curatela pa preveni cu e por a bende su cas.

Igualmente e rapport a señala cu Eugene L. tambe tabata sufri di delirio, di un banda e tabata indigna pasobra segun su percepcion, su mayornan lo kier a deshered’e y entre otro, el a expresa cu e tabata pensa cu su mayornan kier a mand’e Santo Domingo pa su problema di adiccion di droga unda cu nan ta bay dun’e remedinan robes, segun su percepcion, nan kier a hink’e den un circuito di personanan homosexual y cu su mayornan ta hendenan mafioso cu tin e plan pa elimin’e.

E conclusion di e psikiatra: E mundo psicotico di e pensamento di Eugene L. tabatin un gran influencia den su accionnan cu a conduci na comete e asesinatonan di su mayornan y su ruman.

E tempo cu Eugene L. a wordo sentencia, e medida di TBS no tabata hancra den codigo penal di Aruba, esaki ta significa cu Eugene L. no a haya TBS como castigo, solamente a dun’e castigo di prison. Corte su opinion ta cu mirando e gravedad di e crimennan y e riesgo hopi halto cu e por bolbe comete e mesun actonan aki, nan a dun’e e castigo mas halto di 20 aña di prison.

Algun potret ta cortesia di 24ora