Segun rapport internacional di Estado di Adaptacion Climatico: Habitat natural y medio ambiente marino di Aruba a keda mayormente desprotegi y sobre-explota pa mas cu 100 aña

Recientemente e International Panel on Deltas, Coasts and Islands (IPDC) a lansa e rapport internacional ariba Estado di Adaptacion Climatico. E rapport aki a conta cu contribucion di islanan di Caribe Hulandes y otro paisnan grandi rond mundo. Den e rapport aki ta brinda un analisis y ta elabora ariba e resilencia climatico di Aruba.

E rapport ta indica cu e nacemento di e industria di turismo di Aruba ta data di 1934 ora cu e prome cas di huesped a habri na Oranjestad. For di añanan 1960, e politica di turismo di e isla a wordo dirigi pa atrae hotelnan grandi y solicita inversionnan internacional pa construccion di resortnan di turismo y expansion di infrastructura; un politica di turismo cu e isla ta mantene te dia di awe.

E documento ta resalta cu como un isla chikito cu un economia habri, Aruba ta altamente expuesto y vulnerabel pa diferente shocknan externo, incluyendo, pero no limita na, shocknan financiero-economico y geopolitico, como tambe shocknan ambiental y climatico. Den tema di e exposicion y vulnerabilidad pa cambio climatico, Aruba ta expuesto na ambos shocknan climatico, como tambe cambionan climatico lento.

Segun e rapport ta remarca, volatilidad climatico y patronchinan di tempo extremo a aumenta durante e ultimo siglo pasa. Durante e ultimo cinco decada, e intervalo di tempo entre horcannan grandi a bira menos, di 80 pa un estimado di 6 pa 8 aña. Eventonan di clima extremo durante e ultimo 20 aña ta coincidi cu horcan y tormentanan tropical mayor den Caribe, incluyendo por ehemplo, Joan (1988), Bret (1993), Lenny (1999), Ivan (2004), Felix (2007), Omar (2008), y Matthew (2016).

Aunke Aruba no tabata den e caminda directo di e horcannan aki, e efectonan di tormenta consecutivo a causa inundacion significante cu promedio di awasero di 795 mm; casi tres biaha mas cu e promedio anual di 274 mm na Aruba. Di otro banda, e estudio tambe ta indica algun periodo di sekia despues di e cambio di siglo.

Ademas, e rapport ta agrega, e registro di censo nacional di CBS na 2016 ta indica cu durante e ultimo dos decada, incidentenan di inundacion residencial y comercial a aumenta substancialmente cu 82%. Analisis di data espacial ta mustra cu un calculacion di 46% di tur hogar ta localisa den un area residencial costero cu nivel di densidad cu ta surpasa 1.000 residente pa km², como tambe no menos cu 10.000 turista pa km². E zonanan costero densemente habita ta propenso pa mereanan di tormenta y inundacion.

E documento ta señala cu e combinacion di presion climatico ta varia di aumento di temperatura, tanto riba tera como superficie di lama, pa eventonan di clima extremo, marea di tormenta, inundacion di tera debi na aumento di yobida y nivel di lama, su impacto ta wordo complica pa factor nan no-climatico manera perdida di biodiversidad, degradacion ambiental, acides di ocean, blankiamento y descomposicion di coral, polucion di desecho, y contaminacion di awa.

E ta enfatisa cu aunke zonificacion regional y costero inicial y area marino proteha a wordo adopta den 2019, e habitat natural y medio ambiente marino di Aruba a keda mayormente no proteha y sobre-explota pa mas cu 100 aña despues di e explotacion di e industria di fosfaat, oro, y refinamento di azeta durante añanan 1920.

E rapport ta subraya tambe cu archivo ambiental ta indica cu hopi di e flora y fauna endemico di Aruba, incluyendo bestia salvahe, a bay extinto of ta na peliger inminente di extincion. Den combinacion cu e deforestacion structural y dragamento di e ecosistemanan marino y costero for di e añanan 1940, e aumento lento y consistente den temperatura di awa di lama ta parcialmente responsable pa e perdida di bida marino y biodiversidad marino.

Ademas, aunke no tin dato historico significativo disponibel, e stress creciente ariba e ecosistema marino local tambe ta debi probablemente na e acides constante di e awa marino–resultado di e derrame y goteamento di azetaden pasado, filtracion di awa contamina, y e desecho costero no trata – como tambe e densidad di poblacion creciente y aumento di urbanisacion costero.

E documento ta indica cu den pasado varios plan sectorial a wordo desaroya riba aspectonan specifico di cambio climatico, incluyendo produccion di energia renobable, pero no tin un plan nacional integra pa adaptacion climatico y resiliencia climatico. E Conseho Nacional di Resiliencia Climatico di Aruba (NCRC), cu a wordo lansa formalmente riba 22 di April 2024 (Dia di Tera), ta encarga cu desaroya e Plan Nacional di Adaptacion pa Aruba.

Dos otro iniciativa importante tambe a wordo anuncia mesun dia cu mester ser coordina pa e NCRC: un Evaluacion di Indice di Riesgo y Vulnerabilidad di Clima y Ocean pa e Stimson Institute, como tambe e Atlas di Impacto Climatico pa Aruba, conduci pa Climate Adaptation Services.

Segun e rapport ta sigui splica, tin varios enlace entre awa, adaptacion climatico y otro plannan. Por ehempel, “Build with Nature Policy” por wordo revisa y fortalece cu strategia di adaptacion climatico relaciona cu awa pa zonificacion, urbanisacion y conservacion di naturalesa. Ademas, Aruba a cuminsa cu formulacion di un Strategia Nacional di Seguridad unda intensificacion di mitigacion y adaptacion climatico bao di e Crisis Management Office ta wordo atendi.

E Plan Strategico Nacional (NSP; Nos Plan, Nos Futuro, 2020) ta un plan nacional coordina pa e Departamento di Asuntonan Economico, Comercio y Industria. E rapport ta señala cu den e NSP, e capitulo riba Maneho di Recurso Natural ta trata, entre otro topiconan, accionnan di adaptacion climatico y e capitulo di Energia Sostenibel ta trata, entre otro topiconan, accionnan di mitigacion climatico.

Asina mes, e documento ta agrega, e master plan di Aruba “Repositioning Our Sails” ta presenta e modelo y roadmap di Aruba pa resiliencia economico, incluyendo e transicion pa un economia resistente na clima, delineando e accionnan necesario pa, por ehempel, establece un agenda nacional pa accion y resiliencia climatico, incluyendo un politica nacional y midimento di riesgo, conserva y restaura recurso ambiental y ecologianan marino, como tambe, pa establece y impone codigonan di construccion resistente na clima y directivanan pa infrastructura. E establecimento di e NCRC ta un resultado directo di e master plan “Repositioning Our Sails”.

Sinembargo, e ta subraya, for di un perspectiva di financiamento y inversion climatico, tanto NSP como e master plan falta un inclusion cla y explicito, definicion y midimento di criterio y indicador di “Environment-Social-Governance” (ESG) y “Principles of Responsible Investment” (PRI).

Consecuentemente, e rapport ta enfatisa, programa- y proyectonan no ta wordo evalua y clasifica den terminonan di nan riesgo y impacto climatico, ni den terminonan di nan contribucion pa resiliencia y adaptacion climatico, manera cu Banco Mundial ta recomenda.

Asina mes, contrario na por ehempel e Declaracion di Impacto Adverso Principal (PAI) cu ta wordo rekeri den e Union Europeo, of e divulgacion climatico pa e Banco Central Europeo (ECB) y e Task Force riba riesgo y impacto relaciona cu clima (TCDF), actualmente na Aruba, no tin un marco legal ni rekisitonan pa explicitamente inclui, presenta y divulga impacto y riesgo relaciona cu clima, ademas di e divulgacion financiero relaciona cu clima.