Den un articulo den nos edicion di ayera, a trece dilanti informacion di e rapport di TNO tocante transicion di energia na Aruba, Corsou y Sint Maarten, cual minister di Asuntonan Economico y Clima di Hulanda, Rob Jetten, a pidi. Minister Jetten a presenta e presenta e rapport aki na Tweede Kamer.
Den e rapport aki, TNO ta describi e suministro actual di electricidad na e paisnan, e plannan di e paisnan pa logra mas sostenibilidad den produccion di electricidad y mobilidad y na mesun momento ta duna un bista di e opcionnan pa logra un suministro di energia completamente renobabel na e paisnan.
Un di e punto cu a bin dilanti den e rapport ta e politica di energia nobo y topico di e acuerdo di LNG. Manera ta conoci na 2020, ministerio di Labor, Energia y Integracion a presenta un politica nobo di energia. E politica nobo di energia ta dirigi pa un provision di energia cu ta barata, confiabel y sostenibel cu ta busca pa ta lo menos dependiente di factornan externo.
E politica ta busca pa reduci e emision di CO2 per capita pa 45% pa aña 2030 compara cu aña 2010, sin conta cu e efecto di ciere di e refineria. TNO ta indica cu e reduccion di CO2 aki mester sucede door di energia mas eficiente pa negoshi, casnan, produccion di electricidad y awa. Tambe, e politica ta inclui plan pa cambia pa LNG den lugar combustibel pa produccion di electricidad.
Den 2021, Gobierno di Aruba a firma un acuerdo pa termino largo cu Eagle LNG pa e suministro di LNG pa Aruba. E LNG mester a drenta na e tereno di e refineria, e mester wordo gasifica pa e wordo transporta via tuberia pa e tereno di WEB. E tuberia lo sigui mas o menos e mesun ruta di e tuberia di combustibel cu ta sali di e refineria pa WEB. Pa final di 2023, Eagle LNG ainda ta tabata busca e permisonan necesario pa por realisa e proyecto.
TNO ta remarca cu tin tiki informacion cu ta publicamente conoci tocante e acuerdo di suministro entre WEB y Eagle LNG. Segun entrevistanan cu nan realisa pa e rapport aki, tin un acuerdo di ‘take-or-pay’ pa un cantidad di LNG cu ta bal pa mas o menos 50% di e produccion di electricidad y cu e acuerdo ta dura 20 aña. Esaki ta nifica cu te 2046 of 2047 tin costonan adicional pa aumenta e porcentahe di electricidad renobabel riba e 50%, paso LNG mester paga aunke si tin menos. Cu e aumento di demanda di electricidad y e quota minimo constantemente di LNG, e porcentahe di energia di renobabel por surpasa e 50%.
E politica di energia di 2020 tambe ta dirigi pa aumenta e porcentahe di electricidad renobabel pa 50% pa 2030 y na 90% no mas laat cu 2050. Energia di biento ta keda e fuente principal di energia renobabel cu un porcentahe di mas o menos 45% di e produccion di electricidad cu ta consisti di un combinacion di un parke di biento nobo y reemplasa e turbinanan di e parke di biento actual na Vader Piet cu turbinanan nobo y mas grandi. Utilities Aruba NV y WEB ta confirma cu esaki ta ainda e strategia di Aruba.
Pa loke ta e parke di biento nobo ta mira esaki na Rincon, un localidad cerca e parke di biento actual na Vader Piet. E rapport ta indica cu e localidad ta afo di e parke nacional y na mas di 850 meter leu di area habita, cu ta e distancia minimo cu e politica di Aruba ta e exigi. E bentaha adicional cu tin ta cu e mesun trayecto entre WEB y e parke di biento na Vader Piet por wordo usa, pero tin mester un of dos kabel nobo pa e capacidad di transporte adicional.
Na augustus 2022, Utilities Aruba NV a invita mercado pa expresa nan interes pa desaroya, maneha y suministra electricidad cu e parke di biento nobo. E acuerdo di suministro di e parke di biento na Vader Piet a prolonga te 2029, door di cual e reemplaso di e turbinanan existente pa turbinanan nobo y mas eficiente no ta wordo spera te 2029. E dos parkenan di biento conhuntamente lo tin un capacidad di rond di 90 MW pa aña 2030.
TNO ta remarca cu e idea ta cu e parti restante di energia renobabel lo wordo suministra pa energia di solo, cu un expansion di capacidad central di produccion cu 15-20 MW. Nan ta indica cu tin un preferencia di e compania di utilidad pa solar panels central cu bateria pasobra e integracion por wordo controla hopi bon y inversion den e red di electricidad por ta limita.
Ta spera tambe cu e porcentahe di solar panels central riba dak ta sigui crece debi na e tendencia actual y e ambicion di e minister di Asuntonan Economico, Comunicacion y Desaroyo Sostenibel pa logra un transicion di energia inclusivo.
E rapport ta agrega cu e minister kier tambe pa e casnan cu no tin e medionan financiero pa inverti den solar panels, por participa. TNO ta señala cu iniciativanan manera esun di hospital Horacio Oduber pa apoya e empleadonan cu instala solar panels lo resulta den mas crecemento di e capacidad instala di solar panels riba dak.
Como ehempel, e rapport ta splica, cu si tur 1100 empleado usa e acuerdo y instala 5 kW di solar panels, lo tin un total di 5.5 MW di solar panels PV. Si tur empleado instala e maximo di 10 kW pa cada cas, esaki lo aumenta te 11 MW. Pa comparacion, si tur 39 mil cas na Aruba instala 10 kW di solar panels, lo tin un total di 390 MW instala, cual ta hopi mas cu e peak di demanda na e isla.
TNO ta subraya cu mientras e acuerdo di LNG cu a wordo firma cu Eagle LNG ta causa desacuerdo entre e ministerionan di gobierno y e tres compania estatal, e acuerdo aki por determina grandemente e futuro di e suministro di energia di Aruba, e gastonan di energia pa e habitantenan, e seguridad di suministro y sostenibilidad. Pero, teniendo den consideracion e importancia di esaki, nan ta resalta, ta logico di spera un transparencia mas grandi y un miho convenio entre gobierno y e tres companianan estatal (Utilities, WEB y ELMAR).
