Un rapport nobo di Organisacion Internacional di Labor (ILO), “Heat at work: Implications for safety and health” ta adverti cu mas trahador ta ser exponi na stress di calor na nivel mundial. E datonan nobo ta revela cu regionnan anteriormente no custuma na calor extremo ta bay enfrenta riesgo aumenta, mientras cu trahadornan na climanan ya cayente ta bay confronta condicionnan mas peligroso ainda.

Stress di calor (heat stress na Ingles) ta un asesino invisible y silencioso cu rapidamente por causa malesa, heatstroke of hasta morto. Cu paso di tempo, e tambe por conduci na problemanan serio di curason, pulmon y riñon pa trahadornan, e estudio ta subraya.

En general, e rapport ta indica cu trahadornan na Africa, estadonan Arabe y Asia y Pacifico ta exponi na calor excesivo mas frecuentemente. Na e regionnan aki, 92.9 porciento, 83.6 porciento y 74.4 porciento di e forsa laboral ta afecta, respectivamente. E cifranan aki ta riba e averahe global di 71 porciento, segun e cifranan mas recien disponible (2020).

E condicionnan laboral cambiando mas rapido ta mira na Europa y Asia Central, segun e rapport. Di aña 2000 te 2020, e region a registra e aumento mas grandi den exposicion na calor extremo, cu e proporcion di trahador afecta aumentando cu 17.3 porciento, casi dobel e aumento averahe global.

Aumento mas grandi di herida pa motibo di calor na continente Americano

Mientras tanto, continente Americano y Europa y Asia Central ta experimentando e aumento mas grandi den herida na trabao causa pa stress di calor desde aña 2000, cu aumento di 33.3 porciento y 16.4 porciento respectivamente. Esaki ta posiblemente pa motibo di temperaturanan mas cayente den regionnan unda trahadornan no ta custuma cu calor, e rapport ta nota.

E rapport ta calcula cu 4,200 trahador globalmente a perde nan bida pa olanan di calor na 2020. Den total, 231 miyon trahador tabata exponi na olanan di calor na 2020, marcando un aumento di 66 porciento for di aña 2000. Sinembargo, e rapport ta insisti cu nuebe di cada 10 trahador na mundo tabata exponi na calor excesivo fuera di un ola di calor, y ocho di cada dies lesion ocupacional for di calor extremo a tuma lugar fuera di olanan di calor.

Calor excesivo ta creando retonan sin precedente pa trahadornan rond mundo henter aña, no solamente durante olanan di calor intenso.

“Mientras mundo ta continua lucha cu aumento di temperatura, nos mester protege trahadornan for di stress di calor henter aña. Calor excesivo ta creando retonan sin precedente pa trahadornan rond mundo henter aña, y no solamente durante periodonan di olanan di calor intenso,” segun director general di ILO, Gilbert F. Houngbo.

Medidanan mehora di seguridad y salud pa preveni lesion pa calor excesivo na pia di trabao por yuda spaar $362 biyon globalmente – den perdida di entrada y gasto di tratamento medico – mientras e crisis di stress di calor ta acelera, afectando regionnan global di manera diferente, e estudio ta enfatisa.

Calculacionnan di ILO ta mustra cu economianan di entrada abao of medio, en particular, ta esunnan mas afecta, ya cu e costo di lesion pa calor excesivo na trabao por alcansa alrededor di 1.5 porciento di GDP nacional. “Esaki ta un asunto di derechonan humano, di derechonan di trahador, y un asunto economico, y economianan di entrada medio ta cargando e peso mas grandi. Nos mester plannan di accion pa calor henter aña y legislacion pa protege trahadornan, y un colaboracion global mas fuerte entre expertonan pa harmonisa evaluacionnan di stress di calor y intervencionnan na trabao,” Houngbo a agrega.

E impacto di calor riba trahadornan rond mundo rapidamente ta birando un problema global, y uno cu ta rekeri accion. “Si tin algo cu ta uni nos mundo dividi, ta cu nos tur ta sinti e calor cada bes mas. Tera ta birando mas cayente y mas peligroso pa tur hende, tur caminda. Nos mester lanta pa e reto di aumento di temperatura – y aumenta proteccion pa trahadornan, basa riba derechonan humano,” secretario general di ONU, Antonio Guterres, a splica.

E rapport di ILO ta evalua medidanan legislativo na 21 pais rond mundo pa haya caracteristicanan comun cu por guia e creacion di plannan efectivo pa seguridad pa cu calor na trabao. E tambe ta describi e conceptonan clave di un sistema di maneho di seguridad y salud pa protege trahadornan for di lesion y malesa relaciona cu calor.

E hallazgonan ta construi riba un rapport anterior, publica na april ultimo, cu a indica cu cambio di clima tabata creando un “cocktail” di peligernan serio pa salud pa alrededor di 2.4 biyon trahador cu ta exponi na calor excesivo. E rapport di april a indica cu calor excesivo riba su mes ta causa 22.85 miyon lesion ocupacional y e perdida di 18,970 bida cada aña.

Pa region di America, e rapport ta indica cu e region aki a mira e proporcion aumentando mas rapido di lesion ocupacional desde aña 2000, cu un aumento di 33.3 porciento. Continente Americano tambe tin un proporcion significante di lesion ocupacional pa motibod i calor excesivo, cu 6.7 porciento.

Clima na Aruba

Segun WorldMetrics, Aruba tin un temperatura averahe di 28°C durante aña. E lunanan mas cayente ta september, october, y augustus, cu temperaturanan averahe alcansando 30°C. E luna mas fresco ta januari, cu un temperatura averahe di 26°C. Ademas, e UV index na Aruba por alcansa nivelnan extremo.

Un ola di calor, tambe describi como calor extremo, ta un periodo di clima abnormalmente cayente. E definicion por varia pero ta similar. Un ola di calor ta midi usualmente relativo na e clima usual na e area y na temperaturanan normal pa e temporada. Temperaturanan cu hende di un clima cayente ta considera normal, por ta considera como un ola di calor di un area mas fresco. Esaki ta e caso si e temperatura ta fuera di e patronchi normal pa e area.

Kico ta considera calor extremo ta varia pa region. Den nort-oriente di Merca, ta considera un ola di calor ora e temperatura ta alcansa of excede 32.2°C pa tres dia consecutivo. Pero pa climanan mas seco, por ehemplo na California, ta ora ta alcansa of excede 37.8°C. Servicionan di tempo ta emiti conseho pa calor y advertencia di calor excesivo pa cada pais.

Den luna di juni ultimo, Aruba a ricibi advertencia pa calor excesivo riba dia 2, 3 4 y 5 di juni, cu temperaturanan excediendo 35°C, segun Meteo Aruba. Esaki ta e ola mas recien di calor cu a registra riba nos isla.