Segun rapport di Algemene Rekenkamer Aruba: Situacion financiero di Arubus ta fragil y pa hopi aña a depende di contribucion adicional di pais Aruba

Den luna di juni Algemene Rekenkamer Aruba (ARA) a publica nan rapport di investigacion titula “Op afstand, maar toch dichtbij.” E investigacion ta enfoca riba e instancianan cu ta poni riba un distancia di pais Aruba.

Pa loke ta e analisis financiero di e investigacion, nan a investiga e periodo administrativo di 2018 pa 2020 y bay mas profundo den seis instancia: Arubus NV, Post Aruba NV, Refineria di Aruba (RdA) NV, WEB Aruba NV, Serlimar y Fundacion Lotto pa Deporte. Den e articulo aki ta bay elabora riba e instancia Arubus N.V.

Compania Arubiano di Bus N.V., conoci como Arubus N.V., tabata anteriormente West End Transportation N.V. E compania a cambia di nomber mediante un cambio den su statuto den aña 1983. E compania ta parcialmente responsable pa transporte publico y ta cay bao ministerio di Transport.

Arubus tin como meta: Mantene e servicio di bus y otro medionan di transporte, y tur loke ta relaciona cu esaki, den su sentido mas amplio. Pais Aruba ta 100% accionista di Arubus. E compania a establece den aña 2015 dos filial, na juni 2015 Compania Arubano di Parkeer N.V. (Aruparking) y na december di e mesun aña Arutram N.V. (Arutram). Arubus ta 100% accionista di e dos companianan aki.

Aruparking ta encarga di, entre otro, instala y opera e parkeermeters, construccion, maneho y mantencion di luga pa parkeo y parkeermeters conforme cu e leynan di zonanan pa parkeo. Tin tres zona pa parkeo asigna, manera na centro di Oranjestad, na area di hotelnan “Highrise” na Noord y na west di Oranjestad (area di L.G. Smith Boulevard).

E idea pa creacion di Aruparking tabata pa genera ingreso pa e perdidanan operacional di Arubus por ser reduci substancialmente y (segun e expectativa) pa reduci esaki na cero. Arutram ta encarga di implementa e politica relaciona cu vehiculonan pa trein, destina pa servicio publico di transporte. Contrario cu Aruparking, cu Arutram e idea tabata pa e pais Aruba paga e gastonan operacional di Arubus. Esaki riba base di un contract di prestamo y explotacion. Fondonan ta ser colecta via e Cruise Passenger Fee (CPF) cu turista ta paga. E uso di e tram ta inclui akinan.

Den Arubus pais Aruba, representa pa e minister responsable, tin un rol importante. Apart di su responsabilidad na e area di transporte publico, e minister di Transport, Integridad, Naturalesa y Asuntonan di Adulto Mayor ta representa e pais Aruba na e reunionnan general di accionistanan (AvA).

E structura di gobernacion di Arubus ta un modelo di dos nivel. E directiva ta consisti di un direccion (di 1 of mas director), bao di supervision di un Raad van Commissaren (RvC) cu tin minimo tres y maximo cinco comisionario.

E director- y comisionarionan ta ser nombra pa e AvA y por ser suspendi y despedi na cualkier momento pa e mesun. E Pais ta e aandelhouder of doño di Arubus. E ministro encarga cu Transport, cu tin e responsabilidad di politica pa e compania, ta representa e pais den AvA y e autoridad di e minister ta regula den e statuto di Arubus.

E influencia di pais Aruba, specificamente di e minister encarga cu Transport, ta den un manera directo. Apart di su rol como representante den AvA, e minister tambe tin influencia den e RvC, cu ta e persona cu nombra e miembronan. intervencion di e minister por ta necesario ora un institucion no ta ‘den control’ of pa motibo di un gran interes publico. Ta importante pa e intervencion pasa di un manera transparente, via e posibilidadnan legal cu ta existi pa e modelo scogi.

E influencia di e minister no ta nifica cu e tin un intervencion directo of mester tin un intervencion directo den e maneho di Arubus. E maneho ta asigna na un directiva, bao di supervision di un RvC.

Ta importante pa e modelo scogi, den e caso aki como compania, ta keda sigui di berdad. Di investigacion ta resulta cu esaki no semper ta e caso y cu e modelo scogi pa Arubus no a ser sigui.

E relacion financiero entre Arubus y pais Aruba a keda forma mediante un contract di servicio (DVO). E DVO tabata valido pa 10 aña, pa e periodo 2012-2022 y a vence na december 2022. E DVO ta cubri e servicio di Arubus na e publico den e marco di transporte publico. Esaki ta inclui e introduccion di ruta nobo, e implementacion di un tarifa social y bus nobo y e introduccion di un proyecto di smart card. E DVO ta cubri un suma anual di Afl. 4 miyon, cu ta ser paga den terminonan mensualmente.

E tabel 1 ta mustra cu entre 2018 un suma adicional entre aproximadamente Afl. 5 miyon y Afl. 7 miyon, a ser contribui pa pais Aruba. Den 2023 y e prome kwartaal di 2024 pais Aruba a proporciona fondonan na Arubus, sin cu tabatin un DVO valido. E fondonan a ser proporciona a base di cartanan di adelanto (voorschotbrieven). E acuerdo di un DVO a ser posponi, den espera di un miho fundamentacion di e propuesta presenta pa Arubus.

E sumanan cu ta paga na Arubus anualmente riba e suma di e DVO como tambe e sumanan paga despues di e vencemento di e DVO, no tin un base legal y ta financieramente ilegal. Un ilegalidad financiero ta nifica cu un pago ta ser haci, sin un base legal cu ta cubri e suma den cuestion.

Den e caso di Arubus, e DVO ta iresponsablemente registra como subvencion den e recordnan financiero di pais Aruba. E regulacion di subvencion pa organisacionnan di interes publico no ta cubri transporte publico.

Arubus ta den un situacion financiero fragil y ta dependiente di contribucion adicional di pais Aruba ya pa hopi aña. Tabel 2 tambe ta mustra e caida den e ingreso di servicio. E ingreso ta mustra un tendencia di caida ya pa un tempo. E ingreso di Afl. 7.8 miyon den 2015, a cay pa aproximadamente Afl. 7.3 miyon den 2016 y pa aproximadamente Afl. 6.8 miyon den 2017.

Debi na e ingreso di servicio cu no ta loke a spera, Arubus ta depende cada biaha mas di contribucion significativo di pais Aruba, pa cubri e corto di likides. A pesar di esaki, Arubus a logra resultado negativo den añanan pasa (cu excepcion di 2018). Esaki ta presenta den e tabel 3.

E resultadonan aki, hunto cu perdidanan di añanan anterior ta nifica pa Arubus un patrimonio negativo di Afl. 2 miyon y un patrimonio negativo consolida di aproximadamente Afl. 5.3 miyon pa fin di 2020.

Arubus tambe a acumula un debe cu Departamento di Impuesto (DIMP) durante e periodo di e investigacion aki pa no paga e belasting di salario reteni y e primanan social, BBO, BAZV, y BAVP. Pa final di 2020, e debe tabata Afl. 12.5 miyon.

Pa final di 2022, e debe a yega Afl. 15.8 miyon na pago atrasa y Afl. 1.5 miyon na gastonan di reminder y interes. Tin dialogo entre Arubus y DIMP tocante e posibilidad di yega na un areglo di pago. A yega na un acuerdo, unda Arubus mester paga e contribucion mensual pa 2023 prome cu acuerdo definitivo por ser haci tocante e debe pendiente. Arubus a cumpli cu e acuerdo pa 2023.