Aruba Fair Trade Authority (AFTA) a duna un conseho na Minister di Asunto Economico relaciona cu un propuesta pa un modelo di alocacion y compensacion pa uso di spectrum mobil 5G na Aruba. E rapport ta evalua un estudio di Stratix y ta analisa respuesta di mercado di Setar y Digicel. AFTA ta opone tarifa y division di spectrum uniforme ya cu por afecta competencia, y ta sugeri tarifa diferencia riba balor di banda di spectrum y un modelo di alocacion flexible.

Directorado di Telecomunicacion di Ministerio di Asunto Economico, Comunicacion y Desaroyo Sostenible a solicita compania Hulandes, Stratix pa duna conseho riba modelo di alocacion y compensacion pa frecuencianan destina pa telefonia mobil 5G. Na juli 2023, Stratix a publica e rapport titula“Mobile Frequency Usage Compensation – Increasing Societal Value for Aruba.”

Mei ultimo, minister di Asunto Economico, Comunicacion y Desaroyo Sostenible, Geoffrey Wever a solicita pa AFTA bao articulo 4.8 di Ordenansa di Competencia duna conseho riba e potencial efecto competitivo di e modelo proponi pa Stratix pa uso di spectrum den sector di telefonia mobil 5G na Aruba. AFTA a entrega su conseho luna pasa.

Pa esaki, AFTA a realisa un estudio enfoca riba analisa e aspectonan competitivo di e mecanismo di alocacion di Stratix, evaluando e impacto di un suma anual uniforme y distribucion di spectrum riba dinamica di competencia entre proveedornan existente y potencialmente nobo. Maske e solicitud di DTZ ta enfoca specificamente riba frecuencia 5G, e conseho di Stratix ta abarca tur alocacion di frecuencia di telecomunicacion, y pues AFTA tambe ta considera e contexto mas amplio di alocacion di frecuencia.

Sinembargo, ta nota cu e tarifa specifico cu e proveedornan lo mester paga ta fuera di alcance di e conseho aki.

Conseho di Stratix

Stratix y DTZ ambos ta enfatisa cu e modelo actual, cu ta aplica un tarifa anual di Afl. 98mil pa MHz pa tur banda di frecuencia, ya no ta sostenible – specialmente pa e banda cada bes mas importante 3.5 GHz usa den aplicacionnan 5G. E tarifa halto aki ta haci e lansamento di 5G financieramente imposible pa proveedornan segun Setar y Digicel.

Stratix ta recomenda pa no tene subasta, ya cu esaki ta innecesario den mercado di Aruba pa motibo di falta di scarsedad di spectrum y actornan limita, loke ta conduci na ineficiencia.

Ademas, ta recomenda un tarifa anual uniforme pa tur proveedor, aplicable na tanto actornan actual como esnan nobo cu un validez di cinco aña. E tarifa no mester ta vincula na participacion di mercado of uso di spectrum pa evita complehidad administrativo y legal.

Tambe mester distribui spectrum igualmente entre proveedornan existente, cu spectrum no usa debolbi na DTZ. Si tin un compania nobo, mester realoca spectrum, cu e usuario actual ricibiendo prioridad riba nan frecuencia asigna. Alocacion di banda specifico pa rednan priva y sectornan critico manera Utilities y servicio di emergencia pa mehora cooperacion publico-priva sin compromete rednan comercial.

Evaluacion

Pa haci su evaluacion, AFTA a usa e OECD Competition Assessment Toolkit, un marco desaroya pa Organisacion pa Cooperacion y Desaroyo Economico (OECD) pa yuda legisladornan evalua e impacto competitivo di regulacion y politica proponi. E toolkit su meta ta pa sigura competencia saludable den mercado. E ta basa riba cuatro pregunta clave, e.g. restriccion riba entrada den mercado, limite riba competencia, incentivo reduci pa competencia, y restriccion di escogencia di consumidor.

AFTA ta evalua e propuestanan di Stratix usando e marco aki, bisando cu e propuesta di Stratix pa un tarifa anual uniforme pa proveedor di telecomunicacion inicialmente ta parce directo, dunando transparencia di costo y predictabilidad pa tanto Setar como Digicel. Esaki por atrae proveedornan cu ta preferi stabilidad den nan structura di costo y reduci peso administrativo pa DTZ. Sinembargo, basa riba e preguntanan di evaluacion di OECD, potencial desbentaha ta aparece.

Pa cu restriccion di entrada den mercado, un tarifa anual aplicable na tur proveedor, incluyendo esnan nobo, ta genera barera di entrada door di faborece proveedornan grandi, estableci. Por ehemplo, Setar cu su share dominante di mercado, por distribui e costo den un base mas amplio di cliente, creando un bentaha di costo. Companianan chikito of nobo por tin dificultad pa carga e mesun costo fiho, disuadiendo entrada den e mercado.

Tocante limite riba competencia, un tarifa uniforme ta balota diferencia den escala di proveedor y necesidadnan di spectrum, imponiendo costonan desproporcional riba proveedornan chikito. Esaki por conduci na un tereno desigual, descurashando competencia efectivo. Proveedornan mas chikito por enfrenta costonan mas halto relativo na nan share den mercado, limitando nan habilidad competitivo.

Stratix ta conseha pa distribui tur spectrum disponible di manera igual entre proveedornan existente, y debolbe e spectrum no usa na DTZ. Den caso cu bin compania nobo, ta sugeri realocacion cu prioridad pa e prome usuario di un banda di frecuencia. Sinembargo, AFTA ta preocupa cu distribucion igual por limita companianan nobo si proveedornan existente ta retene spectrum significante. E ponencia di Stratix cu no tin escasez di spectrum ta mina e necesidad pa un pre-alocacion asina. Un alocacion mas flexible basa riba necesidad por mantene spectrum disponible pa companianan nobo, sigurando acceso amplio na e mercado.

Ademas, AFTA ta preocupa cu relocacion mediante negociacion cu proveedornan of loteria por reduci entrada den mercado y crea ineficiencia. Un proceso mas obhetivo pa realocacion basa riba uso real of proyecta di spectrum, lo sigura acceso y competencia mas husto.

Tocante e sugerencia di Stratix pa un tarifa fiho pa cinco aña, AFTA ta preocupa cu e duracion cortico por disuadi proveedornan existente y esnan nobo di inverti den infrastructura cu periodonan mas largo di payback. Un periodo mas largo lo duna miho seguridad di inversion y curasha participacion den mercado.

Despues di un test di necesidad, restriccion y proporcionalidad, AFTA ta conclui cu e propuesta di Stratix pa tarifa uniforme, distribucion igual di spectrum y un termino di cinco aña ta presenta varios riesgo pa competencia. AFTA ta recomenda reconsidera e medidanan aki na fabor di manehonan mas flexible, basa riba necesidad, cu ta sostene acceso na mercado, curasha competencia y mantene incentivo di inversion pa tanto actornan existente y potencialmente nobo den mercado.

Conclusion

Mientras cu AFTA ta sostene varios sugerencia di Stratix, manera evita subasta, reduci costo di spectrum y reserva spectrum pa rednan priva y gruponan special, tambe ta identifica preocupacion pa cu cierto propuesta cu por restringi competencia.

Por ehemplo, cu un tarifa anual uniforme por crea un bentaha inhusto pa proveedornan manera Setar mientras ta lanta barera pa compania nobo y competidornan mas chikito. Aloca tur spectrum di manera adelanta ta carga riesgo di limita acceso pa companianan nobo, reduciendo dinamismo den mercado. E licencia di cinco aña ta demasiado cortico pa sigura ROI pa inversionnan a largo plaso, potencialmente descurashando tanto proveedornan existente como companianan nobo di inverti den infrastructura.

AFTA ta recomenda pa aloca spectrum basa riba necesidad real na lugar di pre-asigna esaki igualmente. Proveedornan mester declara con hopi spectrum nan ta rekeri y paga un tarifa corespondiente. E modelo dinamico aki ta preveni cu ta acapara spectrum y ta curasha uso eficiente, mientras ta permiti adkisicion adicional di spectrum si ta necesario.

Tarifa mester refleha balor di diferente banda di frecuencia den mercado. Bandanan mas valioso lo nifica tarifa mas halto, sigurando igualdad y fomentando competencia. E modelo aki ta curasha proveedornan mas grandi pa paga proporcionalmente mas, mientras proveedornan mas chikito y nobo ta enfrenta menos barera pa entrada.

AFTA tambe ta recomenda un periodo di licencia extendi, di al menos 10 aña (idealmente 15), cu lo provee seguridad di inversion. Tarifa anual mester inclui ahuste pa inflacion pa mantene balans economico.

Pa sigura standard di servicio y igualdad den mercado, AFTA ta recomenda impone rekisito di cobertura y calidad, monitoria mediante evaluacionnan anual independiente. Proveedornan dominante manera Setar mester ofrece acceso na MVNOs basa riba acceso y comparti infrastructura pa reduci barera pa entrada den mercado.

AFTA ta enfatisa e importancia di un politica competitivo, innovativo y flexible pa maneho di spectrum pa sostene crecemento digital di Aruba. Door di adopta un modelo di alocacion basa riba necesidad y un marco di compensacion husto, mercado di telecomunicacion por keda abierto, competitivo y capaz di cumpli cu exigencianan tecnologico futuro. E medidanan aki tin meta pa beneficia tanto participantenan den mercado como usuarionan final, impulsando mehoracion den calidad di servicio, prijs y innovacion den mercado.