Dialuna ultimo, Aruba Tourism Authority (ATA) a presenta su rapport anual di aña 2023 caminda a trece dilanti diferente informacion tocante turismo di Aruba, su desaroyo y tambe e campañanan dirigi na cierto region pa asina atrae e mercado internacional.

Ronella Croes, CEO di ATA a informa cu Aruba a atrae un total di 1.243.554 bishitante na aña 2023, locual ta traduci den un recuperacion di 111% ora ta compar’e cu aña 2019, unda aña pasa e mercado di Merca y Latino America crece mas.

Merca por ehemplo, a crece cu 13% den cantidad di bishitante, mientras cu Latino America a subi cu 22%, den comparacion cu aña 2019. Di otro banda, Europa no a logra alcansa un crecemento, sino ainda ta den recuperacion, compara cu aña 2019 a recupera cu 77% y ta observa e mesun tendencia aki den otro islanan di Caribe tambe.

Aña 2023 tabata e prome aña cu tur region a cuminsa tin presencia di mercadeo cu Aruba Tourism Authority (A.T.A. y a stop tur tipo di restriccion y regulacion despues di pandemia. Como parti di e strategia pa aña 2023, a enfoca riba crea oportunidadnan pa diversificacion unda cada region a haci esaki di un forma diferente.

Den aña 2023, Nort America, e mercado principal, a sigui desaroya e campaña “The Aruba Effect” pa tuma oportunidadnan strategico pa enfoca riba diferenciacion. Despues di su lansamento na aña 2022, e campaña aki a continua pa asina por a resalta e efecto duradero cu Aruba ta laga riba su bishitantenan despues cu nan bay cas back, tambe a enfoca riba e atributonan di e isla cu ta keda cu e bishitantenan.

A splica cu cada detaye den produccion di e campaña aki a ser scogi meticulosamente pa eleva “The Aruba Effect” ainda mas y pa loke ta trata e audiencia, a keda enfoca riba e seis segmento di audiencia di balor halto.

Mesun manera Croes a señala cu algun activacion innovativo cu a tuma luga den aña 2023 e cual tabata “Tattoovenirs”, “World’s Easiest Job”, “Aruba I Do” y “Paradise on Tap”, tur e activacion aki ta alinea cu “The Aruba Effect” y e resultadonan di nan a permiti nan pa ta presente den espacionan nobo.

Den aña 2023, Europa a experencia su prome aña “normal” sin ningun restriccion di biahe, permitiendo pa compara e resultadonan cu aña 2019, e aña di referencia prome cu pandemia. Aunke e region aki no tabatin un recuperacion completo ainda den 2023, tabatin diferente momento cu a duna Aruba e oportunidad pa traha riba diversificacion di mercado.

Aerolinea British Airways tabatin su vuelo inaugural na aña 2023, permitiendo Aruba yega mas cerca di e mercado di Inglatera, e di dos mercado mas grandi na Europa, e mercadeo y promocion a continua tambe di forma creativo treciendo Aruba mas cerca di e mercado na Hulanda, Italia y Alemania.

“The Aruba Effect” a continua na Europa tambe como e campaña principal, enfocando tambe riba e efecto cu Aruba ta laga riba e bishitantenan, creando e oportunidad pa resalta loke ta haci Aruba special.

E mercado di Latino America tambe a diversifica den aña 2023, entre otro a traves di e vuelonan directo cu LATAM Airlines for di Lima, conectando Aruba cu e area di “Cono Sur,” e region aki a experencia e efecto di “revenge travel” despues di e pandemia, apenas aña pasa un gran interes di biahe a ser crea, specialmente pa Caribe, dunando tambe oportunidad na aerolineanan pa capitalisa riba e demanda aki y agrega rutanan nobo of frecuencianan adicional for di e region pa Aruba.

E campañanan na Spaño pa publico Latino Americano como por ehemplo, “Cumplelo en Aruba” a enfoca riba e recordatorio pa bishitantenan no tarda di cumpli cu nan deseonan y bin Aruba pa haci e deseonan aki realidad, tambe a haci diferente activacion den e region manera entre otro, “Felicidad Extendida” y “Amor a primera visita”.

Aruba a cera aña 2023 cu un crecemento den cantidad di turista, e mercadonan ta comparti, di cual 81.1% a bin di Merca, 10.5% di Latino America, 5.8% for di Europa y 2.6% di resto di mundo. Mester menciona cu ATA tin representacion den tur tres mercado, pa por haci mercadeo y promocion pa atrae turista pa e isla.

Segun a splica, cifranan di turismo a demostra un crecemento record aña pasa, ta sigui traha den desaroyo di un turismo di mas balor pero cu menos impacto riba entre otro, naturalesa y medio ambiente.

Aruba Tourism Authority di algun tempo caba a adapta nan maneho den “High Value-Low Impact” y por bisa cu e ta dunando bon resultado. Pa Oficina di Turismo, nan liña di maneho ta keda enfoca riba sostenibilidad, aunke ATA no ta e autoridad cu ta ehecuta tur aspecto referente sostenibilidad, e ta keda boga pa esaki y ta keda facilita pa medio di conseho referente maneho, investigacion y tambe pa medio di inversion.

Den esaki por nota cu en bes di enfoca riba trece mas turista, awendia ta mas pendiente den e loke e turista ta gasta na Aruba, e tarifa cu ta paga pa cada camber di hotel of vacation rentals y mas cu tur cos, nan ta pendiente di e nivel di satisfaccion di cada turista.

Ta nota cu den tur e areanan aki, e cifranan ta positivo y ta marca mehoracion compara cu e aña prome, Croes ta comenta cu e resultadonan aki no a bin pa suerte, sino ta mara na investigacionnan cu ATA a conduci aña pasa, cambio di maneho y inversionnan realisa pa logra dicho meta.

E ultimo añanan, Oficina di Turismo a sigui inverti den esfuersonan local pa mehora nan producto, asina por menciona sosten na e proyecto “Stimami Sterilisami”, pa evita cachonan riba caya sin doño, tambe a reactiva Bon Bini Festival, pa por tin mas evento dedica na e turistanan, pero pa por haci turismo mas duradero, a inverti den buki pa scolnan, sosten pa Fundacion Museo Arubano, Fundacion Chico Harms, Go Cultura Foundation y asina por sigui menciona mas. Den deporte tambe ATA a demostra su compromiso na Comite Olimpico Arubano (COA) den un esfuerso pa sigui prepara y manda atletanan saca cara di e isla internacionalmente.

Aña pasa e meta primordial di mercadeo y promocion di ATA a keda basa riba e continuidad di e modelo di High Value-Low Impact cu ta enfoca riba calidad di e bishitante y no volumen. Turismo di Niche a hunga un papel crucial den nan enfoke pa facilita un desaroyo sostenibel a largo plaso di e destino, pa duna mas aporte na e compromiso, y segun meta y obhetivo strategico central di ATA, a establece un ‘Niche Framework’ den 2023 pa priorisa ainda mas e desaroyo sostenibel, banda di esaki, ATA a cumpli cu diferente estudio pa duna apoyo pa cu un turismo sostenibel, manera ‘Credit Card Visa Study’, a inicia estudionan mara na e topico di ‘Carrying Capacity’ cu a inclui update e inventario di ‘Short Term Vacation Rentals’, ‘Events Roadmap’, ‘Luxury Cruise Line’, ‘Visitor Sentiment’.

Riba nivel di desaroyo di producto no ta solamente participa den diferente comision y ta duna hopi conseho y yuda desaroya maneho, pero ta lidera y/of participa financieramente na proyectonan pa stimula e desaroyo conforme e modelo di ‘High Value-Low Impact’ como por ehemplo, ‘Aruba Hospitality and Security Foundation’, ‘Aruba Excellence Foundation’, ‘Visitor Center San Nicolas’, campañanan di Ban Serio, desaroyonan na Ayo Rock Formation, bari di reciclahe, restauracion di trapinan na Hooiberg, colocacion di ‘buoys’, introduccion di ‘Mountain Bike Trails’, upgrade integral di Seroe Colorado como tambe Mangel Halto, colaboracion estrecho cu ‘Aruba Conservation Foundation’ y otronan mas.