Ayera tabata e prome conferencia cu Comerciante Uni di Aruba (CUA) a duna na miembronan di prensa oficialmente, como un asociacion legalmente estableci cu su propio personeria huridico. E directiva ta consisti di Frans Ponson (presidente), Francis Saladin (secretario) y Randall Croes (tesorero).

 

CUA no ta un asociacion desconoci, ya caba den pasado nan a yega di bin den publicidad pa vocifera cierto disgusto den e gremio comercial pa cierto medida cu gobierno a yega di introduci. Saladin a bisa cu e tempo aya como comerciante local, nan a sinti falta di representacion di nan voz durante e debate, entre otro, di reforma fiscal cu gobierno kier a bin cune y tambe riba e manera con gobierno a ataca comercio tocante e forma di cobra BBO. Pero tambe CUA a yega di bin dilanti pa contraresta cualkier insinuacion di gobierno e tempo ey, el a laga sa.

Interes di comercio

Awor cu nan ta un asociacion oficial, nan intencion ta di sigui vocifera nan posicion pa salvaguardia interes di comercio y representa nan.

Na nivel comercial – segun Saladin – tur hende a sufri den e temporada aki, tanto e doño di empresa y nan trahadonan. Na ta mira companianan cu ta cerando cu consecuencianan pa trahadonan y pa resto di hendenan tambe. Sinembargo nan ta lamenta gobierno ta papia di pasenshi ya cu nan ta negoshando. Pero den realidad nan ta mira cu gobierno no ta presenta niun plan y tampoco ta bin cu alternativanan. Ya sea pa bisa “nos ta bay guera hunto. Nos ta bay sufri hunto of nos ta bay haci cosnan hunto. Con ta bay ta,” segun Saladin. E ta haya cu esaki ta un punto cu ta haci falta pa gobierno concretisa un posicion, pero tin un silencio den esey.

CUA y KvK

E asociacion aki a wordo defini como uno cu ta busca defende interes di e comerciantenan local. Nan ta cuminsa recluta miembronan pa asina nan por sigui fortalece nan asociacion pa bay dilanti. Nan lo funciona usando plataforma di un app.

Nan ta defini bao e concepto di comerciante local e negoshinan di hendenan cu ta biba na Aruba mas cu 5 aña. Nan ta considera tur nacionalidad como local. Otro condicion ta cu nan negoshi mester ta mas cu mita propiedad di hendenan cu ta biba na Aruba pa mas cu 5 aña permanentemente.

E tesorero di e asociacion aki a laga sa cu nan no tin niun discriminacion den caso si bo tin un nacionalidad diferente cu Hulandes. “Tanten cu bo ta biba aki, paga bo impuesto y legalmente ta biba y bo tin bo negoshi, bo ta miembro di nos organisacion”, segun Randall Croes.

El a referi cu den nan statuut ta para cu e asociacion aki a wordo lanta entre otro pa promove e participacion di dialogo entre miembronan di nos sociedad, tanto local como den exterior. Tambe pa nan mantene dialogo cu gobierno y defende interes di nan miembronan en general y desaroyo di Aruba. Igualmente nan ta mantene comunicacion cu otro instancianan of sector y stakeholder. Tambe nan ta abierto pa duna conseho pidi of no pidi na organonan di sector publico. Nan ta boga pa un sistema di impuesto husto. Nan kier promove desaroyo economico, social y duradero den special liber empresa. Nan kier promove clima di inversion. Tambe nan ta inclui den nan statuut proteccion di medio ambiente.

Igualmente CUA ta defende e cupo di trabao den mercado laboral contra cualkier factor cu por afecta esaki. Nan ta brinda proteccion di nan miembronan contra competencia inhusto y cualkier tipo di monopolio for di unda cu e ta bini.

Competencia

Encuanto si nan asociacion no ta bira un competencia pa e mesun Camara di Comercio (KvK) cu tambe como instancia a yega di vocifera e mesun preocupacion cu CUA a yega di trece dilanti y hinca nan den nan status, Randall Croes a bin cu algun clarificacion.

El a declara cu e diferencia ta cu KvK ta vocifera e posicion di tur negoshi registra na Aruba, sin distincion. Mientras cu CUA ta pone atencion riba e negoshinan caminda e doñonan ta hende local cu tin tur cos di perde, el a bisa. Ya cu nan ta hende cu ta biba na Aruba y nan negoshi ta estableci riba nos isla, y nan no ta compania di exterior.

Tambe el a bisa cu CUA ta un organisacion cu ta bay tin un relacion hopi directo cu su miembronan. Croes kende a yega di forma parti di e directiva di KvK a splica cu e instancia aki tin un rol mas social di registracion oficial di negoshi cu ta un parti hopi grandi di nan servicionan. Ademas KvK su eleccion di nan miembronan ta tuma luga den un forma hopi diferente compara cu esun di CUA. Ta empresarionan, inversionistanan y accionistanan ta esun cu ta bay participa den KvK. Logicamente gran parti di e miembronan di KvK tambe lo forma parti di CUA.

El a splica cu mientras ATIA no solamente tin empresarionan, pero tambe e miembresia di companianan di estado y tambe compania di exterior. Por ehempel AHATA cu ta un asociacion cu ta representa e sector hotelero cu ta inclui e cadena internacional.

Croes ta haya cu e organisacionnan aki ta maneha otro sorto di opinion y tambe di interes, caminda nan ta pone atencion riba nan grupo primordial. “Cerca nos ta e comerciante local netamente,” el a bisa.