Segun rabino Daniel Kripper: ‘Terorismo no ta para!’

ORANJESTAD – Miembronan di comunidad Hudiu di e sinagoga Beth Israel a recorda e fecha destina pa e victimanan di e holocaust durante II Guera Mundial. Den e ceremonia aki tabata presente minister Xiomara Maduro, tambe parlamentario Mervin Wyatt-Ras, representantenan di diferente iglesia na Aruba y invitadonan general.

E dia aki a bira uno di reflexion, mirando e ultimo acontecimento cu a tuma luga den e localidad Mericano di Poway, cerca di San Diego (California), unda un sinagoga a wordo ataca durante e conmemoracion di e ultimo dia di Pasco Hudiu. Tambe e atentadonan na Sir Lanka, unda un serie di atake teroristanan di grupo jihadista Estado Islamico a laga 257 morto den iglesianan y hotelnan di luho.

Rabino Daniel Kripper, di e sinagoga Beth Israel, a declara na Bon Dia Aruba cu el a kere cu e acto aki, conoci como ‘Yom HaShoah’ of Recuerdo di Holocaust y Heroismo, cu nan ta realisa anualmente, tabata simplemente un recordatorio historico di un echo lamentabel cu a sosode durante II GM. Pero nan ta mira cu hopi preocupacion cu a surgi gruponan Neo Nazi den henter mundo; y tambe di otro organisacion cu a adopta otro nomber ya sea anti Israel, etc.

E rabino ta lamenta cu no solamente e sinagoganan a bira victima di atake, sino cu iglesianan Cristian a wordo pega na candela, manera e casonan cu a tuma luga recientemente na Sri Lanka. E ta haya cu e tipo di organisacion extremista aki ta ataca e minorianan y esunnan mas debil.

Tambe nan ta ataca hospital, tempel, sinagoga y iglesia. “E terorismo no ta para!” el a bisa. Rabino Kripper ta lamenta cu e ola di violencia aki ta bin di fuente cu ta yama nan mes como religioso y den nomber di Dios. Algo cu nan ta considera cu ta contra di cualkier dogma of doctrina religioso. “Ya cu Dios ta asocia na paz, harmonia y convivencia,” el a bisa.

P’esey e ta kere cu un dia manera Yom HaShoah of Recuerdo di Holocaust y Heroismo, ta bay mas leu di bira un fecha di recuerdo tristo di e pueblo Hudiu, ya cu e fecha aki tin un componente universal. E mensahe mester ta uno di union di forsa y protesta contra e actonan violento aki; y crea un frente di speransa den henter mundo.