Durante un conferencia di prensa di ayera mainta, epidemiologo di Departamento di Salud Publico, Garreth Tromp a trece dilanti algun punto cu tin di haci cu e aumento di casonan nobo di Covid-19, y cu esey DVG ta pronostica lo sigui aumenta den proximo dianan.

Pa cuminsa, Tromp a duna un splicacion di un slide den e conferencia pa loke ta trata e tendencia cu ta bayendo ariba, di e casonan nobo pa dia cu tin un averahe di 49%. Y pa pone den perspectiva tambe tin e casonan di e luna di september. El a menciona cu ta importante pa tuma nota cu tin un Reproduction (Rt) di 1.14 y cu nan ta bay sigui tuma nota con ta aumenta exponencialmente pa loke ta trata casonan nobo pa dia.

Di e positivity rate, Tromp a expresa cu nan a haya e indicacion cu e casonan pa dia lo aumenta. Nan ta mira un aumento drastico den e tasa di positividad (‘positivity rate’), cu ta e porcentahe di test positivo bao esnan cu tin sintoma. Cerca di december esaki a yega alrededor di 30% y a yega na casi 40% dos biaha.

Tabatin menos hende cu a bay haci test durante dianan di fiesta, pero e cantidad di test pa esnan cu mester di un test pa biaha a aumenta drasticamente, segun Tromp a anuncia. Pa e motibo aki, e casonan positivo pa dia a aumenta, pero esey tabata un indicacion cu en berdad lo tin mas hende positivo cu no ta bay test.

Ta importante pa haci test ora un persona ta presenta cualkier di e sintomanan asocia cu coronavirus, pa motibo cu si tin sintomanan infeccioso, mas lihe DVG por haci investigacion pa mira cu ken e persona aki tabatin contacto, pa pone e persona den cuarentena, pa asina detene e ruta di transmision.

Di esunnan cu ta bay haci e test, Tromp a bisa cu generalmente nan ta haci e test cinco dia despues cu nan a cuminsa sinti e sintomanan, loke ta nifica cu “ta hopi peligroso, pasobra den e cinco dianan ey ya caba por contagia varios hende”, el a sigura.

Di e casonan importa, Tromp a menciona cu nan ta bou control. Pero nan a registra un aumento den esaki den ultimo tempo y cu tin di haci cu tendencia na nivel mundial cu casonan nobo pa dia ta aumentando. Loke ta importante ta cu hopi di e casonan aki ta bin for di Merca y for di Hulanda, entre diferente partinan di mundo.

Esunnan cu ta test positivo na aeropuerto ta personanan local. Loke ta importante ta cu local tin un diferente comportamento cu turista. Turista ta bin cu turista y normalmente nan no ta transmiti e malesa pa un hende local, pero un local cu ta bin for di afo cu e malesa ta transmiti esaki na su famia, asina e rueda di transmision ta sigui.

Igualmente, el a detaya cu si un persona a bin di afo y a test negativo na aeropuerto, mester ta consciente cu ainda por test positivo algun dia despues, pa motibo cu por ta den periodo di incubacion. Pa e motibo aki ta recomenda pa tuma algun dia den cuarentena.

Por a tuma nota cu e casonan ta tumando luga den e mesun cas of un contacto cu un persona conoci cu no ta biba den cas, segun loke Tromp a finalisa.