“E forsa principal di nos pais semper tabata ta su hendenan luchado. Cu a lucha duro incansablemente pa hiba nos pais nos dilanti.”
Asina prome minister Evelyn Wever-Croes a bisa ayera den cuadro di Dia di Obrero cu a coincidi cu aprobacion di conseho di minister di reino di un fiansa di parti di Hulanda. E prestamo aki ta destina pa yuda e empresanan chikito y mediado pa por yuda nan paga e salario di nan trahadonan y percura asina cu mayoria di nan empleadonan por keda na pia di trabao.
E prome mandatario a bisa cu den e etapa cu nos ta aden, y sigur e etapanan nos dilanti, e trahadonan lo hunga un papel ainda mas importante den reconstruccion economico di nos pais. Igualmente pa nan trece stabilidad den nos pais y felicidad cu nos tur ta buscando.
“Den un dia manera awe nos ta para riba importancia di tin un trabao,” el a bisa.
E mandatario a agrega cu awe mas cu nunca nos mester ta agradecido na esnan cu ainda por tin un trabao. Pero nos pensamento y oracion ta na esnan cu no tin un trabao. El a trece e cifra cu aproximadamente den e prome siman di e crisis di coronavirus, alrededor di 10 mil persona a perde nan trabao. Pero actualmente tin 37 mil persona cu ta na riesgo di perde nan trabao.
Di su banda minister di Labor, Glenbert Croes cu hunto cu su colega di finansa y asunto Economico, Xiomara Maduro, y premier Wever-Croes, tabata den e conferencia di prensa di ayera mainta, caminda el a elogia e esfuerso cu ambos mandatario a haci pa percura pa mas trahadonan por sigui haya nan salarionan proximamente. P’esey e mandatario di Labor a cualifica e dia di ayera como uno “hopi special.”
