Recientemente Prome Minister Evelyn Wever-Croes, hunto cu Minister di Finanzas y Cultura, Xiomara Maduro a reuni cu representantenan di FCCA. Durante e reunion aki a trata e tema di e necesidad di vivienda na Aruba, specialmente viviendanan social.
FCCA (Fundacion Cas pa Comunidad Arubano) a ser lanta 45 aña pasa, na comienso di aña 1979, cu e meta pa yuda Gobierno logra construi cas y pa percura pa traha vivienda social pa tur hende na Aruba por tin un dak riba nan cabes.
Den un comunicado di prensa, Prome Minister ta indica cu e demanda pa vivienda na Aruba ta grandi. Tin mas di 3000 persona cu ta sperando pa haya un cas y FCCA no tin e capacidad pa construi e cantidad aki. Gobierno ta bay duna di su parti awor y yuda FCCA construi e cantidad di casnan aki. Awor cu financieramente Aruba ta para solido, por crea y destina e espacio financiero pa FCCA por construi cas, segun e comunicado ta indica. Gobierno hunto cu FCCA ta trahando riba un convenio pa yega na otro pa asina facilita e trabounan den futuro y garantisa cu cada aña minimo 200 cas ta wordo construi y asina por yega na yena e necesidad cu tin.
“Mi ta sinti mi sumamente contento cu awor nos por haci esaki. Despues di a sobrevivi e pandemia, nos a stabilisa e situacion financiero di nos pais, y awor cu nos ta den recuperacion y nos a crea e espacio financiero, nos por haci e inversionnan aki y percura pa nos por yega na mas vivienda social aki na Aruba,” prome minister a comenta.
