Segun prome minister, problema cu taxistanan cu minister Arends a señala tabata nobo pe

Mañan 21 di augustus, minister di Transporte, Ursell Arends tin un di tres reunion cu e representantenan di e grupo di taxista pa sigui dialoga riba e concepto nobo presenta pa traspaso di permiso di taxi y cantidad maximo di asiento pa transporta pasahero.

Durante conferencia di prensa diahuebs ultimo, prome minister Evelyn Wever-Croes a ricibi e pregunta for di miembro di prensa tocante ki conseho e lo duna e minister encarga cu e cartera di transporte of kico e lo a haci diferente pa evita mas impasse y problema cu e taxistanan.

Prome minister a remarca cu en general ora cu ta bay introduci cierto cambionan cu ta afecta un grupo di persona specifico semper ta bon pa ta den dialogo. El a indica cu aunke no ta tur esey ta posibel, generalmente dialogo ta importante como tambe comunicacion na comunidad.

Den e caso di taxistanan, el a splica cu e problema cu a wordo señala tabata nobo pe den e sentido cu e no tabata sa cu e ta un problema cerca e minister encarga y cu ta bay bin un cambio di maneho.

El a sigui splica cu hopi hende sa di hendenan cu ta pasa permiso di taxi pa otro, y cu tabatin un maneho y despues e maneho a bira menos bon. Pero el a resalta cu hende ta paga asina tanto placa pa permiso di taxi ta algo nobo pe.

E mandatario a subraya cu e meta principal di un gobierno ora tin accion ta pa baha e presion y pa evita cu nan ta haci loke nan a haci, referiendo na e blokeo di aeropuerto, locual el a subraya ta inaceptabel.

Prome minister a indica cu den e contenido di e argumentonan cu minister Arends a splica nan, Conseho di Minister, tin puntonan hopi valido, y el a resalta cu, for di su punto di bista, e ta sigur cu den dialogo e taxistanan nan tambe lo compronde.

“Ta puntonan cu nos tur kier pa mehoracion di Aruba y mi ta sigur cu ningun hende ta bay pidi e minister haci algo cu ta contra ley, haci algo cu ta contra integridad. Nos sigur no como gobierno, pero e taxistanan tampoco. Mi a papia cu e minister, mi a papia cu e taxistanan y pa loke ami ta sinti, nan no ta hopi leu di otro,” el a remarca.

Apart di reuni cu minister Arends, e representantenan di taxista a reuni cu prome minister, minister di Turismo, Dangui Oduber, y minister di Finanzas, Xiomara Maduro. Prome minister a indica caba anteriormente cu e no ta bay mete den maneho of cartera di otro minister.