Luna pasa a cuminsa haci e pagonan di indexering na empleadonan publico, cual nan ta ricibi den dos parti. E prome parti ta 6% di e total 11.7%, y proximo aña nan ta ricibi e di dos parti. Trahadonan di fundacionnan subsidia pa gobierno tambe ta cay den esaki, pero pa e grupo specifico aki tin algun contratiempo.

Durante un conferencia di prensa diahuebs mainta, prome minister Evelyn Wever-Croes a splica cu ta trata di mas o menos mil persona cu ta traha pa fundacionnan subsidia pa gobierno cu a of ta bay ricibi pago di indexering. E cifra exacto, el a splica, nan no tin bista riba dje pa motibo cu ta e fundacionnan ta esnan cu ta encarga cu payroll y no gobierno.

El a indica cu nan a duna e aumento basa riba indexering y e gastonan cu a wordo aloca pa esaki ta 5.8 miyon florin e aña aki y otro aña 20.6 miyon florin.

Pero e proceso di pago pa e grupo aki specifico no ta canando bon y a encontra contratiempo. Algun sindicato a trece dilanti e hecho cu ainda algun fundacion no a ricibi e fondonan pa pago di indexering di nan trahadonan.

Prome minister a splica cu pa loke ta e trahadonan di e fundacionnan, e ta na altura cu varios di nan no a haya e placa ainda y na mesun momento el a haci un apelacion na e fundacionnan pa manda e carta cu e peticion pa esaki na e minister concerni.

El a sigui splica cu e fundacion tin e payroll y a base di e payroll ta calcula cuanto placa mester pa duna e indexering aki, ta entrega esey na e minister di e ministerio cu e fundacion ta resorta bou di dje, e minister na su turno ta duna su aprobacion y e peticion ta bay Directie Financiën pa e ser paga.

E proceso aki, e mandatario a remarca, no ta canando manera debe ser. El a señala cu ta prome biaha cu gobierno ta pone placa disponibel asina pa fundacionnan y cu esaki no a yega di pasa den pasado desde cu e gobierno anterior a cambia e sistema di subsidio, cu ya no ta duna subsidio di salario, pero ta duna un ‘output subsidie.’

El a indica cu desde cu gobierno di AVP a cambia e sistema, gobierno no tin un bista mas di kico ta e payroll di e fundacionnan. Aworaki e sistema di pago ta pega, pero ta spera cu por e retonan cu tin por wordo soluciona y duna principalmente e fundacionnan mas vulnerabel e placa pa nan por paga nan trahadonan.

Segun informacion no tur fundacion tabata na altura di e proceso cu nan mester a cana, cu nan mester realisa, pa por bin na remarca pa indexering. Contestando pregunta di miembro di prensa riba e punto aki, el a cuminsa na remarca cu como cu ta prome biaha cu gobierno ta haci esaki, tin mester di tempo pa hacie bon y mester tin proceduranan na luga pa gobierno por haci tipo di pagonan asina.

El a sigui splica cu gobierno a manda un carta na tur fundacion y a informa nan kico mester haci. Segun el a indica algun fundacion a expresa cu e carta tabata complica y no tur fundacion a compronde kico e alcance di e carta ta.

“Mi sa cu e ta bay stroef, dus mi tambe ta purba di wak unda mi por agilis’e. Mi a tuma nota tambe di sindicatonan cu a cuminsa pone mas presion, mi tabatin contact tambe cu algun di nan,” el a indica.

Prome minister a splica cu e proceso mester tabata uno simpel den cual e fundacion ta haci peticion pa pago di indexering di 6%, e fundacion mester prueba tambe cu e no a ricibi ningun indexering desde 2018 pa por ricibi e 6% completo. E fundacion ta haci su peticion oficial ta mand’e na e ministerio cu e fundacion ta cay bou di dje y eynan proceso ta sigui cana su caminda. Pero e proceso ta pega.

El a menciona cu algun minister a tuma contact cune caba tocante e situacion y ta trahando pa agilisa e proceso y e pago. El a subraya cu e placa ta disponibel y cu esaki no ta bay bira menos.

Prome minister a indica cu mescos cu gehandicaptenuitkering, e placa t’ey pa aumenta e pago desde juli di e aña aki, pero no a logra na juli y no a logra comienso di augustus, pero e ta wordo paga na september cu forsa retroactivo te juli.

El a enfatisa cu mescos ta conta pa e fundacionnan. Den caso cu nan no ricibi e placa den juli, lo haya esaki den augustus pa juli y augustus, of si e bira september lo hay’e pa tur tres luna. “Asina nos kier purba mitiga e efecto, pero nos ta trahando pa soluciona esaki mas lihe posibel,” el a agrega.

Respondiendo otro pregunta tocante si lo kier haci e pagonan mas pronto posibel pa evita cualkier tipo di accion cu lo por bin di parti di sindicatonan, e mandatario a splica cu e ta compronde cu sindicatonan por bay over na accion. Na mesun momento el a enfatisa cu gobierno ta hacie no pa evita accion, pero pasobra mester cumpli cu e fundacionnan.

“Nos a priminti. E placa t’ey, no ta cos cu e placa no t’ey, e placa t’ey. Formalidadnan ta tardando,” el a resalta.

El a sigui splica cu tin fundacionnan cu ainda no a haci nan peticion y segun el a indica ministernan tabata wardando pa tur peticion drenta pa haci tur hunto, pero despues a dicidi pa cuminsa cu traha riba e pago di e fundacionnan cu si a entrega peticion, pero den esaki tambe encontra algun obstaculo cu algun fundacion cu si a haci peticion, pero cu no a compronde bon kico tur nan mester.

“Aworaki e contactonan ta wordo poni. E punto principal ta cu e trahado di e fundacion mester haya su placa. Esey ta locual nos ta trahando duro riba dje,” el a enfatisa.