Ayera mainta durante un conferencia di prensa di gobierno, prome minister Evelyn Wever-Croes, a trece dilanti e tema di RWZI. Manera ta conoci siman pasa diahuebs Parlamento di Aruba a aproba e ley di privatisacion di e plantanan di RWZI y segun prome minister no tin otro opcion pa solucion e problema aki no ta privatisa RWZI.

Prome minister a remarca cu e problema di e planta di RWZI, specificamente esun na Bubali, ta un problema serio, te cu hasta na cierto momento e planta a yega na e punto di casi explota, pero a haci e inversionnan necesario pa evita esey sucede. Aworaki, gobierno ta mira e privatisacion como e unico solucion structural pa soluciona e problema.

E mandatario a splica cu tempo cu a forma Gabinete Wever-Croes II minister Ursell Arends a pidi pa e haya un rol importante den e buskeda di un solucion pa RWZI y como minister encarga cu naturalesa y tambe desperdicio, esey tabata su responsabilidad.

El a indica cu minister Arends a cuminsa busca con por yega na solucionnan y a purba diferente manera, entre otro a yega di ubica fondo den presupuesto pa gobierno mes haci un inversion di 16 miyon florin, cu apenas tabata suficiente pa drecha algun cos solamente, pero esey por a tuma luga pasobra CAft a pone presion cu mester a baha e deficit na aña 2022.

Unabes cu gobierno a explora tur opcion y a exclui tur otro solucion, a yega na e conclusion cu mester privatisa e plantanan pasobra gobierno no tin e posibilidad pa duna un compromiso structural di tempo largo pa por percura cu ta inverti den e planta. Asina e yega na e decision pa privatisa.

Prome minister a indica cu esey tabata e prome decision y despues e ora mester a dicidi con y den man di ken lo traspasa e planta. Eynan ta caminda cu minister Glenbert Croes a drenta y a haci apelacion cerca dje pa yuda cu e privatisacion a traves di e companianan estatal y asina a yega na Utilities Aruba NV, cu a acepta e reto pa tuma over e planta di gobierno pa solucion e problema y eventualmente construi un planta nobo cu un capacidad mas grandi.

E mandatario a sigui splica cu nan lanta un grupo di trabao cu ta consisti di representantenan di e tres ministerionan. Di parti di prome minister a apunta DOW y DWJZ den e grupo aki, di parti di ministerio di minister Glenbert Croes a apunta Utilities Aruba NV y di parti di minister Ursell Arends a nombra Sr. Jossy Figaroa, ken ta un pensionado, pero ta un ciudadano preocupa pa e estado di e planta di RWZI y a dicidi di tuma e reto aki tambe den su man.

Siman pasa diahuebs durante tratamento di e ley e grupo di trabao aki a presenta e resultadonan final.

“Mucho of otro opcion no tin. No tin otro opcion na Aruba. Nos a purba di tur manera. Nos a purba di keda cune y drech’e nos mes, no a logra. Nos a logra di privatisa, pero tin cu privatis’e den mannan semi-publico no completamente priva, pa bo tin un poco mas control, y e ora nos a yega na e solucion aki,” prome minister a resalta.

El a indica cu e ley ta bay drenta na vigor dia 1 di juli y manera ya caba ta conoci, gobierno a dicidi cu pa cubri e gastonan di e trabaonan cu tin cu wordo haci no ta bay pone un impuesto adicional riba e pueblo di Aruba, pero a scoge pa e impuesto wordo paga solamente pa turistanan. Esaki ta bira un cobransa cu turistanan mester paga ora nan yena e ED card pa drenta Aruba.

El a menciona cu Boneiro tin algo similar, pero e ta costa 75 dollar, mientras cu di Aruba ta 20 dollar aworaki y tin algun excepcion. Por ehempel, muchanan bao 8 aña, localnan y esnan cu ta biba na Aruba no mester paga esaki. Ademas bishitantenan cu ta bishita Aruba varios biaha pa aña no mester paga ya cu e 20 dollar ta conta pa henter un aña.

E mandatario a indica cu durante e tratamento den parlamento fraccion RAIZ y MEP a trece un amienda den e ley cual ta pa pone excepcion tambe pa ciudadanonan di Aruba cu ta studia den exterior y kier bishita Aruba of ta bin back Aruba.

El a splica cu e inversionnan cu Utilities Aruba NV ta bay haci ta bay a traves di un compania nobo cu nan incorpora pa esaki, Aruba Wastewater Sustainable Solutions (AWSS). El a sigui splica cu e solucionnan cu nan tin prepara ya caba tin liña di credito pa nan y cu nan ta bay trece alivio riba termino cortico, alivio di holor y alivio di procesamento. El a agrega cu e procesamento di awa lo bay manera mester ta y e calidad di awa lo ta miho y cu esey por haci mas cos cu e awa, por ehemplo usa esaki pa agricultura.

El a resalta cu tur esaki ta tuma luga mientras cu ta traha un planta nobo cu tin un capacidad di casi 4 biaha mas grandi cu e planta cu tin actualmente.

Pa loke ta trata oposicion, e prome minister a lamenta cu oposicion no a sostene e ley aki y ademas nan tabatin ningun argumento convincente di nan parti pa a keda sin sostene e ley.

Prome minister a trece dilanti tambe e situacion cu a sucede den sala di parlamento, y pafo di parlamento relaciona cu e acusacionnan cu parlamentario independiente Gerlien Croes a haci contra su persona y su famia.

“Durante tratamento y pafo di parlamento e parlamentario a lansa acusacionnan hopi serio, den cual el a atacha e profesionalismo y credibilidad di nos profesionalnan y gobierno. Segun e parlamentario RWZI ta wordo privatisa pa enrikece e prome minister y cu esey e parlamentario kiermen cu tur e profesionalnan cu tabata den sala, unico cos cu nan a haci ta traha pa enrikece e prome minister di Aruba. Esaki na prome luga ta un mentira, e no ta berdad, e no por a prueba esey tampoco. Pero mas tristo ta cu e ta un ofensa pa nos profesionalnan,” el a indica.

E mandatario a reacciona mesora y den parlamento a pidi e parlamentario pa rectifica loke el a bisa, cual e parlamentario a haci e mesun dia den sala di parlamento.

Prome minister a cu aunke el a haya rectificacion inmediatamente, tin un aspecto penal ainda cu ta smaad en laster (difamacion y ofensa/insulto) cu e mandatario ta bisa su disculpa y rectificacion no a coregi completamente.

El a indica cu su abogadonan ta trahando riba e transcripcionnan y cu unabes esakinan keda cla, nan ta entrega e keho aki formalmente na OM.